10 Jun 2019, 10:02
ފުލުހުންނަށް ފިލަން ވެގެން ރޭ ކަނޑަށް ފުންމާލި މީހާ ފަޅު ރަށެއްގެ ވަލު ތެރޭގައ ފިއްލާ އޮއްވައި، ހޯދައި ފުލުހުން އޭނާ ހައްޔަރުކޮށްފި އެވެ.
ގއ ކަނޑުހުޅުދޫއަށް ދަތުރުކުރި ފެރީއެއްގައި ހުރި އެ މީހާ ރޭ ކަނޑަށް ފުންމާލީ އެ ފެރީއިން މަސްތުވާތަކެތި ގެންދާ ކަމުގެ މައުލޫމާތު ލިބިގެން ފުލުހުން އެ ފެރީ ފާސްކުރަން އުޅޭ ކަމުގެ މައުލޫމާތު ލިބިގެން ފިލަން ވެގެން އެވެ.
ފުލުހުން ބުނީ ފުލުހުންނަށް ފިލަން ކަނޑަށް ފުންމާލީ މީހާ ފެނިފައި ވަނީ، އެއާޕޯޓެއް ތަރައްގީ ކުރާ ގދ. މާވަރަލުވަރު ވަލުތެރޭގައި ފިލައި އޮއްވާ ކަމަށެވެ. އެ މީހާ މިއަދު ހެނދުނު 9:00 އެހާކަންހާއިރު ހޯދައި ހައްޔަރުކޮށްފައިވާ ކަމަށް ފުލުހުން ބުންޏެވެ.
ފުލުހުން އަދި ބުނީ އެ މީހާ ހައްޔަރު ކުރިއިރު އެއްވެސް ބާވަތެއްގެ ޑްރަގެއް އޭނާގެ އަތުން ފެނިފައި ނުވާ ކަމަށެވެ.
އެ މީހާ ހޯދާ ހައްޔަރުކުރުމުގައި އެ ރަށުގައި މަަސައްކަތް ކުރާ ފަރާތްތަކުގެ އެހީތެރިކަން ލިބިފައިވާ ކަމަށް ވެސް ފުލުހުން ބުންޏެވެ.