23 Aug 2018, 17:08
ދޮށީ ދަރިފުޅު ކްރިސްޓިއާނޯ ޖޫނިއާ މުސްތަގުބަލުގައި ފުޓުބޯޅަ ކުޅުންތެރިއަކަށް ވާތަން ދެކެން ބޭނުން ކަމަށް، ދުނިޔޭގެ އެންމެ މޮޅު ކުޅުންތެރިޔާ ކަމަށް ގިނަ ބަޔަކު އިއްތިފާގުވާ ޔުވެންޓަސްގެ ކްރިސްޓިއާނޯ ރޮނާލްޑޮ ބުނެފި އެވެ.
ވީޑިއޯ ސްޓްރީމިންގެ ހިދުމަތް ފޯރުކޮށްދޭ "ޑަ ޒޯން" އަށް ދިން އިންޓަވިއުއެއްގައި ރޮނާލްޑޯ ބުނީ އޭނާ ކުޑަ އިރު އުޅުނު ފަދައިން ކްރިސްޓިއާނޯ ޖޫނިއާ އަކީ ވެސް ވާދަވެރި ކުއްޖެއް ކަމަށެވެ.
"އޭނާ ބަލިވާން ބޭނުމެއް ނުވާނެ. މުސްތަގުބަލުގައި އޭނާ ވަނީ ހަމަ އަހަރެން ކަހަލަ މީހަކަށް." ރޮނާލްޑޯ ބުންޏެވެ.
ރޮނާލްޑޯ ބުނީ ޖުނިއާ ފުޓުބޯޅަ ކުޅުންތެރިއަކަށް ވާތަން ދެކެން އޭނާ ބޭނުންވަނީ، ފުޓުބޯޅަ ކުޅުންތެރިއެއްގެ ހުންނަން ޖެހޭ ސިފަތައް ޖޫނިއާގެ ގައިގައި ފުރިހަމަވާތީ ކަމަށެވެ. އެގޮތުން، އެ ހުނަރާއި، ކުޅުންތެރިއެއްގެ ހުންނަން ޖެހޭ ފަދަ ހަށިގަނޑަކާއި، ދުވެލި އޭނާގެ ގައިގައި ހުންނަ ކަމަށް ރޮނާލްޑޯ ބުންޏެވެ.
"އެކަމަކު، އޭނަ އަމިއްލައަށް ނިންމާނީ [ފުޓުބޯޅަ ކުޅޭނެތޯ ނުވަތަ ނޫންތޯ]. އަހަރެން އޭނައަށް ޕްރެޝަރެއް ނުކުރާނަން. އެކަމަކު އޭނަ ފުޓުބޯޅަ ކުޅުންތެރިއަކަށް ވާތަން ދެކުމަކީ އަހަރެންގެ ހުވަފެނެއް." ރޮނާލްޑޯ ބުންޏެވެ.
އުމުރުން އަށް އަހަރުގެ ޖޫނިއާ އަކީ މިހާރުވެސް ފުޓުބޯޅައަށް ޝައުގުވެރިކަން ހުންނަ ކުއްޖެކެވެ. ރޮނާލްޑޯ އޭނާގެ މީސް މީޑިއާ އެކައުންޓުތަކުގައި ޖޫނިއާ ފުޓުބޯޅަ ކުޅޭ މަންޒަރު ފެންނަ ވީޑިއޯތައް އާންމުކޮށް އޭނާގެ ސަޕޯޓަރުންނާ ހިއްސާ ކުރެ އެވެ.
މި ހޫނު މުސުމުގެ ޓްރާންސްފާ ބާޒާރުގައި 100 މިލިއަން ޕައުންޑަށް ރޮނާލްޑޯ ވަނީ އިޓަލީގެ ޔުވެންޓަސްއާ ގުޅިފަ އެވެ. އެހެން ކަމުން އޭނާ ވަނީ އޭނާގެ އާއިލާއާ އެކު އިޓަލީއަށް ދިރިއުޅުން ބަދަލުކޮށްފައެވެ.