21 Feb 2019, 21:54
ބެއިޖިންގް (ފެބްރުއަރީ 21): ޗައިނާއިން އީރާނާއެކު ބާއްވަނީ މުހިއްމު ގުޅުންތަކެއް ކަމަށާއި އެގުޅުންތައް ދަމަހައްޓައި އިތުރަށް ބަދަހިކުރާނެ ކަމަށް ޗައިނާއިން ބުނެފިއެވެ.
ޗައިނާގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައިވަނީ ބެއިޖިންގް އަށް ވަޑައިގެން އުޅުއްވާ އީރާނުގެ މަތީ ފެންވަރުގެ ވަފްދަކާ ރައީސް ޝީޖިންޕިން ބައްދަލުކުރައްވައި ދެގައުމުގެ ގުޅުންތައް އިތުރަށް ތަރައްގީ ކުރުމާބެހޭގޮތުން ބުދަ ދުވަހު މަޝްވަރާ ކުރައްވާފައިވާ ކަމުގައެވެ.
މިގޮތުން ދުނިޔޭގެ ބައެއް ގައުމުތަކުން އީރާނާދެކޮޅަށް ގެންގުޅޭ ހަރުކަށި ސިޔާސަތުތަކަށް ނުބަލައި ޗައިނާއިން އީރާނާއެކު ގުޅުންތައް ބަދަހިކުރާނެ ކަމުގެ ޔަގީންކަން ޝީ ދެއްވިއެވެ. އަދި ޗައިނާއާއި އީރާނުގެ ގުޅުންތަކަކީ ވަރަށް ޒަމާންވީ އިތުރުބާރު ލިބިފައިވާ ގުޅުންތަކެއް ކަމަށާ ދެގައުމަށް ކުރިމަތިވި ގޮންޖެހުންތަކުން އެގުޅުންތަކަށް ބުރުލެއް އަރާފައި ނުވާކަން ރައީސް ޝީޖިންޕިން އީޜާނުގެ ވަފްދުގެ ކަށަވަރުކޮށްދެއްވިކަމަށް ޗައިނާގެ ޚާރިޖިއްޔާގެ ބަޔާން ބުނެއެވެ.
އީރާނުގެ ވިޔަފާރީގެ މައި ބައިވެރިއަކީ ޗައިނާއެވެ. އަދި ޗައިނާއަށް ބޭނުންވާ ތެލުގެ ހަތަރުބައިކުޅަ އެއްބައި ފޯރުކޮށްދެނީ އީރާނުންނެވެ.
ޗައިނާއަށް ވަޑައިގެން އުޅުއްވާ އީރާނުގެ ވަފްދުގައި އީޜާނުގެ ތެލާބެހޭ ވަޒީރު ބެއިގިން ޒެންގަނާ އާއި ޚާރިޖީ ވަޒީރު މުހައްމަދު ޖަވާދު ޒަރީފް އާއި ޕާލަމެންޓްގެ ރައީސް އަލީ ލާރިޖާނީ ހިމެނިވަޑައިގަންނަވައެވެ. އީރާނާއެކު ޚާއްސަގުޅުންތަކެއް ބާއްވާނެކަމާއި ބައެއް ގައުމުތަކުން އީރާނާދެކޮޅަށް ގެންގުޅޭ ހަރުކަށި ސިޔާސަތުތަކަށް ނުބަލައި ޗައިނާއިން އީރާނާއެކު ގުޅުންތައް ބަދަހިކުރާނެކަން ޗައިނާގެ ރައީސް ވިދާޅުވެފައި މިވަނީ ސައޫދީ ވަލީއުލްއަހްދު މުހައްމަދު ބިން ސަލްމާން ޗައިނާއަށް ވަޑައިގަތުމުގެ ތަންކޮޅެއް ކުރިންނެވެ.
