15 Feb 2019, 10:23
'މަނީކަރްނިކާ: ދަ ކުއީން އޮފް ޖާންސީ'ގެ ކާމިޔާބަށް ފަހު، ބަތަލާ ކަންގަނާ ރަނައުތު އޭނާގެ އަމިއްލަ ބަޔޮޕިކްގެ މަސައްކަތް ކުރަން ފަށައިފައިވާ ކަމަށް ބުނެފިއެވެ.
'މަނީކަރްނިކާ' އަކީ ކަންގަނާގެ ފުރަތަމަ ޑައިރެކްޝަނެވެ. އޭނާގެ ބަޔޮޕިކް ވެސް ޑައިރެކްތު ކުރާނީ އޭނާ އަމިއްލައަށެވެ. ޚަބަރުތައް ބުނާގޮތުން ފިލްމުގެ ސްކްރިޕްޓު ލިޔާނީ 'ބާހޫބަލީ' އަދި 'މަނީކަރްނިކާ'ގެ ސްކްރިޕްޓް ވެސް ލިޔުނު ކޭވީ ވިޖެޔެންދުރާ އެވެ.
ފިލްމާ ގުޅޭގޮތުން ކަންގަނާ ބުނީ އެއީ ޕްރޮޕަގެންޑާ ފިލްމެއް ނޫން ކަމަށާއި، އެއީ އޭނާގެ ހަޔާތުގެ ހަގީގީ ހާދިސާތައް ހިމަނައިގެން އުފައްދާ ފިލްމެއް ކަމަށެވެ. ފިލްމުގައި އޭނާ މިހާރު ހުރި ހިސާބަށް އައުމަށް ކުރި ދަތުރާއި، ލިބުނު ކާމިޔާބީ ތަކާއި ދަތިތައް ވެސް ހިމަނާނެ ކަމަށް ކަންގަނާ ބުންޏެވެ.
ކަންގަނާ ބުނީ އަމިއްލަ ހަޔާތުގެ މައްޗަށް ފިލްމެއް އުފައްދަން ފުރަތަމަ ޖެހިލުންވި ކަމަށާއި، ނަމަވެސް ފިލްމުގެ މަސައްކަތް ކުރަން ނިންމީ ކޭވީ ވިޖެޔެންދުރާއަށް ކުރާ އިތުބާރެއްގެ ބޮޑުކަމުން ކަމަށެވެ.
"އެއީ ފަރުބަދަމަތީ ހިސާބަކުން ބޮލީވުޑަށް އައިސް، އެއްވެސް ކަހަލަ އާއިލީ ގުޅުމެއް ހުރި މީހަކު ނުވަތަ ދަންނަ މީހަކު ވެސް ނެތް ތަނެއްގައި އަމިއްލައަށް ފައިތިލި ސާބިތުކުރި އަންހެން ކުއްޖެއްގެ ވާހަކަ ފެނިގެންދާނެ ފިލްމެއް،" ކަންގަނާ ބުންޏެވެ.
އެ ފިލްމު އަދި އޮތީ ސްކްރިޕްޓު ލިޔުމުގެ މަރުހަލާގައެވެ. ނަމަވެސް ވަރަށް އަވަހަށް ކާސްޓް ފައިނަލްކޮށް މި އަހަރުގެ އޮކްޓޫބަރު-ނޮވެމްބަރު ހިސާބުގައި ފިލްމުގެ ޝޫޓިން ފަށަން ވަނީ ނިންމައިފައެވެ.
'ގޭންގްސްޓާ'، 'ފެޝަން'، 'ތަންނޫ ވެޑްސް މަންނޫ'، އަދި 'ކުއީން' ފަދަ މޮޅު ފިލްމުތަކުން ކަންގަނާ ފެނިގެން ގޮސްފައި ވާއިރު އޭނާއަށް ތިން ފަހަރެއްގެ މަތިން ގައުމީ އެވޯޑު ވެސް ވަނީ ލިބިގެން ގޮސްފައެވެ.
ކަންގަނާ އެންމެ ފަހުން ފެނިގެން ގޮސްފައި ވަނީ މިހާރު ވެސް ސިނަމާތަކުގައި ދައްކަމުން އަންނަ 'މަނީކަރްނިކާ' އިންނެވެ. ފިލްމަށް ބޮޑު ތަރުހީބެއް ލިބެމުން އަންނަ އިރު، ކަންގަނާގެ އިތުރު ދެ ފިލްމެއް ވެސް ވަރަށް އަވަހަށް ބެލުންތެރިންނާ ހަމައަށް އަންނާނެއެވެ. އެއީ އެކްތާ ކަޕޫރުގެ 'މެންޓަލް ހޭ ކިޔާ' އަދި ފޮކްސް ސްޓާ ސްޓޫޑިއޯޒްގެ 'ޕަންގާ' އެވެ.