21 Jan 2019, 09:47
ޓެލްއަވީވް (ޖަނަވަރީ 21) : ސޫރިޔާގައިވާ އީރާނުގެ އަސްކަރީ އަމާޒުތަކަށް ރޭފަތިހު ވައިގެ ޙަމަލާތަކެއް ދިން ކަމަށް އިސްރާއީލުން ބުނެފިއެވެ.
އިސްރާއީލު ސިފައިންގެ ތަރްޖަމާން އެފިޚާއި އަދްރައީ ވިދާޅުވީ އިސްރާއީލުން ހަމަލާދިނީ ސޫރިޔާގައި މަރުކަޒުކޮށްގެން ތިބޭ އީރާނުގެ ރިވޮލިއުޝަރަނީ ގާޑުންގެ ތެރޭގައި ހިމެނޭ ގުދްސު ލަޝްކަރުގެ އަމާޒުތަކަށް ކަމުގައެވެ. ނަމަވެސް އެއީ ކޮންތަނެއްގައި ހުރި ކޮންބާވަތެއްގެ އަމާޒެއްކަމާއި އެހަމަލާތަކާބެހޭ އެއްވެސް ތަފްސީލެއް އިސްރާއީލުން ދީފައެއް ނުވެއެވެ. އެހަމަލާގެ ރައްދުގައި އިސްރާއީލަށް އެއްވެސް ހަމަލާއެއް ނުދިނުމަށްވެސް އިސްރާއީލުގެ އަސްކަރީ ތަރްޖަމާން ސޫރިޔާއަށް އިންޒާރު ކުރިއެވެ.
ސޫރިޔާއިން ވަނީ ރޭފަތިހު އިސްރާއީލުން ފޮނުވާލި ރޮކެޓްތަކެއް ވައްޓާލިކަމާ އިސްރާއީލުގެ ރޮކެޓްތައް އަމާޒަށް ވާސިލްނުވާ ކަމަށް ބުނެފައެވެ. އަދި ސޫރިޔާގެ ޓީވީންވަނީ އިސްރާއީލުގެ ރޮކެޓްތައް ވައްޓާލި މަންޒަރުވެސް ދައްކާފައެވެ. މިއީ ފާއިތުވި ސައުވިސް ގަޑީއިރު ތެރޭގައި އިސްރާއީލުން ސޫރިޔާއަށް ދިން ދެވަނަ އުދުވާނީ ހަމަލާއެވެ.
އިއްޔެވެސް ސޫރިޔާއިންވަނީ ސޫރިޔާގެ ދެކުނުގެ ސަރަހައްދަށް އިސްރާއީލުން ދިން އުދުވާނަކާ ދެކޮޅަށް އެގައުމުގެ ވައިގެ ދިފާއީ ބާރުތަކުން ހަރަކާތްތެރިވި ކަމަށް ބުނެފައެވެ. ސޫރިޔާގެ ރަސްމީ ނޫސްއެޖެންސީ ބުނެފައިވަނީ އިސްރާއީލުގެ އުދުވާނަކާ ދެކޮޅަށް ސޫރިޔާގެ ވައިގެ ދިފާއީ ބާރުތަކުން ހަރަކާތްތެރިވުމުން އެއުދުވާން ނާކާމިޔާބުވެފައިވާ ކަމުގައެވެ.
ސޫރިޔާގެ މުސްތަގިއްލު ޖަމާއަތެއް ކަމަށްވާ ސީރިޔަން އޮބަޒަވޭޓްރީ ފޯ ހިޔުމަން ރައިޓްސްއިން ވެސްވަނީ އިސްރާއީލުން ސޫރިޔާގެ ދެކުނުގެ ސަރަހައްދަށް އިއްޔެ ހަމަލާތަކެއް ދިން ކަމަށާއި އެޙަމަލާތަކަށް ސޫރިޔާއިން ރައްދު ދިންކަމަށް ބުނެފައެވެ.
އިސްރާއީލުގެ އުދުވާން އިއްޔެ އަމާޒުކުރީ އެގައުމުގެ ދެކުނުގެ ކިސްވާ ސަރަހައްދަށް ކަމަށާ އެއީ ސޫރިޔާގައި ހަރަކާތްތެރިވާ ލުބްނާނުގެ ހިޒްބުﷲ ޖަމާއަތާއި އީރާން ސިފައިންނަށް ބޭނުންވާ ހަތިޔާރު ގުދަންތަކެއް ހުންނަ ސަރަހައްދެއް ކަމަށް ސީރިޔަން އޮބަޒަވޭޓްރީ ފޯ ހިޔުމަން ރައިޓްސް އިން ބުނެފައިވެއެވެ. ނަމަވެސް އިސްރާއީލުގެ ވައިގެ ހަމަލާތައް އެއިން ގުދަނަކަށް އެރިކަން ސާފުވެފައިނުވާކަމަށް އެޖަމާއަތުން ބުނެއެވެ.
އިސްރާއީލުން ސޫރިޔާއަށް ދޭ އުދުވާނީ ހަމަލާތައް އާދަޔާ ޚިލާފަށް ގިނަވެފައިވީނަމަވެސް އދ. އާއި ބައިނަލްއަގްވާމީ މުޖްތަމައުން އިސްރާއީލުގެ މިއުދާވާން ކުށްވެރި އެއް ނުކުރެއެވެ.
މިމައްސަލާގައި ސޫރިޔާއިންވަނީ ކަންބޮޑުވާކަން ހާމަކޮށް އދ. އަށް ޝަކުވާވެސް ހުށަހަޅާފައެވެ. އަދި އިސްރާއީލުގެ އެކިކަންކޮޅުތަކަށް ރައްދު ހަމަލާދިނުމުގެ ހައްގު އޮންނާނެ ކަމަށްވެސް ސޫރިޔާއިން ބުނެފައިވެއެވެ.
ސޫރިޔާއަކީ ދާޚިލީ ހަނގުރާމަ ހިނގަމުންދާތާ 8 އަހަރުވެ މުޅިން ހަލާކުވެ ވީރާނާވެ ރައްޔިތުން ހާލުގައި ޖެހިފައިވާ ގައުމެކެވެ. އިސްރާއީލުން ސޫރިޔާއަށް ހަމަލާދޭން ފަށާފައިމިވަނީ ސޫރިޔާގެ މިހާލަތުގެ އެޑްވާންޓޭޖް ނަގައިގެން ކަމަށް އެގައުމުގެ މިޑީޔާއިން ބުނެއެވެ. (ނޫސްއެޖެންސީތައް)