23 Nov 2018, 12:07
އާ ސަރުކާރުގެ ފޮރިން މިނިސްޓަރު އަބްދުﷲ ޝާހިދު ރަސްމީ ދަތުރުފުޅެއްގައި އިންޑިއާއަށް ފުރާވަޑައިގެންފި އެވެ.
ޝާހިދު މިއަދު ކުރެއްވި ޓުވީޓެއްގައި ވިދާޅުވީ އެ ރަސްމީ ދަތުރުފުޅުގެ ސަބަބުން ދެ ގައުމުގެ ގުޅުން އިތުރަށް ބަދަހިވެ އެދެވޭ ނަތީޖާއެއް ނުކުންނާނެ ކަމަށް ގަބޫލުކުރައްވާ ކަމަށެވެ.
ފޮރިން މިނިސްޓްރީން ބުނީ އެ ދަތުރުފުޅުގައި އިކޮނޮމިކް މިނސްޓަރު ފައްޔާޒް އިސްމާއިލާއި އަދި އަހުމަދު އަމީރު ވެސް ބައިވެރިވެވަޑައިގަންނަވާނެ ކަމަށެވެ.
Departing to India. I’m looking forward to very fruitful meetings which will further strengthen the ties of friendship and solidarity between our two countries and people.
— Abdulla Shahid ???? (@abdulla_shahid)November 23, 2018
މިނިސްޓަރުގެ ދަތުރުފުޅު އިންޑިއާއަށް ފެއްޓެވި އިރު، ކުރީ ސަރުކާރާ އިންޑިއާގެ ގުޅުން ވަރަށް ބޮޑަށް އޮތީ ގޯސްވެފަ އެވެ.
މިނިސްޓަރު ޝާހިދު އިންޑިއާގެ ޓައިމްސް އޮފް އިންޑިއާއަށް ދެއްވި ބަސްދީގަތުމެއްގައި ވިދާޅުވީ ކުރީ ސަރުކާރުން ގެންގުޅުނު ޕޮލިސީތަކުގެ ސަބަބުން އިންޑިއާ ކަނޑުގެ ސަލާމަތަށް ނުރައްކާވި ކަމަށެވެ.
މިނިސްޓަރު ޝާހިދު ވިދާޅުވީ ސަރަހައްދުގެ ސަލާމަތަށް ރާއްޖެއިން އަބަދު ވެސް އިސްކަންދޭ ކަމަށާއި ރާއްޖެއަށް އޮތް އެންމެ ރައްކާތެރިގޮތަކީ ވެސް އަވައްޓެރިގައުމުތަކުގެ ސަލާމަތްކަން ކަށަވަރުކުރުން ކަމަށެވެ.
ރައީސް ޔާމީނުގެ ސަރުކާރުން ޗައިނާއާ އެކު އިގްތިސާދީ ގުޅުން ވަރުގަދަކުރި ނަމަވެސް ރައީސް އިބްރާހިމް މުހައްމަދު ޞާލިހުގެ ސަރުކާރުން އެންމެ އިސްކަންދޭނީ އިންޑިއާއާ އެކު ގުޅުން ވަރުގަދަކުރުމަށް ކަމަށް ވެސް މިނިސްޓަރު ޝާހިދު ވަނީ ވިދާޅުވެފަ އެވެ.
އިންޑިއާ އާއި ރާއްޖެއާ ދެމެދު އެއްވެސް ނުތަނަވަސްކަމެއް އުފެދިފައިވާ ނަމަ މިސަރުކާރުން އެކަން ރަނގަޅު ކުރާނެ ކަމަށް ޓައިމްސް އޮފް އިންޑިއާގައި ވަނީ ބުނެފަ އެވެ. އެގޮތުން އިންޑިއާއިން ރާއްޖެއަށް ހަދިޔާކުރި ދެ ހެލިކޮޕްޓަރު އަނބުރާ ގެންދިއުމަށް ކުރީ ސަރުކާރުން އަންގާފައިވީ ނަމަވެސް އެތަކެތި އަނބުރާ ފޮނުވާނުލަން ރައީސް ޞޯލިހުގެ ސަރުކާރުން ނިންމާފައިވާ ކަމަށާއި ރާއްޖޭގައި އުޅޭ އިންޑިއާ ރައްޔިތުންގެ ވިސާގެ މައްސަލަ ސަރުކާރުން ހައްލުކޮށްދޭނެ ކަމަށް އެ ނޫހުން ރިޕޯޓުކޮށްފައިވެ އެވެ.
އިންޑިއާގެ ދެ ހެލިކޮޕްޓަރު ބެލެހެއްޓުމަށް 50 ވަރަކަށް އިންޑިއާ ސިފައިން ރާއްޖޭގައި ހަރަކާތްތެރިވާ ކަމަށް ރިޕޯޓްތައް ބުނެ އެވެ.