09 Jul 2019, 18:57
ނޮވެމްބަރު 3 ގެ އުދުވާނީ ހަމަލާގެ މޭސްތިރި، ހ. ހާޖަރާގޭ އަބްދުﷲ ލުތުފީ މިރޭ ރާއްޖެ ގެންނަން ހަމަޖެހިއްޖެ އެވެ.
ފުލުހުންގެ ތަރުޖަމާން އިޒްމިއާ ޒާހިރު މިރޭ ވިދާޅުވީ ލުތުފީ ރާއްޖެ ގެންނަނީ، މިރޭ 9:30 ގައި ލަންކާއިން ރާއްޖެ އަންނަ އެމިރޭޓްސް ފްލައިޓް، އީކޭ-653 އިން ކަމަށެވެ. އަދި އޭނާ ރާއްޖެ އަންނަނީ ފުލުހުންގެ ޓީމެއްގެ ހަވާލުގައި ކަމަށް ވެސް އިޒްމިއާ ވިދާޅުވި އެވެ.
"މިރޭ ލުތުފީ މާލެ ގެނެސް ލިޔުންތައް ފުރިހަމަކޮށް މިރޭ ލުތުފީ ކަރެކްޝަންސްއާ ހަވާލުކުރާނެ،" އިޒްމިއާ ވިދާޅުވި އެވެ.
އުމުރަށް ޖަލަށް ހުކުމްކޮށްފައިވާ ލުތުފީ، އިންޑިއާއަށް ބޭސްފަރުވާއަށް 2010 ވަނަ އަހަރު ޖެނުއަރީ 16 ވަނަ ދުވަހު ފޮނުވުމުން މިއަދާ ހަމަޔަށް އޭނާ އުޅެނީ ސްރީލަންކާގައި ފިލައިގެން އެވެ. އަދި އޭނާ ހޯދަން އިންޓަޕޯލް ރެޑް ނޯޓިސްވެސް ނެރެފައިވެ އެވެ.
ލަންކާގައި ދިން ބޮމުގެ ހަލަމާތަކާ ގުޅިގެން އެ ގައުމުގެ ސިފައިން ފެށި އޮޕަރޭޝަނާ އެކު، ލުތުފީ އަމިއްލައަށް އައިސް ލަންކާގައި ހުންނަ ދިވެހި އެމްބަސީއާ ހަވާލުވީ މޭ 1 ވަނަ ދުވަހު އެވެ.
ރައްޔިތުން މަޖިލީހުގެ އިއްޔެގެ ޖަލްސާގައި ހޯމް މިނިސްޓަރު އިމްރާން އަބްދުﷲ ވިދާޅުވެފައި ވަނީ، ލުތުފީ ރާއްޖެ ގެންނަން އެ ދުވަހުން ފެށިގެން މަސައްކަތް ކުރަމުން އަންނަ ކަމަށާއި އޭނާ ގެނައުން ލަސްވެގެން އުޅެނީ ލަންކާގެ އިދާރާތަކުން ލިބެން ޖެހޭ ކުލަޔަރަންސް ނުލިބިގެން ކަމަށެވެ. އެގޮތުން ލަންކާގެ އެޓާނީ ޖެނެރަލްގެ ލިޔުން ލިބިފައިވީ ނަމަވެސް، އޭނާ ގެންނަން ބޭނުންވާ ޑިފެންސް މިނިސްޓްރީގެ ލިޔުމެއް އިއްޔެއާ ހަމަޔަށް ނުލިބޭ ކަމަށް އިމްރާން ވިދާޅުވި އެވެ. އަދި ލުތުފީ ގަވާއިދާ ހިލާފަށް ލަންކާގައި އުޅެފައިވާތީ، ލަންކާގެ އިމިގްރޭޝަނަށް 2،852 ޑޮލަރު (44،063 ރުފިޔާ) ދިވެހި ސަރުކާރުން ދައްކަން ޖެހޭ ކަމަށް އޭނާ ވިދާޅުވި އެވެ.
މިދިޔަ ބުރާސްފަތި ދުވަހު ރައީސް އިބްރާހިމް މުހައްމަދު ސޯލިހު ބޭއްވެވި ނިއުސްކޮންފަރެންސްގައި އެމަނިކުފާނު ވިދާޅުވީ، ލުތުފީ ގެނައުން ލަސްވެގެން އުޅެނީ ގާނޫނީ އިމުގެ ތެރެއިން ފުރިހަމަ ކުރަން ޖެހޭ އިޖުރާއަތްތައް ފުރިހަމަ ކުރުމަށް ފަހު އޭނާ ރާއްޖެ ގެންނަން ބޭނުންވާތީ ކަމަށެވެ.
ލުތުފީ ނުގެނެސް ދެ މަހެއްހާ ދުވަސްވެފައިވާތީ ސަރުކާރަށް ގިނަ ބައެއްގެ ފާޑުކިޔުންތައް އަމާޒުވި އެވެ.
ސްރީލަންކާ ހަނގުރާމަކުރި ތަމަޅައިންގެ ޕްލޯޓް ޖަމާއަތުގެ ޓެރަރިސްޓުންނާ ގުޅިގެން ލުތުފީ ދިން އުދުވާނީ ހަމަލާގައި 19 ދިވެއްސަކު ޝަހީދުވި އެވެ. އޭގެ ތެރޭގައި އާންމުންގެ 11 މީހުންނާއި ސިފައިންގެ އަށް މީހަކު ހިމެނެ އެވެ. އަދި އެތައް ބަޔަކަށް ބޮޑެތި ޒަހަމުތައްވެ އަނިޔާވި އެވެ.