19 May 2019, 10:41
މަޝްހޫރު ވާހަކަ ލިޔުންތެރިޔާ އަނޫޖާ ޗޯހާންގެ ލޯބީގެ ވާހަކަ 'ދަ ޒޯޔާ ފެކްޓާ'ގެ މައްޗަށް ހަމަ އެނަމުގައި އުފައްދާ ފިލްމު ރިލީޒްކުރާ ތާރީޚަށް ބަދަލު ގެނެސްފިއެވެ.
ބަތަލާ ސޯނަމް ކަޕޫރު އަދި މަލަޔާމަލް އެކްޓަރު ދުލްކުއަރް ސަލްމާން ލީޑު ރޯލުން ފެނިގެންދާ އެ ފިލްމު ރިލީޒްކުރަން ކުރިން ހަމަޖެހިފައި އޮތީ ޖޫން 14 ގައެވެ. 'ދަ ޒޯޔާ ފެކްޓާ'ގެ ވާހަކަ ބިނާވެފައި ވަނީ ކްރިކެޓުގެ މައްޗަށެވެ.
އެހެންކަމުން ފިލްމުގެ ޓީމުން ކުރިން ނިންމީ ކުރިއަށް އޮތް ކުރިކެޓް ވޯލްޑް ކަޕް 2019 ގެ މެދު ތެރެއިން ފިލްމު ރިލީޒްކުރާށެވެ. ނަމަވެސް މިހާރު ވޯލްޑް ކަޕް ނިމުމުން ފިލްމު ރިލީޒްކުރަން ނިންމައިފައިވާ ކަމަށް ރިޕޯޓުތައް ބުނެއެވެ.
އެހެންކަމަށް ވާނަމަ ދެން ފިލްމު ރިލީޒްކުރާނީ ސެޕްޓެމްބަރު ކުރީކޮޅު އެވެ. ފިލްމު ރިލީޒްކުރުން ފަސްކުރީ ޕޯސްޓް ޕްރޮޑަކްޝަން މަސައްކަތްތަކެއް އަދި ނުނިމި ހުރުމުގެ އިތުރުން ވޯލްޑް ކަޕް ތެރޭގައި ފިލްމު ރިލީޒްކުރުމަކީ ފިލްމުގެ އާމްދަނީ ދަށްވެދާނެ ކަމެއް ކަމަށް ފިލްމުގެ ޓީމަށް ޤަބޫލުކުރެވިގެންނެވެ.
ފޮކްސް ސްޓާ ސްޓޫޑިއޯޒް އިން ޕްރޮޑިއުސް ކުރުމަށް ހަމަޖެހިފައިވާ 'ދަ ޒޯޔާ ފެކްޓާ' ރިލީޒްކުރާ ސީދާ ތާރީޚު އަދި ނިމިފައި ނުވި ނަމަވެސް، ޖުލައި ފަހުކޮޅު ފިލްމުގެ ޓްރެއިލާ ބެލުންތެރިންނާ ހަމައަށް އަންނާނެ ކަމަށް ފިލްމުގެ ޓީމުން މައުލޫމާތު ދެއެވެ.
މިއީ ސޯނަމް އާއި ދުލްކުއަރް އެކުގައި ފެނިގެންދާނެ ފުރަތަމަ ފަހަރެވެ. ފިލްމުގައި ސޯނަމް އަދާކުރާނީ ޒޯޔާ ސޮލަންކީ ކިޔާ މީހެއްގެ ރޯލެވެ. ޒޯޔާ ނަމަކަށް ކިޔާ ކުއްޖާ އަކީ އިންޑިއާގެ ކްރިކެޓް ޓީމަށް "ލަކީ ޗާމް"އެކެވެ.
ސޯނަމް އާއި ދުލްކުއަރްގެ އިތުރުން ފިލްމުން ދެން ފެނިގެންދާނީ ސޯނަމްގެ ބޮޑުބޭބެ ސަންޖޭ ކަޕޫރެވެ. ސަންޖޭ ފެނިގެންދާނީ ސޯނަމްގެ ބައްޕަ ރޯލުންނެވެ.