01 Feb 2019, 22:59
ރައްޔިތުންގެ މަޖިލީހުގައި އެންމެ މުހިންމު ދައުރެއް އަދާކުރެވޭނީ އެމްޑީޕީއަށް ކަމަށް ރައީސް އިބްރާޙިމް މުހައްމަދު ސޯލިހު ވިދާޅުވެއްޖެ އެވެ.
އެޖެންޑާ 19 އެމްޑީޕީ މަޖިލިސް ކެމްޕެއިން ލޯންޗް ކުރުމަށް މިރޭ ކާނިވާ ސަރަހައްދުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ އެމަނިކުފާނު ރައްޔިތުންނަށް ވީ ވައުދުތައް ފުއްދުމަށް ރައްޔިތުންގެ މަޖިލީހުގައި ސަރުކާރުގެ މެޖޯރިޓީ އޮތުން މުހިންމު ކަމަށެވެ. އަދި އެކަމުގައި އެންމެ މުހިންމު ދައުރެއް އަދާކުރެވޭނީ އެމްޑީޕީއަށް ކަމަށް ރައީސް ސޯލިހު ވިދާޅުވި އެވެ.
" އަޅުގަނޑުމެން ވީ ވައުދުތައް އެންމެ ފުރިހަމަ ގޮތުގައި ފުއްދައި ދެވޭނީ މަޖިލީހުގެ ތާއީދާ އެކު. ސަރުކާރުގެ މެޖޯރިޓީ ރައްޔިތުންގެ މަޖިލީހުގައި އޮތުމަކީ ވަރަށް މުހިންމު ކަމެއް. އަދި އެ މަޖިލީހުގައި އެންމެ މުހިންމު ދައުރެއް އަދާކުރެވޭނީ މި އެމްޑީޕީއަށް." މިހާރު އެމްޑީޕީގެ އެންމެ އިސް މަގާމުގައިވެސް ހުންނެވި ރައީސް އިބްރާހިމް މުހައްމަދި ސޯލިހު ވިދާޅުވި އެވެ.
ރައީސް ސޯލިހު ވިދާޅުވީ ސަރުކާރުގެ މެނިފެސްޓޯ ތަމްސީލު ކުރުމުގައި އެމްޑީޕީގެ އެއްބާރުލުން ބޭނުންވާކަން ރައީސް ސޯލިހު ފާހަގަ ކުރެއްވި އެވެ. އަދި ވިދާޅުވީ އެމަނިކުފާނާ އެމްޑީޕީއާ މެދު އޮތީ "ހިތާއި ހިތުގެ ގުޅުމެއް" ކަމަށެވެ.
އެޖެންޑާ 19 އެމްޑީޕީ މަޖިލިސް ކެމްޕެއިން ލޯންޗް ކުރުމަށް މިރޭ ކާނިވާ ސަރަހައްދުގައި ބޭއްވި ޖަލްސާގެ ތެރެއިން --- ސަންފޮޓޯ/ ފަޔާޒު މޫސާ
ރައްޔިތުންގެ މަޖިލީހުގެ މެމްބަރެއްގެ ގޮތުގައި 25 އަހަރު ހޭދަ ކުރެއްވި ރައީސް ސޯލިހު ވިދާޅުވީ މަޖިލީހުގެ ގޮނޑި ކާމިޔާބު ކުރުމަށްޓަކައި ކުރަން ޖެހޭނީ ދެކަމެއް ކަމަށެވެ. އެއީ ރައްޔިތުން ކައިރިއަށް ގޮސް ރައްޔިތުން ބޭނުންވާ ކަންކަން އޮޅުން ފިލުވުމާއި ފުއްދޭނެ ވައުދުތަކެއް ރައްޔިތުންނަށް ވުން ކަމަށެވެ. މަޖިލީހަށް އިންތިހާބު ވުމައްޓަކައި ތެދު ބަހުން ވާހަކަދައްކަން ޖެހޭ ކަމަށް ރައީސް ސޯލިހު ވިދާޅުވި އެވެ.
" ރައްޔިތުންގެ މަޖިލީހަކީ ދިވެހިރާއްޖެ ގައުމީ މަސްލަހަތާއި ތަރައްގީ ބުނާ ކުރާ ތަނބު. އެ މުއައްސަސާއަކީ ދިވެހި ދައުލަތުގެ މައި ބަދަ. އެހެންކަމުން އެމްޑީޕީގެ ޓިކެޓް ކާމިޔާބު ކުރެއްވި ހުރިހާ ފަރާތްތަކުންވެސް ތިބޭފުޅުން ކުރަން ނުކުމެ ތިބި މަސައްކަތް ދެނެތިބެ ހިތްވަރު ކުރުމަށް އަޅުގަނޑު އިލްތިމާސް ކުރަން." ރައީސް އިބްރާހިމް މުހައްމަދު ސޯލިހު ވިދާޅުވި އެވެ.
