12 May 2019, 17:46
ހަ މަހަށް ފަހު، އިދިކޮޅު މައި ޕާޓީ ޕީޕީއެމްގެއަށް ދައުލަތުން ލިބެންޖެހޭ 11 މިލިއަން ރުފިޔާގެ ތެރެއިން ނުދީ ހިފެހެއްޓި 8.6 މިލިއަން ރުފިޔާ މިއަދު ލިބިއްޖެ އެވެ. އެޕާޓީން ބުނަނީ ވަރަށް އަހަށް ދަރަނިތައް ދައްކައި ހަލާސް ކުރާނެ ކަމަށެވެ.
ޕީޕީއެމް އަށް ނުދީ ބާކީ ހުރި 8.6 މިލިއަން ރުފިޔާ މިދިޔަ ނޮވެމްބަރު އެއް ވަނަ ދުވަހު ހިފެހެއްޓީ ޕީއެމްގެ މިލްކުވެރިކަމާ ގުޅޭ ގޮތުން ކޯޓުގައި ހިނގި މައްސަލަ އަކާ ގުޅިގެންނެވެ. ނަމަވެސް ފަހުންމައްސަލަ ނިމ،ި މިދިޔަ ޖެނުއަރީ މަހު ފަހު އެ ފައިސާ ދޫކޮށްދިނުމަށް އިލެކްޝަންސް ކޮމިޝަނުން ވަނީ ފިނޭންސް މިނިސްޓްރީގައި އެދިފައެވެ. ފިނޭންސް މިނިސްޓްރީން އެ ފައިސާ ދޫކޮށްފައިވަނީ، މީގެ ދެހަފްތާ ކުރިންނެވެ.
ޕީޕީއެމްގެ ނައިބު ރައީސް އަދި ރައްޔިތުންގެ މަޖިލީހުގެ ނައިފަރު ދާއިރާ މެމްބަރު ޝިޔާމް މިއަދު "ސަން" އަށް ވިދާޅުވީ، އެ ފައިސާ މިއަދު އެ ޕާޓީއަށް ލިބިފައިވާ ކަމަށާއި ފައިސާ ލިބުމާއެކު މިހާރު އެޕާޓީގެ ނުދެއްކި ހުރި ދަރަނި ދައްކާ ހަލާސް ކުރުމުގެ މަސައްކަތް މިއަދުން ފެށިގެން ފަށައިފައިވާ ކަމަށެވެ.
"މިއީ މިދިޔަ އަހަރު ކުރީކޮޅު ލިބެން ޖެހޭ ފައިސާ އެއް. މިއަދު ލިބިގެން މިދިޔައީ. ފައިސާ ނުލިބުމުގެ ސަބަބުން މަޖިލިސް އިންތިހާބަށް ވަރަށް ބޮޑު ހުރަހެއް އެޅިގެން ދިޔަ. ރިޔާސީ އިންތިހާބުގައި ކުރި ހަރަދުތަކަށް ވެސް ފައިސާ ނުދެއްކި އޮތީ މި ފައިސާ ނުލިބި އޮތުމުން.،" ނައިފަރު ދާއިރާއަށް ދެވަނަ ދައުރަކަށް އިންތިހާބުވެވަޑައިގެންނެވި ޝިޔާމް ވިދާޅުވިއެވެ.
"އެންމެ ބޮޑު އިސްކަމެއް ދޭނީ، ޕާޓީގެ ނުދެއްކި އޮތް ދަރަނިތައް ދެއްކުމަށް. މިހާރު މައްސަކަތް ފަށައިފިން ޕާޓީގެ ދަރަނި ހަލާސްކުރުމަށް،" ޝިޔާމް ވިދާޅުވިއެވެ.
ރިޔާސީ އިންތިހާބުގައި ޕީޕީއެމް ކުރި ކެމްޕެއިން ދަތުރުއިން ކުރި ހަރަދުތަކަށް މޯލްޑިވިއަން މިހާތަނަށް 3.8 މިލިއަން ރުފިޔާ ނުދައްކާ އެބައޮތެވެ. އަދިވެސް އެ ޕާޓީގެ އެހެނިހެން ބައެއް ބިލްތަކަށް ފައިސާ ވަނީ ނުދެއްކި އެވެ.
ޝިޔާމް ވިދާޅުވީ، ދައުލަތުން ލިބެންޖެހޭ ފައިސާއަށް ހަރަދުތަކަށް ފައިސާ ދެއްކުމަށް ވަރަށް ބޮޮޑަށް ބަރޯސާ ވާނެ ކަމަށާއި އެގޮތުގެ މަތިން ޕީޕީއެމް އަށް އެހާ ބޮޑު ދަރަންޏެއް ނުދެއްކި އޮތީ ޕާޓީއަށް ދޭން ޖެހޭ ފައިސާ ހިފެހެއްޓުމުން ކަމަށެވެ.
"[ފައިސާ ހިފެއްޓުމަކީ] މިއީ ސަރުކާރުގެ ފަރާތުން އެންމެ ބޮޑު އިދިކޮޅު ޕާޓީއަކާ މެދު، ޑިމޮކްރެޓިކް ވެއްޓެއްގައި ހިނގި ވަރަށް އަންޑިމޮކްރެޓިކް އަމަލެއް،" ޝިޔާމް ވިދާޅުވިއެވެ.
ސިޔާސީ ޕާޓީތަކުގެ ގާނޫނުގައި ބުނެފައި ވަނީ ދައުލަތުގެ ބަޖެޓުން ޕާޓީތަކަށް ކަނޑައަޅާ ފައިސާ އަހަރުގެ ފުރަތަމަ ތިން މަސް ދުވަހުގެ ތެރޭގައި ދޭންޖެހޭނެ ކަމަށެވެ.
ޕީޕީއެމް އަށް ލިބެން ޖެހޭ ފައިސާ ނުލިބިގެން އެޕާޓީން އެ މައްސަލަ ސިވިލް ކޯޓަށް ވެސް ވެއްދިއެވެ.