10 Nov 2019, 15:30
ކޮލަމްބޯ (ނޮވެމްބަރު 10): ސްރީލަންކާގެ މައި އިދިކޮޅު ޕާޓީގެ ރިޔާސީ ކެންޑިޑޭޓު ގޯޓާބަޔަ ރާޖަޕަކްސަގެ އެމެރިކާގެ ރަށްވެހިކަން ދޫކޮށްލެއްވި ކަމާ މެދު ލަންކާގެ މިނިސްޓަރަކު ޝައްކު އުފައްދަވައިފި އެވެ.
ލަންކާގެ ޓެލެކޮމިއުނިކޭޝަންސް، ފޮރިން އެމްޕްލޯއިމެންޓް އެންޑް ސްޕޯޓްސް މިނިސްޓަރު ހަރިން ފާނަންޑޯ ވިދާޅުވި ގޮތުގައި އެމެރިކާގެ ރަށްވެހިކަން ދޫކޮށްލާ މީހުންގެ ނަންތައް އެގައުމުން އަހަރުގެ ކޮންމެ ކުއާޓަރެއްގައި އާއްމު ކުރެ އެވެ.
އަދި ގޯޓާބަޔަގެ އެމެރިކާގެ ރަށްވެހިކަން އުވާލާފައިވާ ކަމަށް އެގައުމުގެ ސަރުކާރުން މިދިޔަ މެއި މަހު އެންގި ކަމަށް ގޯޓާބަޔަ ވިދާޅުވި ނަމަވެސް، މި އަހަރުގެ ދެ ވަނަ ކުއާޓަރުގައި ރަށްވެހިކަން ދޫކޮށްލި މީހުންގެ ލިސްޓުގައި އޭނާގެ ނަން ނުހިމެނޭ ކަމަށް މިނިސްޓަރު ފާނަންޑޯ ވިދާޅުވި އެވެ. އަދި އެމައުލޫމާތު ހިއްސާ ކުރުމުން ގޯޓާބަޔަގެ ތަރުޖަމާނު ވަނީ ތިން ވަނަ ކުއާޓަރުގެ ލިސްޓުގައި އޭނާގެ ނަން ހިމެނޭނެ ކަމަށް ބުނެފައި ކަމަށް ވެސް މިނިސްޓަރު ވިދާޅުވި އެވެ.
ނަމަވެސް މިދިޔަ މަހުގެ 30ގައި ނެރެފައިވާ ތިން ވަނަ ކުއާޓަރުގެ ލިސްޓުގައި ވެސް ގޯޓާބަޔަގެ ނަން ނުހިމެނޭ ކަމަށް ފާނަންޑޯ ހާމަ ކުރެއްވި އެވެ.
ލަންކާގެ ގާނޫނު އަސާސީގައިވާ ގޮތުން އެހެން ގައުމެއްގެ ރަށްވެހިކަން އޮންނަ މީހަކަށް އެގައުމުގެ ރިޔާސީ އިންތިހާބުގައި ވާދަ ނުކުރެވޭނެ އެވެ. އެހެންކަމުން އަންނަ ހޮނިހިރު ދުވަހު ބާއްވާ އިންތިހާބު ގޯޓާބަޔައަށް ކާމިޔާބު ކުރެވުނު ނަމަވެސް އޭނާއަށް ރައީސްކަމުގެ މަސްއޫލިއްޔަތުތައް އަދާ ނުކުރެވޭނެ ކަމަށް މިނިސްޓަރު ފާނަންޑޯ ވިދާޅުވި އެވެ.
ލަންކާގެ ކުރީގެ ރައީސް މަހިންދަ ރާޖަޕަކްސަގެ ކޮއްކޯފުޅު ގޯޓާބަޔަ ރިޔާސީ އިންތިހާބުގައި ވާދަ ކުރައްވަނީ ސްރީލަންކާ ޕޮޑުޖާނަ ޕެރަމުނަ (އެސްއެލްޕީޕީ)ގެ ފަރާތުންނެވެ. އަދި އެ އިންތިހާބުގައި އޭނާއާ އެންމެ ގާތުން ވާދަ ކުރައްވާނެ ކަމަށް ބެލެވެނީ ޔުނައިޓެޑް ނޭޝަނަލް ޕާޓީ (ޔޫއެންޕީ)ގެ ކެންޑިޑޭޓު އަދި ހައުސިންގް މިނިސްޓަރު ސަޖިތު ޕްރޭމަދާސަ އެވެ.