18 Mar 2019, 12:58
ސަރުކާރުން ކުރިއަށް ގެންދިއުމަށް ނިންމާފައިވާ މާލެ ފެހިކުރުމުގެ މަޝްރޫއު މި މަހު ފެށޭނެ ކަމަށް މާލޭ ސިޓީ ކައުންސިލުން ބުނެފިއެވެ.
ޓީވީއެމްގެ ރާއްޖެ މިއަދު ޕްރޮގްރާމުގައި ވާހަކަ ދައްކަވަމުން މާލެ ސިޓީކައުންސިލުގެ ޑެޕިއުޓީ މޭޔަރު ޝަމާއު ޝަރީފް ރޭ ވިދާޅުވީ މާލޭ ވަށައިގެން އޮންނަ ރިންގް ރޯޑުގައި ގަސް އިންދުމަށް މިހާރު ތައްޔާރު ވެފައިވާކަމަށެވެ.
"ނާސަރީގައި ގަސްތައް ރޯކޮށް މަގުމައްޗަށް ނެރޭ ވަރު ވެފައިވަނީ މިހާރު،" ޝަމާއު ވިދާޅުވިއެވެ. އޭނާ ވިދާޅުވީ މިހާރު ކުރިއަށްދަނީ ގަސްތައް ބެހެއްޓުމަށް ބޭނުންވާ ކޮށިގަނޑުތައް ހޯދުމުގެ މަސައްކަތް ކަމަށެވެ.
"މި މަސްތެރޭ ގަސްތައް ޖެހޭނެ،" ޝަމާއު ވިދާޅުވިއެވެ.
ބޮޑުތަކުރުފާނުމަގުގައި އިންދުމަށް 2،700 ގަސް އެންވާރަމެންޓް މިނިސްޓްރީގެ ފަރާތުން މާލޭ ސިޓީ ކައުންސިލާ ހަވާލުކުރީ މިއަހަރުގެ ޖެނުއަރީމަހުގެ 29 ވަނަ ދުވަހުއެވެ.
ބޮޑުތަކުރުފާނުމަގުގައި އިންދުމަށް ހަމަޖެހިފައިވަނީ ރާއްޖޭގެ މާހައުލުން މަދުވެފައި ހުރި މީރުވަސް ދުވާ މާ ގަސް ކަމަށް އެންވާރަމެންޓް މިނިސްޓްރީއިން މީގެ ކުރިން ވަނީ ބުނެފައެވެ. އޭގެ ތެރޭގައި ކަރަންކާ މަލާއި ޗަމްޕާޕޫލް ފަދަ މާ ގަސްތައް ހިމެނޭނެ ކަމަށް އެ މިނިސްޓްރީއިން ބުންޏެވެ.
މާލޭގެ މަގުގައި މިހާރުވެސް އާންމުކޮށް މަގުމަތީގައި ހުންނަ ހިތިގަހާއި ބޮޑު ޖަވާހިރު ފަދަ ގަސްތައް އިންދާނެ ކަމަށްވެސް އެންވާރަމެންޓުން ވަނީ ބުނެފައެވެ.
ބޮޑުތަކުރުފާނުމަގު ތާރު އަޅައިގެން ތަރައްގީ ކުރުމަށްޓަކައި ކުރިން އެމަގުގައި ހުރި ގަސްތައް ނަގާފައިވާއިރު އޭރުގެ ސަރުކާރުން ބުނެފައިވަނީ ބޮޑުތަކުރުފާނުމަގުގައި 450 ގަސް އިންދާނެ ކަމަށެވެ. ގަވާއިދާ ޚިލާފަށް ބޮޑުތަކުރުފާނު މަގުގައި ހުރި ގަސްތައް ނެގުމުން އެންވާރަމެންޓަލް ޕްރޮޓެކްޝަން އެޖެންސީ (އީޕީއޭ)އިން ވަނީ ހައުސިން މިނިސްޓްރީ ޖޫރިމަނާވެސް ކޮށްފައެވެ.
މުޅި ރާއްޖެ ފެހިކުރުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ސޯލިހުގެ 100 ދުވަހުގެ ވަޢުދުގެ ތެރޭގައި ހިމެނޭ ކަމެކެވެ. އެންވަޔަރަމެންޓް މިނިސްޓްރީ އިން ވަނީ މުޅި ރާއްޖެ ފެހިކުރާނެ ގޮތުގެ ޕްލޭނެއް އެކުލަވާލާފައެވެ.