05 Oct 2019, 20:50
އިސްލާމް ދީން ސިޔާސީ ހަތިޔާރެއްގެ ގޮތުގައި ބޭނުން ކުރުމަކީ ދީނަށް ކުރެވޭނެ އެންމެ ބޮޑު ފުރައްސާރަ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
ރައީސް ނަޝީދު އެހެން ވިދާޅުވި އިރު، އަމިއްލަ ޖަމިއްޔާއެއް ކަމަށްވާ މޯލްޑިވްސް ޑިމޮކްރެސީ ނެޓުވޯކް (އެމްޑީއެން)އިން އިސްލާމް ދީނާ ދެކޮޅު ވާހަކަތަކެއް ލިޔެ، 2015 ވަނަ އަހަރު ޝާއިއު ކުރި ރިޕޯޓެއްގެ މައްސަލަ ފެންމަތިވެ، އެ މައްސަލަ ވަނީ ވަރަށް ބޮޑަށް ހޫނުވެފައެވެ.
މިރޭ ކުރެއްވި ޓްވީޓެއްގައި ރައީސް ނަޝީދު ވިދާޅުވީ، އިސްލާމް ދީނަކީ "އެންމެ ފުރިހަމަ، އެންމެ މާތް އަދި އެންމެ ތަހުޒީބީ" ދީން ކަމަށެވެ. އެހެން ވިދާޅުވުމަށްފަހު އެމަނިކުފާނު ވިދާޅުވ،ީ އިސްލާމް ދީނަށް ކުރެވޭ އެންމެ ބޮޑު ފުރައްސާރަކައަށް ވާނީ ސިޔާސީ ބޭނުމަށް އިސްލާމް ދީން ހަތިޔާރެއްގެ ގޮތުގައި ބޭނުން ކުރުން ކަމަށް ގަބޫލުފުޅު ކުރައްވާ ކަމަށެވެ.
"ސިޔާސީ ފުރުސަތު ހޯދުމަށް އިސްލާމް ދީން ހަތިޔާރެއްގެ ގޮތުގައި ބޭނުންކުރުމަކީ އަޅުގަނޑަށް ފެންނަ ގޮތުގައި އެންމެ ބޮޑަށް އިސްލާމް ދީނަށް ފުރައްސާރަ ކުރުން،" ރައީސް ނަޝީދު ވިދާޅުވިއެވެ.
މައްސަލަ ބޮޑުވެގެން އުޅޭ އެމްޑީއެންގެ ރިޕޯޓަކީ ރާއްޖޭގައި ދީނީ ގޮތުން ހަރުކަށި ފިކުރު ފަތުރާ ގޮތްތަކާއި، އެ ފިކުރުގެ އަސަރު ރާއްޖޭގައި އަށަގެންފައިވާ މިންވަރު ބެލުމަށްޓަކައި އެ ޖަމިއްޔާއިން ކުރި ދިރާސާއެއްގެ މައްޗަށް 2015 ވަނަ އަހަރު ނެރުނު ރިޕޯޓެކެވެ. އެ ރިޕޯޓުގައި ކީރިތި ގުރުއާނާއި ރަސޫލާގެ ސުންނަތާ ހިލާފު ވާހަކަތައް ހުއްޓެވެ. އެކަމާ ގުޅިގެން ގިނަ ބަޔަކު އަންނަނީ ނުރުހުން ފާޅުކުރަމުންނެވެ. އަދި އެ ޖަމިއްޔާ އުވާލުމަށްވެސް ބައެއް މީހުން ދަނީ ކަމާ ބެހޭ ފަރާތްތަކަށް ގޮވާލަމުންނެވެ.
އެމްޑީއެންގެ ރިޕޯޓްގެ މައްސަލަ ހޫނުވުމުން އިސްލާމިކް މިނިސްޓްރީއިން ވަނީ އެ މައްސަލަ ފުލުހަށް ހުށަހަޅާފަ އެވެ. ފުލުހުން ދަނީ މައްސަލަ ތަހުގީގު ކުރަމުންނެވެ.
އެ ރިޕޯޓުގެ މައްސަލައާ ގުޅިގެން ރާއްޖޭގެ ނަން މަޝްހޫރު ދީނީ އިލްމުވެރިން ވަނީ އެއްވެ ދީނަށް ފުރައްސާރަ ކުރުން ހުއްޓުވަން މަޝްވަރާކޮށްފައެވެ. އެފަދަ ބައްދަލުވުމެއް އިސްލާމިކް މިނިސްޓްރީއާ އެކުވެސް މިއަދު ވަނީ ބާއްވާފައެވެ.
ދީނީ އިލްމުވެރިންނާ ބައްދަލުކުރައްވައި އިސްލާމިކް މިނިސްޓަރު ޑރ. އަހުމަދު ޒާހިރު މިއަދު ވިދާޅުވީ، ދީނަށް ފުރައްސާރަ ކުރުން ހުއްޓުވުމުގެ ގޮތުން، ދިވެހިރައްޔިތުންގެ ދީނީ އެއްބައިވަންތަކަން ހިމާޔަތްކުރުމުގެ ގާނޫނަށް އިސްލާހެއް ގެންނަން ބިލެއް ހުށަހަޅުއްވާނެ ކަމަށެވެ.