23 Aug 2018, 11:26
(މިނާ، ސައުދީ އަރަބިއްޔާ):
މައްކާގައި ހުންނަ މަސްޖިދުލް ހަރަމާއި މަދީނާގައި ހުންނަ މަސްޖިދުއްނަބަވީ ހިމާޔަތްކޮށް، އެ ދެ ހަރަމަށް ޒިޔާރަތްކުރާ މާތްﷲގެ އަޅުތަކުންނަށް ހިދުމަތްކުރުމަކީ ލިބޭ ވަރަށް ބޮޑު ފަހުރެއް ކަމަށް ސައުދީ ރަސްގެފާނު ސަލްމާން ބިން އަބްދުލްއަޒީޒު އާލް ސައުދު ވިދާޅުވެއްޖެއެވެ.
ރަސްގެފާނާއި ސައުދީ ސަރުކާރުގެ އެކިއެކި ވުޒާރާތަކުގެ މެހެމާނުންގެ ގޮތުގައި މިއަހަރު ހައްޖުގެ އަޅުކަމުގައި ބައިވެރިވި ފަރާތްތަކަށް، ސަލްމާން ރަސްގެފާނު އިއްޔެ ވަނީ މިނާގައި ހުންނަ އެމަނިކުފާނުގެ ގަނޑުވަރުކޮޅުގައި ބައްދަލުކުރައްވައި، ހާއްސަ ފަރީއްކޮޅެއް އަރުވައިފައެވެ. އެ ބައްދަލުކުރެއްވުމުގައި ގިނަ އަދަދެއްގެ އަމީރުންވެސް ބައިވެރިވެވަޑައިގަތެވެ.
ރަސްގެފާނުގެ ސަލްމާން ބިން ޢަބްދުލްޢަޒީޒް އާލް ސަޢުދުގެ ޚާއްސަ މެހެމާނުންގެ ގޮތުގައި މިއަހަރުގެ ހައްޖުގެ އަޅުކަމުގައި ބައިވެރިވި ފަރާތްތަކަށް ބޭއްވި ޚާއްސަ ހަފްލާގެ ތެރޭން-- ފޮޓޯ: ސައުދީ ޕްރެސް އޭޖެންސީ
ސަލްމާން ރަސްގެފާނު އެ ބައްދަލުކުރެއްވުމުގައި ވިދާޅުވީ، އިސްލާމްދީނުގެ ރުކުންތަކުގެ ތެރޭގައި ހިމެނޭ ހައްޖުގެ މާތް އަޅުކަން އަދާކުރަން އަންނަ ފަރާތްތަކަށް ސަލާމަތާއި ރައްކާތެރިކަމާއެކު އެ އަޅުކަން އަދާކުރުމުގެ ތައުފީގު ދެއްވުން އެދި ދުއާ ކުރައްވާ ކަމަށެވެ. އެގޮތުން ދެ ހަރަމްފުޅަށް ޒިޔާރާތްކުރާ ފަރާތްތަކުގެ ސަލާމަތާއި ރައްކާތެރިކަން ގާއިމުކޮށްދިނުމާއި، އެ ފަރާތްތަކަށް ހިދުމަތްކުރުމަކީ ސައުދީ ދައުލަތަށް މާތްﷲ ދެއްވާފައިވާ މަތިވެރި ޝަރަފެއް ކަމަށް ރަސްގެފާނު ވިދާޅުވިއެވެ.
ސަލްމާން ރަސްގެފާނު ވިދާޅުވީ އެމަނިކުފާނުގެ ބައްޕާފުޅު އަދި ސައުދީ އަރަބިއްޔާގެ ފުރަތަމަ ރަސްގެފާނު އަބްދުލްއަޒީޒުގެ ދުވަސްވަރުން ފެށިގެން، ދެ ހަރަމާއި ދެ ހަރަމަށް ޒިޔާރަތްކުރާ މެހެމާނުންނަށް ހިދުމަތްކުރުމަށް އެގައުމުގެ ސަރުކާރުން ހާއްސަ އަހައްމިއްޔަތުކަމެއް ދޭ ކަމަށެވެ. އަދި ކުރިއަށް އޮތް ތަނުގައިވެސް އެގޮތުގައި ދެމިތިބޭނޭކަމަށާއި، ހައްޖާއި އުމްރާވުމަށް އަންނަ މީހުންނަށް ހިދުމަތްކުރުމަކީ ސައުދީ ސަރުކާރުގެ ވާޖިބެއް ކަމުގައި ދެކިވަޑައިގަންނަވާ ކަމަށް ރަސްގެފާނު ވިދާޅުވިއެވެ.
ރަސްގެފާނުގެ ސަލްމާން ބިން ޢަބްދުލްޢަޒީޒް އާލް ސަޢުދުގެ ޚާއްސަ މެހެމާނުންގެ ގޮތުގައި މިއަހަރުގެ ހައްޖުގެ އަޅުކަމުގައި ބައިވެރިވި ފަރާތްތަކަށް ބޭއްވި ޚާއްސަ ހަފްލާގެ ތެރޭން-- ފޮޓޯ: ސައުދީ ޕްރެސް އޭޖެންސީ
ސައުދީ އަރަބިއްޔާއަކީ، މުސްލިމުންގެ ގިބުލައާއި ކީރިތި މާތް ނަބިއްޔާގެ މިސްކިތް ހުންނަ ބިންކަމަށް ވުމުން އިސްލާމީ މުޖްތަމައުގައި ވަރަށް މުހިންމު ދައުރެއް އެގައުމު އަދާކުރާން ޖެހޭކަމަށް ރަސްގެފާނު ވިދާޅުވިއެވެ. އެހެންކަމުން، އިސްލާމްދީން ހިމާޔަތްކުރުމާއި ޓެރަރިޒާމާއި ދީނީ ހަރުކަށި ފިކުރު ނައްތާލައި އިސްލާމީ އެއްބައިވަންތަކަށް ދެމެހެއްޓުމަށް، ސަރަހައްދީ ފެންވަރުގައާއި ބައިނަލްއަގްވާމީ ފެންވަރުގައި ސާބިތުކަމާއެކު މަސައްކަތް ކުރައްވާނޭ ކަމަށް ރަސްގެފާނު ވިދާޅުވިއެވެ.
ސަލްމާން ރަސްގެފާނު ވަނީ، ދުނިޔޭގެ އެކި ކަންކޮޅުތަކުގައި ދިރިއުޅޭ އެންމެހާ މުސްލިމުންނަށް އަޟްހާ އީދުގެ ތަޙްނިޔާ ފޮނުއްވައިފައެވެ. އަދި އެންމެހާ ހައްޖުވެރީންނަށް މަބްރޫރު ހައްޖެއް ލިބުމަށް އެދިވަޑައިގަންނަވާ ކަމަށް ވިދާޅުވިއެވެ.