16 Oct 2018, 09:37
އަންކާރާ(އޮކްޓޯބަރު 16): ތުރުކީގައި ހުންނަ ސައުދީ އަރަބިއާގެ ކޮންސިއުލޭޓަށް މިދިޔަ މަހު ދެ ވަނަ ދުވަހު ދިޔަ ފަހުން ގެއްލުނު ސައުދީ ނޫސްވެރިޔާ، ޖަމާލް ޚަޝޯގީ މަރުވީ އޭނާއާ ސުވާލުކުރަން އުޅުމުގެ ތެރޭގައި ކަމަށް އިއުތިރާފުވާ ރިޕޯޓެއް ނެރެން އުޅޭ ކަމަށް ސީއެންއެންއިން ރިޕޯޓުކޮށްފި އެވެ.
ނަން ހާމަކޮށްފައި ނުވާ މަސްދަރަކާ ހަވާލާދީ ސީއެންއެންގައިވާ ގޮތުން ޚަޝޯގީގެ މަރާ ބެހޭ ގޮތުން ސައުދީން ރިޕޯޓެއް އާއްމު ކުރާނެއެވެ. އަދި އެކޮންސިއުލޭޓުން ޚަޝޯގީއާ ސުވާލު ކުރީ ސައުދީގެ ކަމާ ބެހޭ އިދާރާތަކުން ހުއްދަ ނުހޯދައި، ދެފުށް ފެންނަ ގޮތަކާ ނުލައި ކަމަށް އެރިޕޯޓުގައި އޮންނާނެއެވެ.
މީގެ އިތުރުން އެމައްސަލައިގައި ކުށްވެރިވާ ފަރާތްތަކުން ކުށުގެ ޒިންމާ ނަގަން ޖެހޭނެ ކަމަށްވެސް ރިޕޯޓުގައި އޮންނާނެ ކަމަށް ސީއެންއެންގައިވެއެވެ.
ސައުދީ ވަލީއަހުދުގެ ސިޔާސަތުތަކަށް ފާޑު ކިޔާފައިވާ ޚަޝޯގީ ގެއްލިފައި ވަނީ އެމެރިކާގައި އަމިއްލައަށް އަރުވާލެވިގެން ހުންނަތާ އަހަރަކަށް ވުރެ ގިނަ ދުވަސްވީ ފަހުންނެވެ. އޭނާ ތުރުކީގައި ހުންނަ ސައުދީ ކޮންސިއުލޭޓަށް ދިޔައީ، ތުރުކީގެ އަންހެނަކާ ކައިވެނި ކުރުމަށްޓަކައި ބޭނުންވާ ލިޔެކިޔުންތަކެއް ހަމަޖެއްސުމަށްޓަކައެވެ.
ޚަޝޯގީއާ އެކު އެކޮންސިއުލޭޓަށް ދިޔުމަށް ފަހު، ކޮންސިއުލޭޓުގެ ބޭރުގައި މަޑު ކުރި އޭނާގެ ލޯބިވެރިޔާ ވަނީ ޚަޝޯގީ އެއިމާރާތުން ނުނިކުންނަ ކަމަށް ބުނެފައެވެ.
އެމައްސަލަ ތަހުގީގު ކުރަމުންދާ ތުރުކީގެ އޮފިޝަލުން ވަނީ، ސައުދީ އަރަބިއާގެ ހުއްދައާ އެކު އިއްޔެ އެގައުމުގެ ކޮންސިއުލޭޓު ބަލާ ފާސްކޮށްފައެވެ.