ރައީސް ސޯލިހު ވިދާޅުވީ އެމަނިކުފާނު މަޖިލީހުގައި ހޭދަ ކުރި 25 އަހަރު ތަފާތު ތަޖުރިބާ ކުރެއްވި ކަމަށެވެ. ހަލަބޮލިކަމާއި ކަނބޮޑުވުމާއި އެތައް ކަމެއް އެމަނިކުފާނު ދެކެވަޑައިގެންނެވި ކަމަށް ވިދާޅުވި އެވެ. އަދި އުންމީދީ އެތައް ކަމެއް ދެކެވަޑައިގެންނެވި ކަމަށްވެސް ވިދާޅުވި އެވެ.
އެމްޑީޕީ ޓިކެޓްގައި މަޖިލީހަށް ވާދަ ކުރައްވާ ކެންޑިޑޭޓުން ވިސްނަންވީ ކިލަނބުކަމެއް ނެތި އެބޭފުޅުންގެ ބަރުލަމާނީ ހަޔާތް ނިންމާލުމަށް ކަމަށް ރައީސް ސޯލިހު ވިދާޅުވި އެވެ. އަދި ރައްޔިތުންނަށް ހައްގުވާ މިންވަރު ހޯދައިދިނުމަށް އެންމެ ކުރީ ސަފުގައި އެމްޑީޕީ މެމްބަރުން ތިއްބެވުމަށް ރައީސް ސޯލިހު އެދިލެއްވި އެވެ.
ރައީސް ސޯލިހު ވިދާޅުވީ އެމަނިކުފާނު އެމްޑީޕީގެ މެމްބަރަކަށް ވެވަޑައިގެންނެވީތީ ފަހުރުވެރިވެ ވަޑައިގަންނަވާ ކަމަށެވެ. އަދި ރައްޔިތުންގެ މަޖިލީހުގެ އިންތިހާބަށް ކެންޑިޑޭޓުން ކަނޑައެޅުމަށް އެމްޑީޕީން ޕްރައިމެރީ ބޭއްވި ވަގުތަކީ ވަރަށް ފަހުރުވެރިވި ވަގުތެއް ކަމަށް ވިދާޅުވި އެވެ.
އެޖެންޑާ 19 އެމްޑީޕީ މަޖިލިސް ކެމްޕެއިން ލޯންޗް ކުރުމަށް މިރޭ ކާނިވާ ސަރަހައްދުގައި ބޭއްވި ޖަލްސާގެ ތެރެއިން --- ސަންފޮޓޯ/ ފަޔާޒު މޫސާ
ރައީސް ސޯލިހު ވިދާޅުވީ އެމްޑީޕީގެ ޕްރައިމެރީގައި ވާދަކުރެއްވި 297 ކެންޑިޑޭޓުންނަކީ ސިޔާސީ ލީޑަރުން ކަމަށެވެ. އަދި ސިޔާސީ ލީޑަރުންގެ ޒުވާން ޖީލެއް އޮތްކަން އެމްޑީޕީން ސާބިތުކޮށްދީފައިވާ ކަމަށް ރައީސް ސޯލިހު ވިދާޅުވި އެވެ.
" އިންތިހާބަކީ ޑިމޮކްރެސީއެއްގެ އެންމެ މުހިންމު އެއް ވަސީލަތް. އެއީ ރައްޔިތުންގެ ސީދާ ބައިވެރިވުން ކަށަވަރުކޮށްދޭ ވަސީލަތް." ރައީސް ސޯލިހު ވިދާޅުވި އެވެ.
ރައީސް ސޯލިހު ވިދާޅުވީ ހަލަބޮލިކަމާއި ނާމާން ކަމުގެ ތެރެއިން އެމްޑީޕީގެ އަޒުމަށް ހިތްވަރަށް ބަދަލެއް ނާންނަ ކަމަށެވެ. އަދި ފާއިތުވި އަހަރުތަކުގައި އެމްޑީޕީން އެކަން ސާބިތުކޮށްދީފައިވާ ކަމަށް ރައީސް ސޯލިހު ވިދާޅުވި އެވެ.
" ރައްޔިތުންނަށް ހައްގު މިންވަރު ހޯދައިދިނުމަށް އެންމެ ފިޔަވަޅެއްވެސް ފަހަތަށް ނުޖެހި ތިޔަ ކުރައްވާ މަސައްކަތަށް އައްސަރިބަހާއި ސާބަސް ދަންނަވަން." ރައީސް ސޯލިހު ވިދާޅުވި އެވެ.
މިރޭގެ ޖަލްސާގައި އެމްޑީޕީގެ މަޖިލިސް އިންތިހާބުގެ ކެމްޕެއިން ވަނީ ލޯންޗްކޮށްފަ އެވެ.