07 Jan 2019, 23:52
ރައީސުލް ޖުމްހޫރިއްޔާގެ ސެކިއުރިޓީ ބަލަހައްޓާ ޔުނިޓުގެ ކޮމާންޑަރަކަށް ފަޔާ އެންޑް ރެސްކިއު ސާވިސްގެ ކޮމާންޓަރަކަށް ހުންނެވި ކާނަލް އަބްދުﷲ ޒުހުރީ އައްޔަން ކުރައްވާފިއެވެ.
ނިމިދިޔަ ރައީސް ޔާމީންގެ ސަރުކާރުގައި އެ މަގާމުގައި ހުންނެވީ، ކާނަލް އިބްރާހިމް ރަޝީދެވެ.
އެމްއެންޑީއެފްގެ އިންފޮމޭޝަން އޮފިސަރު ކެޕްޓަން އިބްރާހިމް އާޒިމް މިރޭ "ސަން" އަށް ވިދާޅުވީ، ރައީސް ގެ ސެކުއިޓީ ޔުނިޓްގެ އެންމެ އިސްވެރިޔާއަކަށް ހުންނެވި ކާނަލް އިބްރާހިމް ރަޝީދު ސަދަން އޭރިއާގެ ކޮމާންޑަރަކަށް ބަދަލު ކުރުމަށްފަހު، އެ ސެކިއުރިޓީ ޔުނިޓްގެ އެންމެ އިސްވެރިޔާ އަށް ކާނަލް އަބްދުﷲ ޒުހުރީ މިއަދުން ފެށިގެން ބަދަލު ކުރައްވާފައިވާ ކަަމަށެވެ.
އޭނާ ވިދާޅުވީ، އެ ބަދަލާއެކު ސަދަން އޭރިއާގެ ކޮމާންޑަރަކަށް ހުންނެވި ކާނަލް އަބްދުﷲ އިބްރާހިމް ފަޔާ އެންޑް ރެސްކިއު ގެ ކޮމާންޑަރަކަށް މިހާރު ބަދަލު ކޮށްފައިވާ ކަމަށެވެ.
އެންމެ ފުރަތަމަ ރައީސުލްޖުމްހޫރިއްޔާގެ ސެކުއުރިޓީ ބަލަހަށްޓަމުން އައީ ސްޕެޝަލް ޕްރޮޓެކްޝަން ގްރޫޕު (އެސްޕީޖީ) އިންނެވެ. ނަމަވެސް ރިޔާސީ ލޯންޗުކޮޅު "ފިނިފެންމާ" ގައި 2015 ވަނަ އަހަރު ބޮން ގޮއްވާލި ހާދިސާއަށް ފަހު، އެމްއެންޑީއެފް އިން ވަނީ ރައީސްގެ ސެކުއިރިޓީ ބެލެހެއްޓުމަށް ވަކި ޔުނިޓެއް އުފައްދަވާފައެވެ.