12 Jan 2019, 17:55
އުއްމީދަކީ އެމެރިކާ މީހުންވެސް ކިޔަވަން ރާއްޖެއައުން ކަމަށް އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެއެވެ.
މަންދު ކޮލެޖުން މިއަދު ފެށި ކެރިއާ ގައިޑަންސް ޕްރޮގްރާމްގެ ރަސްމިއްޔާތުގައި ވާހަކަ ދައްކަވަމުން ފައްޔާޒް ވިދާޅުވީ ތައުލީމީ ދާއިރާގައި ވިޔަފާރިއަކީ އޭނާގެ މިނިސްޓްރީން ވަރަށް ހާއްސަ އިސްކަމެއް ދޭ ދާއިރާއެއް ކަމަށެވެ.
"އަޅުގަނޑުމެންގެ އުއްމީދަކީ ދިވެހިރާއްޖެއަށް އެމެރިކާއިންވެސް މީހުން ކިޔަވަން އައުން ކޮންމެވެސް ދުވަހަކުން. އެއީ ނުކުރެވޭނެ ކަމެއް ކަމަށް ގަބޫލެއް ނުކުރަން. ހާއްސަކޮށް ކަނޑުފަޅުތަކުގައި އެ މުއްސަނދިކަމަކީ އޭގެ ޒާތުގައި އޭގެ މެރިން ބަޔޮލޮޖީ މިގޮތަށް ގޮސް މިތަނުގައި އެ ފަންނުކުރިއަރުވައި ކިޔެވުމުގެ ފުރުސަތު ގާއިމްކުރެވޭނެ ކަންކަން." ފައްޔާޒް ވިދާޅުވިއެވެ.
މިނިސްޓަރު ވިދާޅުވީ އެޑިއުކޭޝަން ދާއިރާގައި މަދުން ނަމަވެސް ވަރަށް ހުނަރުވެރި ބޭފުޅުން އުޅޭ ކަމަށާއި އެެހެން ނަމަވެސް އެ ދާއިރާއަކީވެސް އިގްތިސާދީ ގޮތުން ވަރަށް ބޮޑު ފައިދާއެެއް ނެރެވިދާނެ ކަމަށެވެ.
"އަޅުގަނޑުމެން އައިޑެންޓިފައި ކުރީ ދާއިރާތަކުން ޕްރައިވެޓް ކޮލެޖްތަކުގެ ހަޔާ އެޑިއުކޭޝަންއާ ޓެކްނިކަލް ދާއިރާގެ އެތައް ބައިވަރު ދާއިރާއެއްގެ އެތައް ބައިވަރު ތަމްރީން ލިބިގެން އިންޑަސްޓްރީއަށް ނެެރެން ބޭނުންވާ ދާއިރާތަކެެއް އެބަހުރި،" ފައްޔާޒް ވިދާޅުވިއެވެ.
ރައީސް އިބްރާހިމް މުހައްމަދު ސޯލިހު ވެރިކަމާ ހަވާލުވެވަޑައިގަތުމަށްފަހު، ތައުލީމީ ދާއިރާ ހިންގަމުންދަނީ ދެ މިނިސްޓްރީއަކަަށް ބަހާލައިގެންނެވެ. އެގޮތުން މަތީ ތައުލީމަށް ހާއްސަކޮށް މިނިސްޓްރީ އޮފް ހަޔާ އެޑިއުކޭޝަންގެ ނަމުގައި އާ މިނިސްޓްރީއެއް ވެސް ވަނީ އުފައްދައިފައެވެ. އަދި ގްރޭޑް 12 އިން ދަށުގެ ދަރިވަރުންގެ މަސައްކަތްތައް ކުރަމުންގެންދަނީ މިނިސްޓްރީ އޮފް އެޑިއުކޭޝަންގެ ދަށުންނެވެ.
މަތީ ތައުލީމު ފުޅާކުރުމުގެ ގޮތުން ހަޔާ އެޑިއުކޭޝަން މިނިސްޓްރީން ވަނީ ރާއްޖޭގައި ހިލޭ މަތީ ތައުލީމު ލިބޭނެގޮތުން ހަދަައިފައެވެ.