21 Oct 2018, 09:33
ޑާކްރެއިން އެންޓަޓެއިންމެންޓުގެ ފަރާތުން އަންނަ އަހަރު ގެނެސްދޭން ނިންމާފައިވާ ކޮމެޑީ ފިލްމު "މާމުއި" ޝޫޓިން މިހާރު ނިމުމަކާ ގާތް ވަނީއެވެ.
އައިޝަތު ފުވާދާއި ކުޅަދާނަ ޑައިރެކްޓަރު އަލީ ޝިފާއު (ޗިއްޕެ)ގެ ވާހަކައަކަށް ހަދާ އެ ފިލްމުގެ ޝޫޓިން ފެށިގެން ހަލުވި މިނެއްގައި ކުރިއަށް ދާއިރު އެ މީހުންގެ މަސައްކަތް ޑާކްރެއިންގެ އޮފިޝަލް ޕޭޖުން އަންނަނީ ހިއްސާކުރަމުންނެވެ.
ފިލްމުގައި ހިމެނޭ "އަރައިގެން އައި އިރާއޭ" އަކީ އާދައިގެ ލަވައެއް ނޫންކަން ޑާކްރެއިން އެންޓަޓެއިންމަންޓްގެ ފޭސްބުކް ޕޭޖުންވެސް ހާމަވެއެވެ. ދިވެހި މަޝްހޫރު ބައެއް ލަވަތަކުގެ ޓްރިބިއުޓެއް މި ފިލްމުން ފެނިގެންދާނެއެވެ. "އައިކޮނިކް ލަވަ ސެޓެއް"ގެ ގޮތުގައި މި ލަވަ ހާއްސަ ވެގެންދާނެއެވެ.
މަޝްހޫރު ގިނަ ލަވަތަކެއްގެ "ސްޓެޕް"ތަކެއް އަމުނާލައިގެން އާންމުންނާ ހަމައަށް މި ލަވަ ގެނެސްދޭން އެ ޓީމުން ވަނީ ނިންމާފައެވެ.
އަލީ ސީޒަން އާއި ނިއުމާ މުހައްމަދުގެ ހިޓް ލަވަ "ފުރަތަމަ ވެސް ފެނުނީމާ"ގެ ސްޓެޕް ތަކެއް ވެސް މި ލަވައިން ފެނިގެންދާނެއެވެ. އަދި ދަރާ ރަޝީދުގެ "އަންގާދޭށޭ"ގެ ލަވައިގެ ސްޓެޕްތަކާއި ގިޔާސް އަދި އައިޝަތު ޝީރާނީގެ "މަހޭ ނެތި ދާނޭ"ގެ ސްޓެޕްތަކެއް ވެސް މި ލަވައިން ފެނިގެންދާނެއެވެ.
"ސަން"އަށް ކުރިން ދިން އިންޓަވިއުއެއްގައި ފިލްމުގެ ޑައިރެކްޓަރު ޗިއްޕެ ބުނީ، ފިލްމުގެ ޓީމުން ތިބީ ތަފާތު ދައްކަން ރެޑީގައި ކަމަށާއި ބެލުންތެރިން ހެއްވާލާނެ ގިނަ މަންޒަރުތަކެއް ފިލްމުގައި ހުންނާނެކަމަށެވެ.
މާމުއިގައި ހަރަކާތްތެރިވާ ތަރިންނަކީ އިސްމާއީލް ޖުމައިހް (ޖުމާ)، މުހައްމަދު ފައިސަލް، އަބްދުﷲ ޝާފިއު އިބްރާހިމް (ފުބޫ)، މަރިޔަމް މަޖުދާ (މަޖޫ)، އަހްމަދު ސުނީ، ހަމްދާން ފާރޫގް، އާދަމް ރިޒްވީ، މަރިއްޔާ، އައިމިނަތު ނޫރާ، އަހްމަދް އަމާން، ނުޒުހަތު ޝުއައިބު (ނުޒޫ) އަދި އަހްމަދު ޝާކިރު އެވެ.
ދިވެހި ފިލްމު އިންޑަސްޓްރީގައި މިހާރު އެންމެ ޑިމާންޑް ބޮޑު ބަތަލާ މަރިޔަމް އައްޒަ، ކުޅަދާނަ ބަތަލާ ޝީލާ ނަޖީބު، އިބްރާހިމް އަމާން، މާރިއާ ތްރޭސާ އަދި އަލީ ޝަޒްލީމް ވެސް މި ފިލްމުން ފެނިގެންދާނެ އެވެ.
ފިލްމު މާމުއި އިން މި ދާއިރާ އަށް އަލަށް ތައާރަފްވާ އައިޝަތު ޔާދާ ވެސް ހިމެނޭނެއެވެ.