24 Sep 2019, 09:09
އިނގިރޭސިވިލާތުގެ ޓްރެވަލް ކުންފުނި ތޯމަސސް ކުކް ބަނގުރޫޓުވެ ކުންފުނީގެ ވިޔަފާރި ހުއްޓާލުމާއެކު އެ ކުންފުނި މެދުވެރިކޮށް ރާއްޖެ އައިސް ތިބި ފަތުރުވެރިންނަށް އަނބުރާ ގައުމަށް ފޮނުވާލުމަށް ރާއްޖެއިން އެހީވާނެ ކަމަށް ސަރުކާރުން ބުނެފި އެވެ.
ދުނިޔޭގެ އެންމެ ދުވަސްވީ ޓްރެވަލް ކުންފުނި ތޯމަސް ކުކް އަކީ ރާއްޖެއަށް ގިނަ އަދަދެއްގެ ފަތުރުވެރިން ފޮނުވަމުންދިޔަ ކުންފުންޏެކެވެ.
ކުންފުނީގެ އޮޕަރޭޝަންތައް ހުއްޓާލުމާގުޅިގެން ރާއްޖޭގެ ޓޫރިޒަމް މިނިސްޓްރީ އާއި ފަތުުރުވެރިކަން ޕްރޮމޯޓު ކުރުމަށް ސަރުކާރުން އުފައްދާފައިވާ މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ) އިން ނެރުނު ބަޔާނެއްގައި ބުނީ ތޯމަސް ކުކް އިން ރާއްޖެ އައިސް ތިބި ފަތުރުވެރިންނަށް ދިމާވެދާނެ ދަތިތައް ހައްލު ކުރުމުގައި އެހީތެރިކަން ފޯރުކޮށްދޭނެ ކަމަށެވެ.
މި ފަތުރުވެރިން އަނބުރާ ގައުމަށް ދިޔުމަށް އެހީތެރިކަން ފޯރުކޮށްދޭންޖެހޭ ހާލަތެއް އައިސްފިނަމަ އެ އެހީތެރިކަންވެސް ފޯރުކޮށްދޭނެކަމަށް ބަޔާނުގައި ބުންޏެވެ.
ޓޫރިޒަމް މިނިސްޓްރީ އާއި އެމްއެމްޕީއާރުސީ ގުޅިގެން މިފަތުރުވެރިންނަށް ހާއްސަ ހެލްޕް ޑެސްކެއްވެސް ވެލާނާ އިންޓަނޭޝަނަލް އެއާޕޯޓުގައި މިހާރު ވަނީ ބަހައްޓައިފަ އެވެ.
ތޯމަސް ކުކް އާއެކު ރާއްޖެ އައިސް ތިބީ ކިތައް ފަތުރުވެރިންތޯ މިހާރު ބަލާފައިވާ ކަމަށާއި އެ ފަތުރުވެރިން ނިސްބަތްވާ ގައުމުތަކަކީ ކޮބައޮތޯ ބަލައި، ފަތުރުވެރިން އަނބުރާ ގައުމަށް ދިޔުމުގައި ދޭންޖެހޭ ހުރިހާ އެއްބާރުލުމެއް ސަރުކާރުން ދޭނެކަމުގެ ޔަގީންކަން އެ ބަޔާނުގައި ދީފައިވެ އެވެ.
"މި ފަތުރުވެރިންނަށް ދަތިތައް ދިމާވެއްޖެ ނަމަ ދޭންޖެހޭ އެއްބާރުލުން ދޭނެ. އެނބުރި ގައުމަށް ދިޔުމަށް ދަތިވެއްޖެ ހާލަތުގައި އެކޮމޮޑޭޝަންއާއި ކެއިން ބުއިމުގެ ކަންތައް ފަހިކޮށްދެވޭނެ،" ބަޔާނުގައި ބުނެފައިވެ އެވެ.
އެހީތެރިކަން ބޭނުންވާ ފަތުރުވެރިން އެއާޕޯޓުގައި ހުރި ހެލްޕް ޑެސްކަށް ދިޔުމަށް ވަނީ އިލްތިމާސް ކޮށްފަ އެވެ.
ޓޫރިޒަމް މިނިސްޓަރު އަލީ ވަހީދު ވިދާޅުވީ ތޯމަސް ކުކްގެ އޮޕަރޭޝަން ހުއްޓާލުމުގެ އަސަރު ކުރި ފަތުރުވެރިންގެ ތެރެއިން ރާއްޖޭގައި ތިބި ފަތުރުވެރިންނަށް ދޭންޖެހޭ ހުރިހާ އެއްބާރުލުމަކާއި އެހީތެރިކަމެއް ސަރުކާރުން ދޭނެ ކަމަށެވެ.
