24 Jul 2018, 18:38
ޕާކިސްތާނުގައި މާދަމާ ބާއްވާ އާއްމު އިންތިހާބުގައި 171 އަންހެން ކެނޑިޑޭޓުން ވާދަ ކުރެ އެވެ. އެއީ އެގައުމުގެ އާއްމު އިންތިހާބެއްގައި އެހާވަރަށް ގިނަ އަންހެނުން ވާދަ ކުރާ ފުރަތަމަ ފަހަރެވެ.
ޕާކިސްތާނުގައި ދެން ވެރިކަން ކުރައްވާނެ ބޮޑުވަޒީރަކު އައްޔަން ކުރުމަށް މަގުފަހިވެގެންދާނެ އެއިންތިހާބުގައި އެންމެ ގާތުން ވާދަ ކުރާނެ ކަމަށް ބެލެވެނީ ވެރިކަން ކުރާ، ޕާކިސްތާން މުސްލިމް ލީގް ނަވާޒް (ޕީއެމްއެލް-އެން) ޕާޓީ އާއި އިދިކޮޅު ލީޑަރު އިމްރާން ޚާން އިސްކޮށް ހުންނަވާ ޕާކިސްތާން ތަހުރީކް އީ އިންސާފް (ޕީޓީއައި) އެވެ.
އަދި ކުރީގެ ބޮޑުވަޒީރު ބޭނަޒީރު ބުއްޓޫގެ ދަރިކަލުން ބިލާވަލް ބުއްޓޫ ޒަރުދާރީ އިސްކޮށް ހުންނަވާ ޕާކިސްތާން ޕީޕަލްސް ޕާޓީ (ޕީޕީޕީ) އާއި ދީނީ ޕާޓީތަކުގެ ކޯލިޝަން، މުއްތަހިދާ މަޖިލިސް އީ އަމާލް (އެމްއެމްއޭ)އިންވެސް މަޖިލީހުގެ ގިނަ ގޮނޑިތައް ކާމިޔާބު ކުރާނެ ކަމަށް ބެލެވެއެވެ.
ޕާކިސްތާނުގެ އާއްމު އިންތިހާބުގައި ވާދަ ކުރާ ކެނޑިޑޭޓެއް ކަމަށްވާ ނޮޝިން އަފްޝަން -- ފޮޓޯ: ސަމާޓީވީ
ޕާކިސްތާނުގެ ނޫސްތަކުގައިވާ ގޮތުން އެއިންތިހާބުގައި ވާދަކުރާ 171 އަންހެނުންގެ ތެރެއިން 105 އަންހެނުން ވާދަ ކުރަނީ ތަފާތު ޕާޓީތަކުންނެވެ. އަދި ބާކީ 66 އަންހެނުންނަކީ މިނިވަން ކެނޑިޑޭޓުންނެވެ.
އޭގެ ތެރެއިން އެންމެ ގިނަ އަންހެނުން ވާދަ ކުރަނީ ޕީޕީޕީންނެވެ. އެއީ 19 އަންހެން ކެނޑިޑޭޓުންނެވެ. އަދި އެމްއެމްއޭގެ ފަރާތުން 14 އަންހެން ކެނޑިޑޭޓުން ވާދަ ކުރާ އިރު، ޕީއެމްއެލް-އެން އާއި ޕީޓީއައި އިން 11 އަންހެނުން ގާނޫނު ހަދާ މަޖިލީހުގެ ގޮނޑިއަށް ވާދަ ކުރެއެވެ.
ޕާކިސްތާނުގައި އެންމެ ފަހުން 2013 ވަނަ އަހަރު ބޭއްވި އާއްމު އިންތިހާބުގައި ވާދަ ކުރީ 135 އަންހެނުންނެވެ. އަދި އެއަހަރު އިންތިހާބު ކުރި ގާނޫނު ހަދާ މަޖިލީހުގެ 20 ޕަސެންޓު ހިއްސާ ކުރީ އަންހެން މެމްބަރުންނެވެ.
ޕާކިސްތާނުގެ އަވާމީ ނެޝަނަލް ޕާޓީގެ ފަރާތުން މަޖިލީހަށް ވާދަ ކުރާ ކެނޑިޑޭޓެއް ކަމަށްވާ ނޮޝިން އަފްޝަން ވަނީ އޭނާ އިންތިހާބުވެއްޖެ ނަމަ އަންހެނުންގެ ހައްގުތަކަށާއި، ތައުލީމާއި، ސިއްހީފަރުވާއަށް އިސްކަން ދޭނެ ކަމަށް ބުނެފައެވެ.
ޕީޕީޕީގެ ލީޑަރު ބިލާވަލް ބުއްޓޫ ޒަރުދާރީ (ކ)، ޕީއެމްއެލް-އެންގައި މިހާރު އިސްކޮށް ހުންނަވާ ޝެހެބާޒް ޝަރީފް އަދި ޕީޓީއައިގެ ލީޑަރު އިމްރާން ޚާން -- ފޮޓޯ: ފަސްޓްޕޯސްޓް
"ގާނޫނުތައް އެބަހުރި، ނަމަވެސް އެގާނޫނުތައް ތަސްދީގު ކުރެވޭނެ ނިޒާމެއް ނެތް. އަޅުގަނޑު ބޭނުން ބަނީ އެނިޒާމު ބަދަލު ކުރަން،" އަފްޝަން ބުންޏެވެ.
ޕާކިސްތާނުގެ ގާނޫނު ހަދާ މަޖިލީހުގެ 272 ގޮނޑިއަށް 3,675 ކެނޑިޑޭޓުން ވާދަ ކުރެ އެވެ. އަދި ކޯލިޝަނެއް ހެދުމަކާ ނުލައި، އެއް ޕާޓީއަކަށް އެގައުމުގެ ވެރިކަން ކުރެވޭނީ 137 ގޮނޑި ކާމިޔާބުކޮށްގެންނެވެ.
އެއިންތިހާބު ޕީއެމްއެލް-އެން އިން ކާމިޔާބުކޮށްފި ނަމަ، ބޮޑުވަޒީރު ކަމަށް އައްޔަން ކުރާނެ ކަމަށް ބެލެވެނީ މިވަގުތު ޖަލުގައި ހުންނެވި ނަވާޒް ޝަރީފްގެ ކޮއްކޯފުޅު ޝެހެބާޒް ޝަރީފެވެ. ކޮރަޕްޝަނުގެ މައްސަލައަކާ ގުޅިގެން ނަވާޒް ޝަރީފްގެ މައްޗަށް ވަނީ 10 އަހަރުގެ ޖަލު ހުކުމެއްކޮށްފައެވެ.
އަދި އެއިންތިހާބު ޕީޓީއައިއިން ކާމިޔާބުކޮށްފި ނަމަ، އެވާނީ އެޕާޓީގެ މެމްބަރަކު ވެރިކަމަށް ވަޑައިގަންނަވާ ފުރަތަމަ ފަހަރަށެވެ.
ޕާކިސްތާނުގައި މާދަމާ ބާއްވާ އިންތިހާބުގައި ވޯޓު ލުމަށް 106 މިލިއަން މީހުން ރެޖިސްޓާކޮށްފައިވެއެވެ. އަދި އެގައުމުގައި ސަލާމަތީ ކަންތައްތައް ބެލެހެއްޓުމަށްޓަކައި 371،000 ސިފައިން ހަރަކާތްތެރި ވާނެ ކަމަށް ޕާކިސްތާނުގެ އަސްކަރިއްޔާއިން ބުންޏެވެ.