22 Jul 2018, 18:32
އިންޓަރނޭޝަނަލް އިންސްޓިޓިއުޓް އޮފް އިސްލާމިކް ތޯޓު (އައިއައިއައިޓީ) އިން ދިވެހިރާއްޖޭހެ އިސްލާމިކް ޔުނިވާސިޓީ (އައިޔޫއެމް) އަށް ދިން ސްކޮލަޝިޕްގެ ފުރުސަތުތަކަށް ކުރިމަތިލުމަށް ހުޅުވާލައިފި އެވެ.
އައިއައިއައިޓީ އިން އިސްލާމިކް ޔުނިވާސިޓީއަށް ދީފައި ވަނީ ގާނޫނީ ދާއިރާގެ ޕީއެޗްޑީ ކޯހުގެ ދެ ފުރުސަތެވެ. މެލޭޝިއާގައި ހުންނަ އިންޓަރނޭޝަނަލް އިސްލާމިކް ޔުނިވަރސިޓީގައި ކުރިއަށް ގެންދާ އެ ޕީއެޗްޑީ ކޯހަކީ ތިން އަހަރު ދުވަހުގެ ކޯހެކެވެ.
އެ ޕީއެޗްޑީގެ ޝަރުތުތަކަކީ އިންޓަރނޭޝަނަލް އިސްލާމިކް ޔުނިވަރސިޓީ މެލޭޝިއާ އިން ޕީ.އެޗް.ޑީ ހެދުމަށް ޕްލޭސްމަންޓް (އޮފަރ ލެޓަރ) ލިބިފައިވުމާއިއެކު ގުޅޭ ދާއިރާއިން ފުރިހަމަކޮށްފައިވާ މާސްޓާރސް ޑިގްރީގެ ސީ.ޖީ.ޕީ.އޭ އެންމެ ދަށްވެގެން 3.50 ލިބިފައިވުން ކަމަށް އައިޔޫއެމް އިން ބުނެއެވެ.
އައިޔޫއެމް އިން ބުނެފައި ވަނީ ސްކޮލަރޝިޕަށް ދަރިވަރުން ހޮވުމުގައި ޔުނިވަރސިޓީގެ ދާއިމީ، ޕާރޓް ޓައިމް މުވައްޒަފުންނާއި ދަރިވަރުންނަށް އިސްކަން ދެވޭނެ ކަމަށެވެ.
ސްކޮލަޝިޕަށް ކުރިމަތިލުމަށް ހުށަހަޅަން ޖެހެނީ ފުރުސަތަށް އެދި ފުރިހަމަކޮށްފައިވާ ފޯމާއި އެ ފޯމްގައި ބަޔާންކޮށްފައިވާ ތަކެތި، ތަޢުލީމީ ސެޓްފިކެޓްތަކުގެ ކޮޕީއާއި ޓްރާންސްކްރިޕްޓްގެ ކޮޕީ، އަދި ސްކޮލާޝިޕަށް އެދޭ ފަރާތުގެ ވަނަވަރެވެ.
އައިޔޫއެމް އިން ބުނީ ކުރިމަތިލާން ބޭނުންވާ ފަރާތްތަކުން އަންނަ މަހުގެ ފަސް ވަނަ ދުވަހުގެ 13:30 ގެ ކުރިން ޔުނިވާސިޓީގެ ރިސެޕްޝަނަށް ހުރިހާ ޑޮކިއުމެންޓްތަކާއެކު ސްކޮލަރޝިޕް ފޯމް ފުރިހަމަ ކުރުމަށްފަހު ހުށަހަޅަން ވާނެ ކަމަށެވެ. އަދި ސްކޮލާޝިޕަށް އެދޭ ފޯމު ޔުނިވާސިޓީގެ ވެބްސައިޓުން ލިބެން ހުންނާނެ ކަމަށް އެ ޔުނިވާސިޓީން ބުންޏެވެ.