17 Jul 2018, 16:36
އަމިއްލައަށް ވޯޓު ލުމަށް ނުކުޅެދޭ ފަދަ ޖިސްމާނީ ނުކުޅެދުންތެރިކަން ހުންނަ މީހުންނަށް މިފަހަރު ވޯޓު ލައިދޭނީ އިލެކްޝަންސް ކޮމިޝަނުގެ އޮފިޝަލުން ކަމަށް އެ ކޮމިޝަނުން ބުނެފިއެވެ.
އިލެކްޝަންސް ކޮމިޝަންގެ މެމްބަރު އަދި ތަރުޖަމާނު އަހްމަދު އަކުރަމް "ސަން" އަށް ވިދާޅުވީ އެ ކޮމިޝަނުގެ އެހީތެރިންނާ ނުލައި ޖިސްމާނީ ނުކުޅެދުންތެރިކަން ހުންނަ މީހުންނަށް ވޯޓު ނުލެވޭނެ ގޮތަށް ގަވާއިދު ބަދަލުކޮށްފައިވާ ކަމަށެވެ.
މީގެ ކުރިން ޖިސްމާނީ ނުކުޅެދުންތެރިކަން ހުންނަ މީހުން އިންތިޚާބުގައި ވޯޓު ލައި އުޅުނީ އަމިއްލައަށް ގެންނަ އެހީތެރިންނާއެކު އެވެ. ގަވާއިދަށް ގެނެސްފައި މިވާ އިސްލާހާ އެކު އަމިއްލައަށް އެހީތެރިއަކު ނުގެނެވޭނެއެވެ.
އަކްރަމް ވިދާޅުވީ މިގޮތަށް ގަވާއިދަށް ބަދަލު ގެނެސްފައި ވަނީ އެއްވެސް ނުފޫޒެއް ނެތި އެމީހަކު ބޭނުން މީހަކަށް ވޯޓު ލުމަށް މަގުފަހި ކުރުމަށް ކަމަށެވެ.
އޭނާ ވިދާޅުވީ ގަވާއިދަށް ގެނައި އިސްލާހަކީ ދުނިޔޭގެ އެހެން ގައުމުތަކުގައި ވެސް ބޮޑެތި އިންތިޚާބުތަކުގައި ކަންތައް ކުރާ ގޮތް ދިރާސާ ކުރުމަށް ފަހު ގެނައި އިސްލާހެއް ކަމަށެވެ.
މީގެ ކުރިން ގަވާއިދު އޮތް ގޮތުން އަމިއްލަ އަށް ގެންނަ އެހީތެރިޔާ އަށް، ލޯފަން މީހުން ފަދަ ނުކުޅެދުންތެރިކަން ހުންނަ މީހުންނަށް ނާންގައި އެމީހާ ބޭނުންވާ ބޭފުޅަކަށް ވޯޓުލާ ކަމުގެ ޝަކުވާތައް ކޮށްފައިވެއެވެ.
ރިޔާސީ އިންތިހާބުގައި ވޯޓު ފޮށި ބަހައްޓާ ތަނާއި އަދަދު:
މާލޭ ރައްޔިތުން ވޯޓު ލުމަށް: 56 ފޮށި
- މާލޭގައި ދިރިއުޅޭ އަތޮޅުތަކުގެ މީހުން ވޯޓުލުމަށް: 72 ވޯޓު
- ރިސޯޓުތަކުގައި ބަހައްޓާ ފޮށި: 7 ފޮށި
- ޖަލުތަކުގައި ބަހައްޓާ ފޮށި: 4 ފޮށި
- ރާއްޖެއިން ބޭރުގައި ބަހައްޓާ ފޮށި: 5 ފޮށި
- ސިނާއީ މަސައްކަތް ކުރާ ތަންތަނުގައި ބަހައްޓާ ވޯޓު ފޮށި: 6
- އަތޮޅުތެރޭގައި އަދި ސިޓީތަކުގައި ބަހައްޓާ ފޮށި: 301 ފޮށި