30 Jun 2019, 09:47
ޓްރެފިކް ގަވައިދާ ހިލާފުވި 1350 އުޅަނދުގައި ފުލުހުން ސްޓިކާ ޖަހައިފި އެވެ.
ފުލުހުން މިއަދު އާންމު ކުރި ޓްރެފިކް މެނޭޖުމެންޓު ޑިޕާޓްމެންޓުގެ ތަފާސްހިސާބުތައް ދައްކާ ގޮތުން އެއް ހަފްތާ ތެރޭ 1350 އުޅަނދުގައި ޕާކިން ސްޓިކާ ޖެހިއިރު ޖޫރިމަނާގެ ފައިސާގެ ގޮތުގައި ދައުލަތަށް ގާތްގަނޑަކަށް 33،7500 ރުފިޔާ ލިބޭނެ އެވެ.
ސްޓިކާގެ ޖޫރިމަނާ ފައިސާ:
ފުރަތަމަ ފަހަރަށް: 250 ރުފިޔާ
- ދެވަނަ ފަހަރަށް: 500 ރުފިޔާ
- ތިން ވަނަ ފަހަރަށް: 750 ރުފިޔާ
ޖޫރިމަނާ ފައިސާ ދައްކަންޖެހޭނީ މީރާ އަށެވެ. ރައީސް އިބްރާހިމް މުހައްމަދު ސޯލިހު ރިޔާސީ އިންތިހާބުގެ ކެމްޕޭންގެ ތެރޭގައި ވައުދުވެވަޑައިގަތީ، ޕާކިން މައްސަލައަށް ހައްލެއް ނުހޯދައި ސްޓިކާ ނުޖަހާނެ ކަމަށެވެ. އެ ވައުދާ އެއްގޮތަށް މިއަހަރު ފެށުނު އިރު ސްޓިކާ ޖެހުން ހުއްޓާލި އެވެ. ނަމަވެސް ހަމައެއް ލަމައެއް ނެތި ޕާކްކުރަން ފެށުމުން، ފެބުރުއަރީ މަހުގެ ފަހުކޮޅު އަލުން ސްޓިކާ ޖަހަން ފެށި އެވެ.
ފުލުހުންގެ ތަފާސް ހިސާބުތަކަށް ބަލާއިރު މިދިޔަ ހަފްތާ ޖުމްލަ 591 އުޅަނދު ވަނީ ބަލާ ފާސްކޮށްފަ އެވެ. ދުއްވަން ކަނޑައަޅާފައިވާ ސްޕީޑަށްވުރެ ބާރަށް ދުއްވި 82 އުޅަނދެއް އެ މުއްދަތުގައި ފާހަގަވެފައިވާ ކަމަށް ތަފާސް ހިސާބުތައް ދައްކަ އެވެ.
މި މުއްދަތުގައި ލައިސެންސް ނެތި ދުއްވި 117 މައްސަލައެއް ފާހަގަވެފައިވާ ކަމަށާއި އުޅަނދު ދުއްވި އިރު ފޯނުގައި އިނދެގެން ނުވަތަ ހެޑްސެޓް ޖަހައިގެން ދުއްވި 24 މައްސަލައެއް ވެސް ފާހަގަވިކަމަށް ފުލުހުންގެ ތަފާސް ހިސާބުތައ ދައްކަ އެވެ. ހެލްމެޓު އަޅަންޖެހޭ ސަރަހައްދުތަކުގައި ހެލްމެނޓު ނާޅާ ދުއްވި ފަސް މައްސަލައެއް މިދިޔަ ހަފްތާ ވަނީ ފާހަގަވެފަ އެވެެ.
ފުލުހުންގެ ތަފާސްހިސާބުތަކަށް ބަލާއިރު މަލެ ސަރަހައްދުގައި މިދިޔަ ހަފްތާ 34 އެކްސިޑެންޓެއް ހިނގި އެވެ. އެ އެކްސިޑެންޓުތަކުގައި 20 މީހަކަށް އަނިޔާވި އިރު އެކްސިޑެންޓުތަކާ ގުޅިގެން ފަސް މީހެއްގެ ލައިސެންސް ވަނީ ހިފަހައްޓައިފަ އެވެ.