01 Sep 2019, 12:47
ސުޕްރީމް ކޯޓުގެ ފަނޑިޔާރުންގެ ބެންޗުން ހުސްވި މަގާމަށް ފަނޑިޔާރަކު ހޯދަން ޖުޑިޝަލް ސާވިސް ކޮމިޝަން (ޖޭއެސްސީ)އިން ކުރި އިއުލާނުގެ މުއްދަތު އިތުރުކޮށްފި އެވެ.
ޖޭއެސްސީ އިން މިދިޔަ ބުރާސްފަތި ދުވަހު ކުރި އިއުލާނު މިއަދު 12:00ގައި ވަނީ ހަމަވެފަ އެވެ. ނަމަވެސް އެ ކޮމިޝަނުން މިއަދު ވަނީ ފަނޑިޔާރު ކަމަށް އެދި ހުށަހެޅުމުގެ މުއްދަތު އިތުރުކޮށްދީފަ އެވެ.
ޖޭއެސްސީ އިން މިއަދު ކުރި އިއުލާނުގައިވާ ގޮތުން ހުސްވެފައިވާ ސުޕްރީމް ކޯޓުގެ ފަނޑިޔާރު ކަމަށް ކުރިމަތިލުމުގެ މުއްދަތު ހަމަވާނީ ސެޕްޓެމްބަރު ފަހެއް ވާ ބުރާސްފަތި ދުވަހުގެ މެންދުރު 12:00 ގަ އެވެ.
ސުޕްރީމު ކޯޓުގެ ބެންޗުން މަގާމެއް ހުސްވީ އެ ކޯޓުގެ ފަނޑިޔާރު ކަމުން އަބްދުﷲ ދީދީ ވަކި ކުރުމަށް ރައްޔިތުންގެ މަޖިލީހުން ނިންމުމާ ގުޅިގެންނެވެ.
އަބްދުﷲ ދީދީ ވަކި ކުރީ ފުލުހުން ޖޭއެސްސީއަށް ފޮނުވި ސިޓީއަކާ ގުޅިގެން ބެލި ސުލޫކީ މައްސަލައެއް އޭނާއާ ދެކޮޅަށް ނިމުމުންނެވެ. އެއީ ފުލުހުން ބަލަމުންދާ މައްސަލައަކާ ގުޅިގެން ފޮނުވި ސިޓީ އެކެވެ. ދީދީގެ މައްސަލަ ބަލައި ޖޭއެސްސީއިން ނިންމުން ނެރުނު ރިޕޯޓުގައި ވާގޮތުން ފުލުހުން ބަލަމުން ދަނީ އެމްއެމްޕީއާރުސީގެ ފައިސާއަށް ހިޔާނާތްތެރިވީ ފަރާތްތަކުގެ ކިބައިން ފައިދާ ނަންގަވައިގެން މަގާމުގެ ނުފޫޒު ބޭނުންކޮށްގެން "ނާޖާއިޒް މަންފާތަކެއް ހޯދި" ކަމަށް ތުހުމަތު ކުރެވޭ މައްސަލަ އެކެވެ.
ސުޕްރީމް ކޯޓުގެ ފަނޑިޔާރުންގެ އަދަދު ހަތަކަށް އިތުރު ކުރުމުން އިތުރުވި ދެ މަގާމަށްވެސް ބޭފުޅުން އައްޔަން ކުރުމުގެ މަސައްކަތް ދަނީ ކުރަމުންނެވެ. އެ މަގާމުތަކަށް ސިވިލް ކޯޓުގެ ގާޒީކަން ކުރެއްވި އައިޝާ ޝުޖޫން މުހައްމަދާއި ހައިކޯޓުގެ ފަނޑިޔާރުކަން ކުރެއްވި އަޒްމިރަލްދާ ޒާހިރު އައްޔަން ކުރަން މަޖިލީހުގެ ޖުޑިޝަރީ ކޮމިޓީއިން މިހާރު ވަނީ ފާސްކޮށްފަ އެވެ.