01 Dec 2018, 11:36
ރާއްޖޭގެ މާލީ ހާލަތު އޮތް ގޮތް ކޮންމެ ހަފްތާއަކު އެއްފަހަރު އާންމުކުރަން ސަރުކާރުން ނިންމައިފިއެވެ.
އަލިފުޅު ތުއްތު ފައުންޑޭޝަނުގެ ފަރާތުން ކ. ދިއްފުށީގައި ގާއިމުކުރި ފެނާއި ނަރުދަމާ ނިޒާމު އިފްތިތާހުކޮށްދެއްވުމުގެ ރަސްމިއްޔާތުގައި ވާހަކަ ދައްކަވަމުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވީ ރާއްޖޭގައި ކަންކަން ހިނގާފައިވާ ގޮތް އެމަނިކުފާނަށް މިހާރު ސާފުވަމުން އަންނަ ކަމަށެވެ.
"ސަރުކާރުގެ ވެރިންނާއި މުއައްސަސާތަކާ އަޅުގަނޑު މި ދަނީ ބައްދަލުކުރަމުން. ރާއްޖޭގެ މާލީ ހާލަތުވެސް ދެނެގަނެ، ބަދލަުކުރަންޖެހޭ ކަންކަން ގިނަކަން ވަނީ ފާހަގަކުރެވިފައި. ކޮރަޕްޝަނަށް ހުޅުވިފައިވާ ދޮރުތައް ބަންދުކޮށް، ލިބިފައިވާ ވަސީލަތްތަކާއި މުއްސަނދިކަން މުޖުތަމައުގެ ތަރައްގީއަށާއި ރައްޔިތުންގެ މަންފާއަށް ރަނގަޅުގޮތުގައި ބޭނުންކުރުމަކީ އެންމެ މުހިންމު ވާޖިބު،" ރައީސް ސޯލިހު ވިދާޅުވިއެވެ.
ރައީސް ވިދާޅުވީ ރާއްޖޭގެ މާލީ ހާލަތު އޮތް ގޮތް ސަރުކާރުން އާންމުކުރަން ނިންމާފައިވާ ކަމަށެވެ. އެގޮތުން ކޮންމެ ހަފްތާއަކު އެއްފަހަރު ފިނޭންސް މިނިސްޓްރީން އެ މައުލޫމާތު ހާމަކުރަމުން ގެންދާނެކަމަށް ރައީސް ސޯލިހު ވިދާޅުވިއެވެ.
"ކުރިއަށް އޮތް ހަފްތާއިން ފެށިގެން ކޮންމެ ހަފްތާއަކު އެއްފަހަރު ފިނޭންސް މިނިސްޓްރީން ރައްޔިތުންނަށް [އެކަން] ހާމަކުރަމުން ގެންދާނެ،" ރައީސް ވިދާޅުވިއެވެ.
އެމަނިކުފާނު ވިދާޅުވީ ސަރުކާރަށް ވީ ދެ ހަފްތާއެއްހާ ދުވަހުގެ ތެރޭގައި އެމަނިކުފާނު ވެވަޑައިގެންނެވި ބައެއް ވައުދުތައް ފުއްދުމުގެ މަސައްކަތް ފަށާފައިވާ ކަމަށެވެ. އަދި ވައްކަމާއި ކޮރަޕްޝަނާއި ގެއްލިފައިވާ ފައިސާ ހޯދުމަށް އެމަނިކުފާނު އުފެއްދެވި ކޮމިޝަނުގެ މަސައްކަތް ވަކިން ފާހަގަކުރެއްވިއެވެ.
މީގެ އިތުރުން ރައީސް ސޯލިހު ވިދާޅުވީ އެމަނިކުފާނު ވެރިކަމާ ހަވާލުވެވަޑއިގެންނެވި އިރު ރާއްޖޭގެ ފަޅުތަކާއި ރަށްތަކުގެ ތެރެއިން ކުއްޔަށް ދެވި ނުވަތަ ވިއްކާލެވިފައިވަނީ ކިތައް ރަށާއި ފަޅު ކަމެއް އޮތީ ނޭނގުމެއްގެ ތެރޭގައި ކަމަށެވެ.
އެހެން ނަމަވެސް ޓޫރިޒަމަށް ދޫކޮށްފައި ހުރި ރަށްރަށާއި ފަޅުފަޅާއި ބިންތަކުގެ މައުލޫމާތާއި އެ ތަންތަން ދޫކޮށްފައިވާ ފަރާތްތައް ހިމެނޭ ތަފްސީލުތައް މިދިޔަ ހަފްތާގައި ޓޫރިޒަމް މިނިސްޓްރީން ހާމަކޮށްފައިވާކަން ރައީސް ސޯލިހު ފާހަގަކުރެއްވިއެވެ.
"އިރާދަކުރެއްވިއްޔާ އަޅުގަނޑުމެންގެ ވެރިކަން ވެގެން ދާނީ ރައްޔިތުންނާ ކައިރިން، ރައްޔިތުންނަށް ހާމަކަން ބޮޑުކޮށް ކުރެވޭ ވެރިކަމަކަށް،" ރައީސް ސޯލިހު ވިދާޅުވިއެވެ.
ޓޫރިޒަމްގެ ގާނޫނަށް 2016 ވަނަ އަހަރު ގެނައި އިސްލާހަކާއެކު ރާއްޖޭގައި ޓޫރިޒަމަށް ދޫކުރާ ރަށްރަށާއި ފަޅުފަޅާއި ބިންތައް ދޫކުރަމުން އައީ އާންމުކޮށް ބިޑުކުރުމެއް ނެތިއެވެ. އެހެން ނަމަވެސް މި ސަރުކާރުން މިދިޔަ ހަފްތާ ތެރޭގައި ވަނީ އެގޮތަށް ރަށްރަށާއި ފަޅުފަޅާއި ބިން ދޫކުރުން ވަގުތީ ގޮތުން ހުއްޓާލައިފައެވެ.
އެކަން މަޑުޖައްސާލާފައި ވާއިރު، އެކަމަށް މަގުފަހިކުރުމަށް ޓޫރިޒަމް ގާނޫނަށް 2016 ވަނަ އަހަރު ގެނައި އިސްލާހު އުވާލުމަށް ރައްޔިތުންގެ މަޖިލީހަށް މިހާރު ވަނީ ހުށަހަޅަފައެވެ.