28 Oct 2019, 13:00
ނުގަވާއިދުން ވިޔަފާރިކުރާ ބިދޭސީންނާ މެދު ހަރުކަށި ފިޔަވަޅުތަކެއް އަޅަން ތައްޔާރުވަމުންދާ ކަމަށް ރެޖިސްޓްރާ އޮފް ކޮމެނީސް މަރިޔަމް ވިސާމް ވިދާޅުވެއްޖެ އެވެ.
ގަވާއިދާ ހިލާފަށް ރާއްޖޭގައި މަސައްކަތްކުރާ ބިދޭސީންގެ މައްސަލައާ ގުޅޭގޮތުން ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީން ބޭއްވި ބައްދަލުވުމުގައި ވިސާމް ވިދާޅުވީ، ގަވާއިދާ ހިލާފަށް ބިދޭސީން ވިޔަފާރި ކުރާ މައްސަލައަށް ހައްލެއް ލިބޭނީ ފޮރިން އިންވެސްޓްމަންޓާ ބެހޭ ގާނޫނަށް އިސްލާހުތަކެއް ގެނެސް އަލުން އެކުލަވާލައިގެން ކަމަށެވެ.
އެގޮތުން މިހާރު އެ ގާނޫނު އޮންނަ ގޮތުން ގަވާއިދާ ހިލާފަށް ވިޔަފާރިކުރާ ބިދޭސީން ޖޫރިމަނާ ކުރިއަސް ފައިސާ ނުދައްކާ ކަމަށް ވިސާމް ވިދާޅުވި އެވެ.
"ނުގަވައިދުން އުޅޭ ފަރާތެއް ޖޫރިމަނާ ކުރިޔަސް، ދައުލަތުގެ އެއްވެސް އިދާރާއަކަށް ގޮސް އެ ފަރާތެއް ޖޫރިމަނާ ފައިސާ ދެއްކުމަކީ ކުރާނެ ކަމެއް ނޫން. އެހެންވެ ބިދޭސީން ރާއްޖޭގައި ވިޔަފާރި ކުރަން އޮންނަ ގާނޫނު (ފޮރިން އިންވެސްޓްމަންޓް ޤާނޫނު) އިސްލާހު ކުރާއިރު، އެބަ ބަލަން ގާނޫނުން ކޮންމެވެސް ކަހަލަ ހަރުކަށި ފިޔަވަޅުތަކެއް (މުދާ ހިފެހެއްޓުން، ޖަލަށް ލުން) ތައާރަފް ކުރަން މަސައްކަތް ކުރަމުން މި ދަނީ،" ވިސާމް ވިދާޅުވި އެވެ.
ނަމަވެސް މިފަދަ މައްސަލަތަކަށް ގާނޫނީ ހައްލު ހޯދުމުގެ ކުރިން މިހާރު ވެސް އިކޮނޮމިކް މިނިސްޓްރީއަށް ހުށަހެޅޭ ޝަކުވާތަކާ ގުޅިގެން އިންސްޕެކްޓް ކުރުމުގެ މަސައްކަތް ކުރަމުން އަންނަ ކަމަށް ވެސް ވިސާމް ވިދާޅުވި އެވެ.