އެމްއެމްޕީއާރުސީގެ މެނޭޖިން ޑިރެކްޓަރު ތޮއްޔިބު މުހައްމަދު ވިދާޅުވީ ތޯމަސް ކުކްގެ އޮޕަރޭޝަން ހުއްޓާލުމަކީ ބޮޑު ހިތާމައެއް ކަމަށާއި އެންމެ އިސްކަންދޭނެ ކަމަކީ ރާއްޖެ އައިސްތިބި ފަތުރުވެރިން އަނބުރާ ގައުމަށް ދިޔުމުގައި ދިމާވާ ދަތިތައް ހައްލުކޮށްދިނުން ކަމަށެވެ.
ތޯމަސް ކުކް ބަނގުރޫޓުވެ، އެތައް ހާސް މީހުންގެ ދަތުރުތަކުގެ ބުކިންސް ކެންސަލްކޮށްފައިވާއިރު އެ ކުންފުންޏަށް ވަނީ ދެ ބިލިއަން ޑޮލަރުގެ ދަރަންޏާ ކުރިމަތިވެފަ އެވެ.
ތޯމަސް ކުކްއިން ނެރުނު ބަޔާނެއްގައިވާ ގޮތުން އެ ކުންފުނީގެ ބޯޑުން ވަނީ ކުންފުނި އުވާލުން ނޫން ގޮތެއް މިހާރު ނެތް ކަމަށް ނިންމާފަ އެވެ.
އިނގިރޭސި ސިވިލް އޭވިއޭޝަން އޮތޯރިޓީ (ސީއޭއޭ)އިން ބުނި ގޮތުގައި ތޯމަސް ކުކްގެ ވިޔަފާރިތަކާއި އެ ކުންފުނީގެ ހަތަރު އެއާލައިންގެ މަސައްކަތްތައް މިހާރު ވަނީ ހުއްޓާލާފަ އެވެ. އަދި އެއާ އެކު 16 ގައުމެއްގައި ތިބި އެކުންފުނީގެ 21،000 މުވައްޒަފުންގެ ވަޒީފާ ގެއްލޭނެ އެވެ.
އެހެންކަމުން ގައުމުން ބޭރުގައި ޗުއްޓީ ހޭދަ ކުރަން ގޮސްތިބި ތޯމަސް ކުކްގެ ކަސްޓަމަރުން އަނބުރާ އިނގިރޭސިވިލާތަށް ގެންދިޔުމުގެ މަސައްކަތް މިއަދުން ފެށިގެން ސަރުކާރާއި ސީއޭއޭއިން ގުޅިގެން ކުރަމުން ދާނެކަމަށް އެ ކުންފުނިން ބުންޏެވެ. އަދި ދަތުރުގެ ހަރަދުތަކަށް ތޯމަސް ކުކްއަށް ދައްކާފައިވާ ފަރާތްތަކުން އިތުރަށް ފައިސާ ދައްކަން ނުޖެހޭނެ ކަމަށްވެސް ސީއޭއޭއިން ބުންޏެވެ.
މީގެ އިތުރުން ކުރިއަށް އޮތް ދަތުރުތަކަށް ތޯމަސް ކުކް މެދުވެރިކޮށް ބުކިންސް ހެއްދި ގާތްގަނޑަކަށް އެއް މިލިއަން މީހުންނަށް ފައިސާ އަނބުރާ ދޭނެ ކަމަށް އިނގިރޭސި މީޑިއާތަކުން ބުނެ އެވެ.
އިނގިރޭސިވިލާތް ޔޫރަޕިއަން ޔޫނިއަންއިން ވަކިވުމާ ގުޅުން ހުރި މައްސަލަތަކާއި ފަތުރުވެރިކަމުގެ ދާއިރާގައި ވާދަވެރިކަން އިތުރުވުމުގެ ސަބަބުން ފާއިތުވި އަހަރުތަކުގެ ތެރޭ ތޯމަސް ކުކްއަށް ވަނީ މާލީ ގޮތުން ބޮޑެތި ގެއްލުންތައް ލިބިފަ އެވެ. އެކުންފުނި އުފެއްދީ 1841 ގައެވެ.