21 Feb 2019, 23:16
ދައުލަތުގެ ވުޒާރާތަކާއި އޮފީސްތަކަށް ދިވެހިބަހުން ނަން ކިޔުމަށް ދިވެހި ބަހުން ނަންތަކެއް ތައްޔާރު ކުރުމުގެ މަސައްކަތް ދިވެހި ބަހުގެ އެކެޑަމީން ފަށައިފި އެވެ.
ސަރުކާރުގެ ގިނަ ވުޒާރާތަކާއި އޮފީސްތަކަށް މިހާރު ނަން ކިޔާފައި ހުންނަނީ އިނގިރޭސި ބަހުންނެވެ. އެގޮތުން ތާރީހާއި ބަހާ ބެހޭ މިނިސްްޓްރީއަށް ވެސް ނަން ކިޔާފައި ވަނީ އިނގިރޭސި ބަހުންނެވެ. އެއީ "މިނިސްޓްރީ އޮފް އާޓްސް ކަލްޗަ އެންޑް ހެރިޓޭޖް" އެވެ.
މާދަރީ ބަހުގެ ދުވަސް ފާހަގަ ކުރުމަށް މިރޭ ބޭއްވި ރަސްމީ ޖަލްސާގައި ވާހަކަފުޅު ދައްކަވަމުން ރައީސް އިބްރާހިމް މުހައްމަދު ސޯލިހު ވިދާޅުވީދައުލަތުގެ ވުޒާރާތަކާއި އޮފީސްތަކަށް ކިޔާނެ ދިވެހި ބަހުގެ ނަންތަކެއް، ބަހުގެ އެކެޑަމީން މިހާރު ގެންދަވަނީ ތައްޔާރު ކުރައްވަމުންގެންދަވާ ކަމަށެވެ.
މާދަރީ ބަހުގެ ދުވަސް ފާހަގަ ކުރުމަށް މިރޭ ދަރުބާރުގޭގައި ބޭއްވި ރަސްމިއްޔާތުގައި ރައީސް ސޯލިހު ވާހަކަފުޅު ދައްކަވަނީ --- ސަންފޮޓޯ ފަޔާޒު މޫސާ
"ދިވެހިބަހުގެ ޤާނޫނެއް އޮންނަ އިރު، އެ ޤާނޫނު ތަންފީޒު ކުރުމަކީ، ދިވެހި ބަސް ކުރިއެރުވުމަށް އެޅިދާނެ ވަރަށް ރަނގަޅު ފިޔަވަޅެއް. އެ ގޮތުން ދައުލަތުގެ ވުޒާރާތަކާއި އޮފީސްތަކަށް ކިޔާނެ ދިވެހި ބަހުގެ ނަންތަކެއް، ބަހުގެ އެކެޑަމީން މިހާރު ގެންދަވަނީ ތައްޔާރު ކުރައްވަމުން،"ރައީސް ސޯލިހު ވިދާޅުވި އެވެ.
އޭގެ އިތުރުން ދިވެހި ބަސް ކުރިއެރުވުމަށް ކުރެވިދާނެ ބައެއް ކަންކަން ރައީސް ސޯލިހު ފާހަގަ ކުރެއްވި އެވެ.
އެގޮތުންކުޑަކުދީންނަށް ހާއްސަ، ދިވެހި ކާޓޫނާއި ޑްރާމާ އަދި ތަމްސީލާއި ފިލްމު އުފެއްދުމުގެ މަސައްކަތް، މިހާރަށް ވުރެ ހަރުދަނާ ގޮތެއްގައި ކުރެވޭނެ އިންތިޒާމެއް ހަމަޖެއްސުމަކީ ހެރިޓޭޖް މިނިސްޓްރީއަށް މިހާރު ވެސް ކުރެވޭނެ ކަމެއް ކަމަށް ރައީސް ސޯލިހު ވިދާޅުވި އެވެ.
"ކުޑަކުދީންނާއި ފުރާވަރު ކުދީންނަށް ހާއްސަކޮށްގެން ވާހަކަ ފޮތް އުފެއްދުމުގެ ގައުމީ މުބާރާތެއް ބޭއްވުމަކީ ވެސް ކުރެވިދާނެ ކަމެއް. ބަހުގެ އަދަބުގެ އިލްމު އުނގެނޭނެ ފޮތްތައް އުފެއްދުމާއި، ރާއްޖޭގެ އެކި ބަހުރުވަތަކުގެ އަދަބީ ބަސްފޮތްތައް ވެސް އެކުލަވައިލުން ވަރަށް މުހިންމު." ރައީސް ސޯލިހު ވިދާޅުވި އެވެ.
މާދަރީ ބަހުގެ ދުވަސް ފާހަގަ ކުރުމަށް މިރޭ ދަރުބާރުގޭގައި ބޭއްވި ރަސްމިއްޔާތުގެ ތެރެއިން --- ސަންފޮޓޯ/ ފަޔާޒު މޫސާ
ރައީސް ސޯލިހު ވަނީ ނޫސްވެރިންނަށް ވެސް ދިވެހި ބަހުގެ ގަވާއިދަށް އިސްކަން ދިނުމަށް ނަސޭހަތްތެރިވެފަ އެވެ. ހުރިހާ ނޫސްވެރިން ވެސް، ބަހުގެ ގަވައިދާއި ހަމަތަކާ އެއްގޮތަށް ލިޔުއްވުމަށް ހާއްސަ އިސްކަމެއް ދިނުމަށް ރައީސް އިލްތިމަސް ކުރެއްވި އެވެ.
"އަޅުގަނޑުމެންގެ ދިވެހި ޙަޟާރަތުގެ ޤަދީމީ އެވޭލާކަމާ މެދު ފަހުރުވެރިވާ ފަދައިން، ދިވެހި ބަހާމެދު ވެސް ފަހުރުވެރިވާންޖެހޭނެ. ދިވެހި ދައުލަތް އެކި ޒަމާންތަކުން ފިރުކެމުން، މިޒަމާނަށް އައީ، ދިވެހި ބަސް ކޮނޑުއަޅައިގެން." ރައީސް އިބްރާހިމް މުހައްމަދު ސޯލިހު ވިދާޅުވި އެވެ.
ދިވެހި ދައުލަތުގެ މުސްކުޅިކަމާ މެދު އުފެދޭ ފަހުރުވެރިކަމަކީ، ދިވެހިބަހާ މެދު ކުރެވޭ އުފާވެރިކަމުގެ އިޙްސާސެއް ކަމުގައިވާންޖެހޭ ކަމަށް ރައީސް ސޯލިހު ވިދާޅުވި އެވެ.