02 Dec 2018, 09:57
ވޮޝިންޓަން(ޑިސެމްބަރު 2): ސައުދީ އަރަބިއާ ނޫސްވެރިޔާ ޖަމާލް ހާޝުގްޖީ މަރާލުމުގެ ކުރިންނާއި ފަހުން، ވަލީއަހުދު މުހައްމަދު ބިން ސަލްމާން، އެ މަރާ ގުޅުން ހުރި މީހަކަށް 11 މެސެޖު ކުރެއްވި ކަމަށް ވޯލް ސްޓްރީޓް ޖާނަލްއިން ރިޕޯޓުކޮށްފިއެވެ.
ވޯލް ސްޓްރީޓް ޖާނަލްގައިވާ ގޮތުން އެނޫހަށް ވަނީ ސިއްރުކޮށްފައިވާ އިންޓެލިޖެންސް ފައިލެއްގައި ހިމެނޭ މައުލޫމާތު ލިބިފައެވެ. އޭގައިވާ ގޮތުން މިދިޔަ މަހުގެ ދެވަނަ ދުވަހު، ބިން ސަލްމާން ވަނީ އޭނާގެ އެންމެ ގާތް މުޝީރު ކަމަށްވާ ސައުދު އަލް ގަހުތާނީއާ ގިނަ އަދަދަކަށް ފޯނުން ވާހަކަ ދައްކަވާފައެވެ.
ނަމަވެސް އެމެސެޖުތަކުގައި ދައްކާފައިވާ ވާހަކަތަކެއް ނޭނގޭ ކަމަށް ވެސް ޖާނަލްއިން ބުންޏެވެ.
"(ނޫސްވެރިޔާ) މަރާލަން އަމުރު ކުރެއްވީ ވަލީއަހުދުކަން ހާމަވާ ސީދާ ހެއްކެއް ނެތް،" ސިއްރު ލިޔުންތަކުގައިވާ ކަމަށް ޖާނަލްގައިވެއެވެ.
ރިޕޯޓުތަކުގައިވާ ގޮތުން ގަހުތާނީ އަކީ ތުރުކީގައި ހުންނަ ސައުދީ ކޮންސިއުލޭޓު ތެރޭގައި ހާޝުގްޖީ މަރާލި 15 މީހުންގެ ޓީމު ސުޕަވައިޒް ކުރެއްވި ފަރާތެވެ. އަދި ހާޝުގްޖީ މަރާލި ދުވަހު އޭނާ ވަނީ އެޓީމުގެ ލީޑަރާ ވާހަކަ ދައްކަވާފައެވެ.
"މިއޮޕަރޭޝަން ކުރިއަށް ގެންދިޔައީ މުހައްމަދު ބިން ސަލްމާންގެ ހުއްދައާ ނުލައި ކަމަށްވުމަކީ ވަރަށް ނާދިރު ކަމެއް ކަމަށް އަޅުގަނޑުމެން ގަބޫލުކުރަން،" ސިއްރު ލިޔުންތަކުގައިވާ ކަމަށް ޖާނަލްއިން ރިޕޯޓު ކުރިއެވެ.
އެރިޕޯޓާ ބެހޭ ގޮތުން ވަކި އެއްޗެކޭ ބުނަން ސީއައިއޭއިން ވަނީ ދެކޮޅު ހަދާފައެވެ.
އަދި ސެކްރެޓަރީ އޮފް ސްޓޭޓް މައިކް ޕޮމްޕިއޯ ވަނީ ހާޝުގްޖީގެ މަރާ ބެހޭ ގޮތުން އެމެރިކާއަށް ލިބިފައިވާ ހުރިހާ ޖާސޫސީ މައުލޫމާތު ބެއްލެވި ކަމަށާއި، ހާޝުގްޖީގެ މަރާ ބިން ސަލްމާނާ ގުޅުން އޮތް ކަމުގެ ހެއްކެއް ނެތް ކަމަށް ވިދާޅުވެފައެވެ.