18 Aug 2019, 10:35
ދަނޑުވެރިކަމުގައި ބޭނުންކުރާ ޕެސްޓިސައިޑާ ބެހޭ ބިލު މަޖިލީހަށް އަލުން ހުށަހަޅަން ސަރުކާރުން ފޮނުވައިފި އެވެ.
ސަރުކާރުން ބުނީ އެ ބިލަކީ ދެމެހެއްޓެނިވި ގޮތުގައި ދަނޑުވެރިކަމުގެ އުފެއްދުންތައް ރާއްޖޭގައި ކުރިއެރުވުމަށްޓަކައި ހުށަހަޅާ ބިލެއް ކަމަށެވެ. އޭގެ އިތުރުން ޕެސްޓިސައިޑްގެ ގޮތުގައި ބޭނުންކުރާ ބާވަތްތައް ދަނޑުވެރިކަމުގައި ބޭނުންކުރުމާއި، ރާއްޖޭގައި ޕެސްޓިސައިޑް އުފެއްދުމާއި ރާއްޖެއަށް ޕެސްޓިސައިޑް އިމްޕޯޓުކުރުމާއި އެކްސްޕޯޓުކުރުމާއި ވިއްކުމާއި ބޭނުންކުރުމާއި ނައްތާލުމާބެހޭ އުސޫލުތައް ކަނޑައެޅުމުގެ އިތުރުން ޕެސްޓިސައިޑް ބޭނުންކުރުމުގައި އާންމު ސިއްހަތާއި ތިމާވެއްޓަށް ލިބޭ ގެއްލުން ބަލައި ފިޔަވަޅު އެޅުމުގެ އުސޫލުތައް ބިލުގައި ހިމެނެ އެވެ.
ޕެސްޓިސައިޑާ ބެހޭ ކަންތައްތައް އެންމެ ރަނގަޅު ފެންވަރެއްގައި ބެލެހެއްޓުމަށްޓަކައި ޒިންމާވާނެ ޕެސްޓިސައިޑާބެހޭ ޔުނިޓެއް އެ ބިލު ގާނޫނަކަށް ވާ ހިސާބުން ގާއިމް ވެގެން ދާނެ ކަމަށް ބިލުގައި ވަނީ ބުނެފަ އެވެ.
ޕެސްޓިސައިޑުގެ ސަބަބުން ދިމާވެދާނެ ނުރައްކަލަކުން ރައްކާތެރިކުރުމުގެ ގޮތުން އަޅަންޖެހޭ ސަލާމަތީ ފިޔަވަޅުތައް ކަނޑައަޅައި ތަންފީޒުކުރުމާއި، ޕެސްޓިސައިޑް ތަހުލީލު ކުރުމަށްޓަކައި ރަސްމީ ލެބޯޓަރީތައް އެ ގާނޫނުގެ ދަށުން ގާއިމް ކުރެވޭނެ ކަމަށް ކަމަށްވެސް ބިލުގައި ވަނީ ބުނެފަ އެވެ.
ބިލުގައި ބަޔާންކޮށްފައިވާ ގާނޫނާ ހިލާފުކަންކަން ކުރަމުންދާ ފަރާތްތަކާ މެދު އަދަބެއްގެ ގޮތުން 5000 ރުފިޔާ އާއި އެއް ލައްކަ ރުފިޔާއާ ދޭތެރޭގެ އަދަދަކުން ޖޫރިމަނާ ކުރުމުގެ އަދަބު ކަނޑައެޅިގެންދާނެ ކަމަށް ބިލުގައި ބުނެފައިވެ އެވެ.
މި ބިލަކީ މީގެ ކުރިން 18 ވަނަ ރައްޔިތުންގެ މަޖިލީހަށް ވެސް ހުށަހެޅި ބިލެކެވެ. އެހެން ނަމަވެސް އޭރު މަޖިލީހުގެ ދައުރު ހަމަވުމުން އެ ބިލް ބާތިލްވީ އެވެ.