29 Aug 2019, 19:19
ކުނިން ހަކަތަ އުފެއްދުމަށް ތިލަފުށީގައި ގާއިމުކުރާ އިންސަރެނޭޝަން ފެސިލިޓީ އިމާރާތް ކުރުމަށް ހިއްކާފައިވާ ބިމުގެ ޖިއޯ ޓެކްނިކަލް ސާވޭ ހެދުމަށް ރިޔަން ޕްރައިވެޓް ލިމިޓެޑާ މިއަދު ހަވާލުކޮށްފިއެވެ.
އެކަމަށްޓަކައި މިއަދު އެންވަޔަރަމެންޓް މިނިސްޓްރީގައި އޮތް ރަސްމިއްޔާތުގައި މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ ޕާމަނަންޓް ސެކެރެޓަރީ އަޖުވަދު މުސްތަފާއެވެ. އަދި ރިޔަން ކުންފުނީގެ ފަރާތުން ސޮއި ކުރެއްވީ އެކުންފުނީގެ ޑިރެކްޓަރު އިބްރާހީމް ހަމީޒެވެ.
ރިޔަން ޕްރައިވެޓް ލިމިޓެޑުން އީއެލްއެސް ގްރޫޕާއެކު ކުރިއަށްގެންދާ މި ސާވޭ 30 ދުވަހުގެ ތެރޭގައި ނިންމުމަށް ވަނީ އެއްބަސްވެފައެވެ. ދައުލަތުގެ ބަޖެޓުން ހަރަދުކުރާ މި ސާވޭގެ ޖުމްލަ އަގަކީ 1.2 މިލިއަން ރުފިޔާއެވެ.
އެންވަޔަރަމެންޓް މިނިސްޓްރީ އިން ބުނީ މި ސާވޭގެ މައިގަނޑު ބޭނުމަކީ، ކުނި މެނޭޖުކުރުމަށް ތިލަފުށީގައި ހިއްކާފައިވާ ބިމުގައި އެފަދަ އިމާރާތެއް އެޅުމަށް އެކަށީގެންވާ ފެންވަރު ހުރިތޯބެލުމެވެ.
އެގޮތުން ސާވޭގައި އެބިމުގައި ބޯހޯލް ތޮރޮފައިގެން ވެލިތަކުގެ ސާމްޕަލް ނަގައިގެން ތަހުލީލުކޮށް، އެ ތަހުލީލުތަކަށް ބިނާކޮށް ރިޕޯޓެއް އެކުލަވާލާނެއެވެ.
ތިލަފުށީގައި ކުނި މެނޭޖުކުރުމުގެ މައްސަލައަށް ދާއިމީ ހައްލެއް ހޯދުމަށްޓަކައި ދެމެހެއްޓެނިވި ގޮތެއްގައި ކުނި މެނޭޖުކުރެވޭނެ ނިޒާމެއް ގާއިމުކުރުމުގެ މަސައްކަތް ކުރުމަށް ތިލަފުށީގެ ފަޅުތެރެއިން 15 ހެކްޓަރުގެ ސަރަހައްދެއް ވަނީ ހިއްކާފައެވެ.
މާލެ ސަރަހައްދުގެ ކުނި ދެމެހެއްޓެނިވި ގޮތެއްގައި މެނޭޖުކުރެވޭނެ ޒަމާނީ ނިޒާމެއް ގާއިމުކުރުމަށްޓަކައި އެ ބިމުގައި ދުވާލަކު 500 ޓަނުގެ ކުނި މެނޭޖްކުރެވޭނެ ފެސިލިޓިއެއް ގާއިމްކުރުމަށް މިހާރު ޕްރޮކިއުމެންޓްގެ މަސައްކަތް ކުރިއަށްދާ ކަމަށް މިނިސްޓްރީ އިން މައުލޫމާތު ދެއެވެ.
މާލެ ސަރަހައްދުގެ ކުނީގެ މައްސަލައަށް ދައިމީ ހައްލެއް ހޯދުމަށްޓަކައި، ގްރޭޓާ މާލެ އެންވަޔަރަމަންޓަލް އިމްޕްރޫވްމެންޓް އެންޑް ވޭސްޓް މެނޭޖްމެންޓް ޕްރޮޖެކްޓުގެ ނަމުގައި މަޝްރޫއެއް ކުރިއަށް އެބަދެއެވެ.
އެ މަޝްރޫއު ކުރިއަށް ގެންދަނީ އޭޑީބީގެ ހިލޭ އެހީއާއި އޭޝިއަން އިންފްރާސްޓްރަކްޗާ އިންވެސްޓްމަންޓް ބޭންކް (އޭއައިއައިބީ) އަދި އިސްލާމިކް ޑިވެލޮޕްމަންޓް ބޭންކް (އައިޑީބީ)ގެ އިތުރުން ބައެއް އެހެން ފަންޑިން އެޖެންސީތަކުގެ އެހީ އާއި ދިވެހި ސަރުކާރުގެ ބައިވެރިވުމާއެކު އެވެ.