01 Jan 2019, 01:48
ރައީސް އިބްރާހިމް މުހައްމަދު ސޯލިހް އަމީރު އަހްމަދު މަގު ހުޅުވައިދެއްވައިފިއެވެ.
އަމީރު އަހްމަދު މަގު ހުޅުއްވައި ދެއްވުމަށްފަހު، އެ މަގުން އެންމެ ފުރަތަމަ ދަތުރު ކުރެއްވީ ރައީސް ސޯލިހެވެ.
އަމީރު އަޙްމަދު މަގު ހުޅުވުމަށްފަހު، ނޫސްވެރިންނަށް މައުލޫމަތު ދެއްވަމުން މަލޭ ސިޓީގެ މޭޔަރު ސިފާ މުހައްމަދު ވިދާޅުވީ މަގު ހުޅުވާލިނަމަވެސް، މިސަރަހައްދަކީ އާއްމުން ހިތްހަމަޖައްސާލުމަށް ގިނައިން އެއްވެ އުޅޭ ސަރަހައްދަކަށްވާތީ މަގު ބޭނުންކުރާ ފަރާތްތަކަކުން އެކަމަށް ވަރަށް ބޮޑަށް ސަމާލުކަންދޭންޖެހޭކަމަށެވެ.
ޓްރާންސްޕޯޓް މިނިސްޓްރީގެ ޑެޕިއުޓީ ޑިރެކްޓާ ޖެނެރަލް މުހައްމަދު ރަފީއު ވިދާޅުވީ، ޓްރާންސްޕޯޓް މިނިސްޓްރީގެ ސިޔާސަތަކީ ދަތުރުފަތުރުގެ ނިޒާމު ލުއިފަސޭހަކޮށްދިނުންކަމަށާއި އެގޮތުން މަގުތަކުގެ ޓްރެފިކްގެ މައްސަލައަށް ލުޔެއް ގެނެވޭނީ ހެދިފައިވާ ޤަވައިދުތަކަށް ކޮންމެ ފަރުދެއްވެސް ބޯލަނބައިގެންކަމަށް އޭނާ ވިދާޅުވިއެވެ.
މި މަގު މިއަދު ހަވީރު އާންމު ދަތުރު ފަތުރަށް ހުޅުވާލުމަށް ފަހު، އެ ސަރައްދުގެ ޓްރެފިކް ފްލޯއަށް ވަނީ ބަދަލުތަކެއް ގެނެސްފައެވެ.
އެގޮތުން އެންމެ ކުރީންވެސް ޓްރެފިކް ފްލޯ ހަމަޖެހިަފއިވާ ގޮތަށް އަމީރު އަހްމަދު މަގު ޗާންދަނީ މަގު ގުޅިފައިވާ ހިސާބުން ހުޅަނގުން އިރަށް ދަތުރު ކުރެވޭ ގޮތަށް ވަނީ ޓްރެފިކް ފްލޯއަށް ބަދަލު ގެނެސްފައެވެ.
އަދި ޗާންދަނީ މަގު އޯކިޑްމަގު ގުޅޭ ހިސާބުން އެމްއެމްއޭ އާ ދިމާލުން އުތުރަށް މިހާރު ދަތުރެއް ނުކުރެވޭނެއެވެ. މިހާރު ހަމަޖެހިފައިވާ ގޮތުން ޗާންދަނީ މަގުން ވަދެވޭނީ ބޮޑުތަކުރުފާނު މަގުން ނެވެ.
އަމީރު މަގު މަގު ހުޅުވާޅުމާއެކު ޓްރެފިކް ފްލޯއަށް ގެނެވިފައިވާ ބަދަލުތައް -
މީގެ އިތުރުން ބަނޑޭރިކޮށި (ސިފައިންގެ) އިރުމަތީ މަގު އަދި ރައީސް އޮފީހުގެ ހުޅަނގު ގޯޅިން މީހާރު ދަތުރު ކުރެވޭނީ އިރަށެވެ.
ކުރީގެ ސަރުކާރުން އޮތީ އަމީރު އަހްމަދުމަގުގެ، ޗާނދަނީމަގާއި ޖުމްހޫރީ ހިނގުމާ ދެމެދު އޮތް ސަރަހައްދު އެއްގަމު އުޅަނދުތަކަށް ބަންދުކޮށްފަ އެވެ. އަދި އެ ދިމާލުން އިސްލާމީ މަރުކަޒު ކުރިމައްޗަށް އޮތް ސަރަހައްދުގައި ތަޅުން އަޅައި، ޓައިލްސް ޖަހައިފަ އެވެ.
ނަމަވެސް ރައީސް އިބްރާހިމް މުހައްމަދު ސޯލިހުގެ ސަރުކާރުގެ ފުރަތަމަ 100 ދުވަހުގެ ވައުދެއްގެ ގޮތުގައި، އަމީރު އަހްމަދުމަގުގައި ބަންދުކޮށްފައި އޮތް ސަރަހައްދު އެއްގަމު ދަތުރުފަތުރަށް އަލުން ހުޅުވާލުމަށް ހިމަނާފައިވެ އެވެ.