20 Dec 2018, 18:32
ދަނޑުވެރި ކަމަށް އެތެރެކުރާ ތަކެތިން ޑިއުޓީ ކަނޑާލަން ރައްޔިތުންގެ މަޖިލީހުން ފާސްކޮށްފައިވާ އިސްލާހުގެ ބިލް ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހު ތަސްދީގު ކުރައްވައިފި އެވެ.
ދިވެހިރާއްޖޭގެ އިމްޕޯޓް އެކްސްޕޯޓް ގާނޫނަށް އިސްލާހު ހުށަހެޅުއްވީ ސަރުކާރުގެ ފަރާތުން މަރަދޫ ދާއިރާގެ މެމްބަރު އިބްރާހިމް ޝަރީފު އެވެ. އެ ގާނޫނަށް ހުށަހެޅި އިސްލާހުގައި ބުނެފައިވަނީ ދަނޑުވެރިކަން ކުރުމަށް އެތެރެކުރާ އެންމެހާ ތަކެއްޗަކީ އިމްޕޯޓު ޑިއުޓީ ނަގަން ނުޖެހޭ އެއްޗިހީގެ ގޮތުގައި ހެދުމަށެވެ.
ދަނޑުވެރިކަމަށް އެތެރެ ކުރާ ތަކެތީން ނަގަމުން ދިޔައީ 10 ޕަސެންޓްގެ ޑިއުޓީއެކެވެ.
އެ އިސްލާހު މަޖިލީހުން ފާސްކޮށްފައި ވަނީ 56 މެމްބަރުންގެ ވޯޓުންނެވެ.
ދަނޑުވެރިކަމަށް އެތެރެކުރާ އެއްޗިހިން އިމްޕޯޓު ޑިއުޓީ ކަނޑާލުމަކީ ރައީސް އިބްރާހިމް މުހައްމަދު ސޯލިހުގެ އިންތިހާބީ ވައުދެކެވެ.
މީގެ ކުރިން އިމްޕޯޓް ޑިއުޓީ ނުނަގާ ތެކެތީގެ ތެރޭގައި ދަނޑުވެރި ކަމަށް އެތެރެކުރާ ތަކެތި ނުހިމެނެ އެވެ. އެހެންވެ އިމްޕޯޓް ޑިއުޓީ ދައްކަން ނުޖެހޭ ތަކެތީގެ ތެރެއަށް ދަނޑުވެރި ކަމަށް އެތެރެކުރާ ތަކެތި އިތުރު ކުރަން ވަނީ ހުށަހަޅައިފަ އެވެ.
މިހާރު އިމްޕޯޓް ޑިއުޓީ ނުނަގާ ތަކެތީގެ ތެރޭގައި ހަނޑޫ ހަކުރު ފުށާއި މުސްހަފާއި ގުރުއާނުގެ ވަކި ވަކިން ހުންނަ ބައިބައި ހިމެނެ އެވެ. އަދި ދަތުރުވެރިން ގެންނަ ތަކެތިން ޑިއުޓީ މާފު ކުރުމަށް ރައީސުލްޖުމްހޫރިއްޔާ ކަނޑައަޅާ އަދަދަކަށް ޑިއުޓީ ނުނަގާ ގޮތަށް ވަނީ ގާނޫނުގައި ލިޔެފަ އެވެ.