28 Dec 2018, 16:30

އާލާސްކަންފުޅާ އުޅުއްވުމަށްފަހު މިއަދު ހެނދުނު އަވަހާރަވި، ދިވެހި އަދަބިއްޔާތާއި ތާރީހު އިލްމުވެރިޔާ މުހައްމަދު ވަހީދު (ނަދުވީ)ގެ އާއިލާއަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ތައުޒިޔާ ވިދާޅުވެއްޖެއެވެ.

ދިވެހި އަދަބިއްޔާތާއި ދިވެހި ތާރީހުގެ އިލްމުވެރިޔާ މުހައްމަދު ވަހީދު ނަދުވީއަކީ އެކި ދާއިރާތަކުން ތައުލީމު ހާސިލުކުރެއްވި ބޭފުޅެކެވެ. އޭގެ ތެރޭގައި އިސްލާމީ އިލްމާއި، ޕޮލިޓިކަލް ސައިންސްގެ އިތުރުން އަދަބިއްޔާތު ހިމެނެއެވެ. އޭނާ އަދަބިއްޔާތުގެ ރޮނގުން މާސްޓާސްއަށް ކިޔަވާ ވިދާޅުވީ އިންޑިއާގެ އަލީގަޅު ޔުނިވާސިޓީންނެވެ.

އައިޖީއެމްއެޗުގައި ފަރުވާ ހޯއްދަވަމުން ގެންދަވަނިކޮށް ނަދުވީ އަވަހާރަވުމާ ގުޅިގެން ރައީސް އިބްރާހިމް މުހައްމަދު ސޯލިހު މިއަދު ކުރެއްވި ޓްވީޓެއްގައި ވިދާޅުވީ އޭނާއަކީ ރާއްޖޭގެ ތާރީހާއި އަދަބިއްޔާތަށް އަގުހުރި ހިދުމަތްތަކެއް ކޮށްދެއްވި ބޭފުޅެއް ކަމަށެވެ.

އަދި ނަދުވީ އަވަހާރަވި ޚަބަރު ލިބިވަޑައިގަތުމުން އެކަމުގެ ހިތާމައިގައި ބައިވެރިވެ، ނަދުވީގެ އާއިލާއަށް ތައުޒިޔާ ދަންނަވާކަމަށާއި، އޭނާގެ މައްޗަށް ރަހުމަތް ލެއްވުން އެދި ދުއާކުރާކަމަށް ރައީސް ސޯލިހު ވިދާޅުވިއެވެ.

ދިވެހިބަހުގެ އެކެޑެމީގެ ޑެޕިއުޓީ ޑިރެކްޓަރުގެ ގޮތުގައި ހުންނެވި ނަދުވީ ވަނީ ގައުމީ ޔުނިވާސިޓީގެ ޑިގްރީ ޕްރޮގްރާމުތަކުގައި ތާރީޚާއި އަދަބިއްޔާތުގެ މޮޑިއުލްތައް ކިޔަވައިދެއްވާފައެވެ.

އޭނާ މީގެ ކުރިން ވަނީ ފަތްތޫރައިގައި ތާރީހީ ލިޔުއްވުންތަކާއި އަދަބީ ފާޑުކިޔުއްވުމުގެ ސިލްސިލާ ލިޔުންތަކެއް ލިޔުއްވާފައެވެ. އެއީ ރާއްޖޭގައި މިހާތަނަށް އެންމެ ތަފްސީލުކޮށް ލިޔުއްވި އަދަބީ ފާޑުކިޔުންތަކެވެ.

މީގެ އިތުރުން ރާއްޖެ އިސްލާމްކޮށްދެއްވި ބޭފުޅަކީ ކޮބާކަމުގެ ބަހުސަށްވެސް މިހާތަނަށް އެންމެ ފުޅާކޮށް އިންސާފުކުރައްވައި ލިޔުއްވީ މުހައްމަދު ވަހީދު ނަދުވީއެވެ.

ނަދުވީގެ ދެ ބޭފުޅަކު ތިއްބަވައެވެ. އޭގެ ތެރެއިން އެއް ބޭފުޅަކީ އިސްލާމިކް ޔުނިވާސިޓީ އޮފް މޯލްޑިވްސް (އައިޔޫއެމް)ގެ ލެކްޗަރަރ އަދި ތާރީޚު ދިރާސާކުރައްވާ މ. ރީހުއްސަބާ އަހްމަދު އަލާ ދީދީއެވެ.

ނަދުވީގެ މައްޗަށް ކަށުނަމާދުކުރުން އޮންނާނީ މިރޭ އިޝާ ނަމާދަށްފަހު އިސްލާމީ މަރުކަޒުގެ މިސްކިތުގައެވެ.