07 Jul 2019, 09:49
މިދިޔަ ހަފްތާގައި މާލޭގައި ހިނގި އެކްސިޑެންޓުތަކާ ގުޅިގެން 15 މީހެއްގެ ލައިސަންސް ހިފަހައްޓާފައިވާ ކަމަށް ފުލުހުން ހާމަކޮށްފިއެވެ.
ފުލުހުން މިއަދު އާންމު ކުރި ޓްރެފިކް މެނޭޖުމެންޓު ޑިޕާޓްމެންޓުގެ ތަފާސްހިސާބުތައް ދައްކާ ގޮތުން މާލޭގައި 52 އެކްސިޑެންޓު ހިނގައިގެން ރިޕޯޓުކޮށްފައިވެއެވެ.
އަދި އެ އެކްސިޑެންޓުތަކުގައި ހަތަރު މީހަކަށް އަނިޔާވި އިރު، 15 މީހެއްގެ ލައިސަންސް ވަނީ ހިފަހައްޓައިފައެވެ. މިދިޔަ ހަފްތާގައި ވެސް 34 އެކްސިޑެންޓެއްގައި ފަސް މީހުންގެ ލައިސަންސް ވަނީ ހިފަހައްޓައިފިއެވެ.
މިދިޔަ ހަފްތާ ޖުމްލަ 323 އުޅަނދެއް ބަލާ ފާސްކުރި އިރު، ދުއްވަން ކަނޑައަޅާފައިވާ ސްޕީޑަށްވުރެ ބާރަށް ދުއްވި 43 އުޅަނދެއް ފާހަގަވި އިރު، ލައިސަންސް ނެތި ދުއްވި 140 މައްސަލައެއް ވަނީ ފާހަގަވެފައެވެ.
އަދި އުޅަނދު ދުއްވި އިރު ފޯނުން ވާހަކަ ދައްކަމުން ނުވަތަ ހެޑްސެޓް ޖަހައިގެން ދުއްވި 60 މައްސަލައެއް ވެސް ފާހަގަވިކަމަށް ފުލުހުންގެ ތަފާސް ހިސާބުތަކުން ދައްކަ އެވެ.
ހެލްމެޓު އަޅަންޖެހޭ ސަރަހައްދުތަކުގައި ހެލްމެނޓު ނާޅައި ދުއްވި ނުވަ މައްސަލައެއް މިދިޔަ ހަފްތާ ވަނީ ފާހަގަވެފަ އެވެެ.
ޓްރެފިކް ގަވައިދާ ހިލާފުވެގެން މިދިޔަ ހަފްތާގައި ޕާކިން ސްޓިކާ ޖަހައިފައި ވަނީ 865 އުޅަނދުގައެވެ.
މި ތަފާސްހިސާބުތަކަށް ބަލާއިރު، މިދިޔަ ހަފްތާގައި ޖޫރިމަނާ ފައިސާގެ ގޮތުގައި ދައުލަތަށް 216،250 އަށް ވުރެ ގިނަ ރުފިޔާ ލިބޭނެ އެވެ.
ސްޓިކާގެ ޖޫރިމަނާ ފައިސާ:
ފުރަތަމަ ފަހަރަށް: 250 ރުފިޔާ
ދެވަނަ ފަހަރަށް: 500 ރުފިޔާ
ތިން ވަނަ ފަހަރަށް: 750 ރުފިޔާ
މިއީ އޭގެ ކުރީ ހަފްތާއަށް ވުރެ ދަށް އަދަދެކެވެ. ކުރީ ހަފްތާގައި 1350 އުޅަނދުގައި ޕާކިން ސްޓިކާ ވަނީ ޖަހައިފަ އެވެ.
މިދިޔަ ހަފްތާގައި ފުލުހުން ގިނަ އަދަދެއްގެ އުޅަނދުގައި ޕާކިން ސްޓިކާ ޖެހި އިރު، ޕާކު ކުރާނެ ޖާގަ ހަމަޖައްސައިނުދީ ސްޓިކާ ޖަހާތީ އާންމު ރައްޔިތުން އަންނަނީ އެކަމާ ވަރަށް ބޮޑަށް ޝަކުވާ ކުރަމުންނެވެ.
އަދި އެ މައްސަލަ ސީރިޔަސް މައްސަލައެއްގެ ގޮތުގައި ބަލާނެ ކަމަށް ރައީސް އިބްރާހިމް މުހައްމަދު ސޯލިހް މިދިޔަ ހަފްތާގައި ވިދާޅުވި އިރު، އެ މައްސަލައިގައި ޓްރާންސްޕޯޓު މިނިސްޓަރު އާއިޝަތު ނަހުލާ ރައްޔިތުންގެ މަޖިލީހަށް ހާޒިރުކޮށް ސުވާލު ކުރުމަށް ވެސް ވަނީ ހުށަހަޅައިފައެވެ.
ރިޔާސީ އިންތިހާބުގެ ކެމްޕޭންގެ ތެރޭގައި ރައީސް ވައުދުވެވަޑައިގަތީ، ޕާކިން މައްސަލައަށް ހައްލެއް ނުހޯދައި ސްޓިކާ ނުޖަހާނެ ކަމަށެވެ. އެ ވައުދާ އެއްގޮތަށް މިއަހަރު ފެށުނު އިރު ސްޓިކާ ޖެހުން ހުއްޓާލި އެވެ. ނަމަވެސް ހަމައެއް ލަމައެއް ނެތި ޕާކްކުރަން ފެށުމުން، ފެބުރުއަރީ މަހުގެ ފަހުކޮޅު އަލުން ސްޓިކާ ޖަހަން ފެށި އެވެ.