09 Apr 2019, 23:41
ނިމިގެން ދިޔަ މަޖިލިސް އިންތިހާބްގައި ކަނޑައެޅިގެން ސައްހަ ވޯޓެއް ބާތިލް ވޯޓެއް ކަމަށް ކަނޑައެޅި އޮފިޝަލުންނާ މެދު ގާނޫނީ ފިޔަވަޅު އަޅާނެ ކަމަށް އިލެކްޝަން ކޮމިޝަނުން ބުނެފި އެވެ.
ކުރިން ބާތިލް ކަމަށް ނިންމި ވޯޓު އަލުން ސައްހަ ކަމަށް ނިންމަނީ ކޮން އުސޫލަކުން ތޯ ސާފުކޮށްދެއްވުމަށް އާންމު ފަރާތަކުން ކުރި ޓްވީޓަކަށް ރައްދު ދެއްވައި އިލެކްޝަން ކޮމިޝަނުގެ ރައީސް އަހްމަދު ޝަރީފް ކުރެއްވި ޓްވީޓެއްގައި ވިދާޅުވެފައިވަނީ، ކަނޑައެޅިގެން ސައްހަ ވޯޓެއް ބާތިލް ވޯޓެއް ކަމަށް ނިންމުމަކީ ގާނޫނީ ކުށެއް ކަމަށެވެ.
"އެ އޮފިޝަލްއާ ދޭތެރޭ ގާނޫނީ ފިޔަވަޅު ކޮމިޝަނުން އަޅާނެ. މިކަން އެހެން ފަރާތްތަކަށް އިބުރަތަކަށް ވާން ޖެހޭ،" ޝަރީފް ކުރެއްވި ޓްވީޓްގައި ވިދާޅުވެފައިވެ އެވެ.
ހޮނިހިރު ދުވަހު ބޭއްވި އިންތިހާބާ ގުޅިގެން ބައެއް ދާއިރާތަކުގެ ކެންޑިޑޭޓުން ޝަކުވާ ހުށަހެޅުމުން ބައެއް ވޯޓު ފޮށިތައް އިލެކްޝަންސް ކޮމިޝަނުން ވަނީ އަލުން ގުނާފައެވެ.
މާމިގިލީ ދާއިރާ އިން 190 ވޯޓް ބާތިލް ކަމަށް ނިންމާފައިވާއިރު އެ ދާއިރާގެ ވޯޓު މިރޭ އަލުން ގުނުމުން އޭގެތެރެއިން 180 ވޯޓަކީ ސައްހަ ވޯޓުކަން ވަނީ އެނގިފައެވެ.
ގާނޫނު ބުނާގޮތުން ބާތިލް ވޯޓު ކަނޑައެޅުމުގެ ބާރު ލިބިގެންވަނީ ވޯޓު ފޮށީގެ ވެރިޔާއަށެވެ.