ސައޫދީ އަކީ އީރާނާ ގުޅުންތައް ކަނޑާލައި އެމެރިކާއާ ގުޅިގެން އީރާން ބަލިކަށިކޮށް އިނދަ ޖައްސާލުމަށް މަސައްކަތްކުރާ ގައުމެކެވެ. އީރާން އިނދަޖައްސައި އީރާނަށް ބިރު ދެއްކުމުގައި މުސްލިމުންގެ ދުޝްމަން އިސްރާއީލާ ސިއްރިޔާތުގައި ގުޅިގެން މަސައްކަތްކުރާ ކަމުގެ ތުހުމަތުވެސް ވަނީ ސައޫދީ ގެ މައްޗަށް ކުރެވިފައެވެ. އެހެންކަމުން ޗައިނާގެ މި މެސެޖަކީ ނުސީދާ ގޮތެއްގައި ސައޫދީ އަށް ދިން މެސެޖެއްކަމަށް ބައެއް މުރާސިލުން ވަނީ ސިފަކޮށްފައެވެ.
ސައޫދީ ވަލީއުލްއަހްދު މުހައްމަދު ބިން ސަލްމާން ބުރާސްފަތި ދުވަހު ޗައިނާއަށް ވަޑައިގެންފައިވަނީ ޕާކިސްތާނަށާއި އިންޑިޔާއަށް ކުރެއްވި ދަތުރުފުޅު ނިންމަވާލެއްވުމަށްފަހުގައެވެ. ބިން ސަލްމާން ޕާކިސްތާނަށް ކުރެއްވި ދަތުރުފުޅުގައި ސައޫދީން ވަނީ އެގައުމުގައި 20 ބިލިޔަން ޑޮލަރުގެ އިންވެސްޓްމަންޓް ކުރުމަށް އެއްބަސްވެފައެވެ. ޕާކިސްތާނަށްފަހު ބިން ސަލްމާން އިންޑިޔާއަށް ކުރެއްވި ދަތުރުފުޅުގައި އިންޑިޔާގައި 100 ބިލިޔަން ޑޮލަރު އިންވެސްޓް ކުރާނެކަމުގެ ޔަގީންކަން ބިންސަލްމާން ދެއްވި ކަމަށް ރިޕޯޓްތައް ބުނެއެވެ.
ތުރުކީގެ އިސްތަންބޫލްގައި ހުންނަ ސައޫދީ ކޮންސިއުލޭޓްގައި ސައޫދީ ނޫސްވެރިޔާ ޖަމާލް އަލްޚާޝުގްޖީ މިދިޔަ އޮކްޓޯބަރުމަހު ވަރަށް އަނިޔާވެރި ގޮތަކަށް އަވަހާރަކޮށްލި ކަމުގެ ތުހުމަތު ތުރުކީވިލާތުން ސީދާ ގޮތެއްގައި ކުރަނީ ސައޫދީ ސަރުކާރު ގެ މައްޗަށެވެ. ނުސީދާކޮށް ބިން ސަލްމާންގެ މައްޗަށެވެ. މި ތުހުމަތުތަކާ ގުޅިގެން ބިންސަލްމާން ދުނިޔޭގައި އެކަހެރިވެގެން ދިޔުމާއެކު އެކަމުގެ ހުތުރުނަން ސައޫދީ ސަރުކާރަށް ލިބިގެންދިޔަނަމަވެސް މިހާރު މި ފިއްތުންތައް ވަނީ ކޮންމެވެސް ވަރަކަށް ކުޑަވާން ފަށާފައެވެ.
މިމައްސަލާގައި އެމެރިކާގެ ޖާސޫސީ އިދާރާއާއި ކޮންގްރެސްއިން ސައޫދީ އާ އާދެކޮޅަށް ފިއްތުންތައް ކުރިމަތިކުރި ނަމަވެސް އެމެރިކާ ސަރުކާރާއި އެމެރިކާގެ ކަންކަމަށް ބާރާއި ނުފޫޒު ހިންގާ ޔާހޫދީ އިސްރާއީލު ގެންދަނީ ސައޫދީގެ ދިފާއުގައި މަސައްކަތް ކުރަމުންނެވެ. (ނޫސްއެޖެންސީތައް)