26 Jul 2018, 12:58
ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމްގެ ރަނިންމޭޓު ޑރ. މުހައްމަދު ޝަހީމް އަލީ ސައީދު ގއ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން އެ އަތޮޅު ދާންދޫއަށް ވަޑައިގެން އެރަށުގެ ޕީޕީއެމް ޖަގަހަ ހުޅުއްވައިދެއްވައިފިއެވެ.
ޑރ. ޝަހީމް ދާންދޫއަށް ވަޑައިގެންނެވީ އެމަނިކުފާނު ގެމަނަފުށްޓަށް ކުރެއްވި ޒިޔާރަތް ނިންމަވާލެއްވުމަށްފަހު މިއަދު ހެނދުނުގެ ވަގުތެއްގައެވެ.
ޑރ. ޝަހީމް ދާންދޫގެ ރައްޔިތުންނާ މުހާތަބުކުރައްވައި ވާހަކަފުޅު ދައްކަވަނީ-- ފޮޓޯ: ފޭސްބުކް
މިއަދު، ޖަގަހަ ހުޅުއްވައިދެއްވުމަށް ފަހު ދާންދޫގެ ރައްޔިތުންނާ މުހާތަބުކުރައްވައި ވާހަކަފުޅު ދައްކަވަމުން ޑރ. ޝަހީމް ވިދާޅުވީ އެންމެ ފުރަތަމަ ކެމްޕެއިން ދަތުރުފުޅުގައި ގއ. އަތޮޅަށް ވަޑައިގަތީ އެ އަތޮޅަކީ އެމަނިކުފާނުގެ އުފަން އަތޮޅު ކަމަށްވާތީ ކަމުގައެވެ.
ޑރ. ޝަހީމް ވަނީ ކުރިއަށް އޮތް ރިޔާސީ އިންތިހާބު ރައީސް ޔާމީނަށް ކާމިޔާބުކޮށްދިނުމަށް ހުރިހާ ރައްޔިތުން މަސައްކަތްކުރުމަށް އެދިވަޑައިގެންފައެވެ.
ދާންދޫއަށް ކުރައްވަމުން ގެންދަަވާ ދަތުރުފުޅުގައި ދޮރުން ދޮރަށް ޒިޔާރަތްކުރައްވައި އެ ރަށުގެ ރައްޔިތުންނާ ޑރ. ޝަހީމް ބައްދަލުކުރައްވާނެއެވެ.
ދާންދޫގައި ހުޅުވި ޕީޕީއެމްގެ ޖަގަހަ-- ފޮޓޯ: ފޭސްބުކް
ކެމްޕޭން ދަތުރުފުޅުގައި ޑރ. ޝަހީމް ގއ. އަތޮޅަށް ފުރާވަޑައިގަތީ މިދިޔަ ބުރާސްފަތި ދުވަހުއެވެ. އެންމެ ފުރަތަމަ އެމަނިކުފާނު ވަޑައިގަތީ އެ އަތޮޅުގެ ވެރިރަށް ވިލިނގިއްޔަށެވެ. އެރަށުގައި މަޑުކުރެއްވި ދެ ދުވަހު އެ ރަށުގައި ދޮރުން ދޮރަށް ވަޑައިގެން ޑރ. ޝަހީމް ވަނީ ރައްޔިތުންނާ ބައްދަލުކުރައްވައިފައެވެ.
މިހާރު ޑރ. ޝަހީމްގެ ދަތުފުޅުގައި ވަޑައިގަންނަވަން ބާކީ އޮތީ ގއ. ނިލަންދޫ އަދި މާމެންދޫއެވެ.