31 Oct 2019, 19:52
ހޮނިހިރު ދުވަހުގެ ރޭ އިދިކޮޅު ޕީޕީއެމް-ޕީއެންސީން އެއްވުމެއް ބޭއްވުމަށް ކާނިވާ ސަރަހައްދު ދޫކުރެވެން ނެތްކަމަށް ޕްލޭނިންގް މިނިސްޓްރީން އަންގައިފިއެވެ.
ޕީޕީއެމް-ޕީއެންސީން ދިޔައީ ނޮވެމްބަރު ތިންވަނަ ދުވަހު ނަސްރުގެ ދުވަސް ފާހަގަކުރުމަށްޓަކައި ކާނިވާ ސަރަހައްދުގައި އެއްވުމެއް ބޭއްވުމަށް ރާވަމުންނެވެ. "ބަޑި ބުރާސްފަތި"ގެ ނަމުގައި އެ ޕާޓީން އެއްވުން ބޭއްވުމަށް ކާނިވާ ސަރަހައްދު ނޮވެމްބަރު 2 ވާ ހޮނިހިރު ދުވަހުގެ ރެއަށް ދޫކޮށްދިނުމަށް އެދި ޕްލޭނިންގް މިނިސްޓްރީގައި އެދިފައި ވަނީ އާދީއްތަ ދުވަހުއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ޕީޕަލްސް ނޭޝަނަލް ކޮންގްރެސްގެ ނައިބު ރައީސް އިބްރާހިމް ޝުޖާއު ވިދާޅުވީ އިދިކޮޅުގެ އެއްވުމަށް ކާނިވާ ސަރަހައްދު ދޫކުރެވެން ނެތްކަމަށް ޕްލޭނިންގް މިނިސްޓްރީން އެންގީ މިއަދު ކަމަށެވެ.
ޝުޖާއު މިއަދު ޓްވިޓާގައި ވަނީ ޕްލޭނިންގް މިނިސްޓްރީން ފޮނުވި ސިޓީ އާންމުކުރައްވާފައެވެ. ޕީޕީއެމްގެ ސެކްރެޓަރީ ޖެނެރަލް މުހައްމަދު ޝަކީލްއަށް އެޑްރެސްކޮށް ޕްލޭނިންގްއިން ފޮނުވާފައިވާ ސިޓީގައި ބުނެފައިވަނީ ޕީޕީއެމްއިން އެދިފައިވާ ތާރީޚުގައި ކާނިވާ ސަރަހައްދު އެހެން ފަރާތެއްގެ ބޭނުމަށް ދޫކޮށްފައި ވާތީ، އެ ތާރީޚުގައި ޕީޕީއެމްއަށް އެތަން ދޫކުރެވެން ނެތް ކަމަށެވެ.
"އަޅުގަނޑުމެން މި އެއްވުން އިންތިޒާމުކުރަމުން ގެންދިޔަ އިރުވެސް އިނގޭ މި ސަރުކާރަކަށް މި އެއްވުން ބަލާލާހާ ހިތްވަރު ނުހުންނާނެ ކަން،" ޝުޖާއު މިއަދު ނޫސްވެރިންގެ ބައްދަލުވުމުގައި ބުންޏެވެ.
ހުއްދަ ނުލިބުމުގެ ސަބަބުން ހޮނިހިރު ދުވަހުގެ ރޭ ބާއްވަން އޮތް އެއްވުން ދެން އޮންނާނީ އާޓިފިޝަލް ބީޗު ކުރިމަތީގައި ހުންނަ، ޕީޕީއެމްގެ އޮފީސް ކުރިމަތީގައި ކަމަށް ޝުޖާއު ވިދާޅުވިއެވެ.
ސުލްހަވެރިކަމާއެކު އެއްވެ އުޅުމުގެ މިނިވަން ކަމުގެ ގާނޫނަށް 2016 ވަނަ އަހަރު ގެނައި އިސްލާހާއެކު މާލޭގައި ފުލުހުންގެ ހުއްދައެއް ނެތި އެއްވުން ބޭއްވޭނީ ހަމައެކަނި ކާނިވާ ސަރަހައްދުގައެވެ.
ފުލުހުން ބުނީ ވަކި ސަރަހައްދެއްގައި އެއްވުން ބޭއްވުމަށް އެދި ޕީޕީއެމް-ޕީއެންސީއިން މޯލްޑިވްސް ޕޮލިސް ސާވިސްގައި އެދިފައި ނުވާ ކަމަށެވެ.
އަދި ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނުން ރައްޔިތުންނަށް ލިބޭ ހައްގު ބޭނުންކުރުމުގައި ފުލުހުންގެ ފަރާތުން ލިބެންވާ އެއްބާރުލުން ދޭނެ ކަމަށްވެސް ފުލުހުން ބުންޏެވެ.