17 Jul 2018, 00:13
އަންނަ ސެޕްޓެމްބަރު މަހުގެ 23 ވަނަ ދުވަހު ބާއްވާ ރިޔާސީ އިންތިޚާބުގައި ރަށްވެހިވެފައިވާ ރަށް ނޫން އެހެންތަނެއްގައި ވޯޓުލާން ބޭނުންވާ މީހުންނަށް ރީ ރެޖިސްޓްރޭޝަން ކުރުމަށް އިލެކްޝަންސް ކޮމިޝަނުން ފުރުސަތު ހުޅުވާލައިފިއެވެ.
އިލެކްޝަންސް ކޮމިޝަނުން ކުރި އިއުލާނެއްގައި ބުނެފައިވަނީ މިއަދުން ފެށިގެން އަންނަ މަހުގެ 11 ވަނަ ދުވަހުގެ ނިޔަލަށް ރީ ރެޖިސްޓްރީ ކުރުމުގެ ފުރުސަތު އޮންނާނެ ކަމަށެވެ.
ރީ ރެޖިސްޓްރީ ކުރުމަށް އެ ކޮމިޝަނުން ކަނޑައަޅާފައިވާ ފޯމް ފުރަން ޖެހޭނެއެވެ. އެ ފޯމް އިލެކްޝަންސް ކޮމިޝަންގެ ވެބްސައިޓުންނާއި ކޮމިޝަނުގެ އިދާރާގެ އިތުރުން ރަށް ރަށުގެ ކައުންސިލް އިދާރާތަކުން ލިބެން ހުންނާނެ ކަމަށް އެ އިއުލާނުގައި ވެއެވެ. އަދި ހަމަ އެތަންތަނުން ފޯމް ބަލައިގަންނާނެ ކަމަށް ވެސް އިލެކްޝަންސް ކޮމިޝަނުން ބުންޏެވެ.
ފޯމް ހުށަހެޅޭނީ ރީ ރެޖިސްޓްރީ ކުރަން ބޭނުންވާ މީހާގެ ކާކުކަން އެނގޭ މުއްދަތު ހަމަނުވާ ރަސްމީ ލިޔުމެއް އޮވެގެންނެވެ. އަދި ފޯމާއެކު އެ ލިޔުމުގެ ނުވަތަ އައިޑީކާޑުގެ ކޮޕީއެއް ހުށަހަޅަން ޖެހޭނެ ކަމަށް ވެސް އިލެކްޝަންސް ކޮމިޝަނުން ބުންޏެވެ.
އެ ކޮމިޝަނުން ބުނީ އީމެއިލް އަދި ފެކްސް މެދުވެރިކޮށް ފޯމް ބަލައި ނުގަންނާނެ ކަމަށެވެ.
ރިޔާސީ އިންތިޚާބަށް ރީ ރެޖިސްޓްރީ ވުމުގެ ފުރުސަތު ހުޅުވާލާފައިވާއިރު އިންތިޚާބަށް ކުރިމަތި ލުމުގެ ފުރުސަތު ހުޅުވާލާނެ ކަމަށް އެ ކޮމިޝަނުން ބުނީ މިމަހުގެ 23 ވަނަ ދުވަހު އެވެ.