16 Dec 2019, 17:24
ފޮރިން މިނިސްޓަރު އަބްދުﷲ ޝާހިދު އަމިއްލަފުޅު ގެއަށް ގެންދެވިކަމަށް ބުނާ އަގު ބޮޑު ކާޕެޓް ފޮރިން މިނިސްޓްރީގައި އޮތްކަން އިންފޮމޭޝަން ކޮމިޝަނަރު ހުސެން ފިޔާޒު މޫސާ ޔަގީން ކުރައްވައިފި އެވެ.
އެއީ މޮރޮކޯއަށް މިނިސްޓަރު ޝާހިދު ކުރެއްވި ދަތުރުފުޅެއްގައި އެގައުމުން ހަދިޔާއަކަށް ދިން އަގުބޮޑު ކާޕެޓެކެވެ.
އެ ކާޕެޓް މިނިސްޓަރު ގޭގައި ބޭނުންކުރައްވާކަމަށް ވިދާޅުވެ އަމިއްލަ ފަރާތަކުން ވަނީ އެންޓި ކޮރަޕްޝަން ކޮމިޝަނަށް މައްސަލައެއް ވެސް ހުށަހަޅާފަ އެވެ.
އެ ވާހަކަ މީޑިއާއަށް ތިލަވުމާ އެކު، ފޮރިން މިނިސްޓްރީއިން މީޑިއާއަށް ބުނެފައި ވަނީ އެ ކާޕެޓް މިނިސްޓަރު ޝާހިދު ގެއަށް ގެންދަވާފައި ނުވާ ކަމަށާއި، ދަތުރުފުޅުން އެނބުރި ވަޑައިގަތް ގޮތަށް އެ ކާޕެޓް މިނިސްޓްރީއާ ހަވާލުކޮށްފައިވާ ކަމަށެވެ. އަދި ކާޕެޓް މިނިސްޓްރީގެ ގުދަނުގައި އޮތް ކަމަށް ވެސް މިނިސްޓްރީއިން އޭރު ބުންޏެވެ.
މިއަދު އިންފޮމޭޝަން ކޮމިޝަނަރު ހުސައިން ފިޔާޒް މޫސާ ވަނީ ފޮރިން މިނިސްޓަރު އަބްދުﷲ ޝާހިދާ ބައްދަލު ކުރައްވައިފަ އެވެ. މިނިސްޓްރީގައި ބޭއްވި އެ ބައްދަލުވުމަށް ފަހުފިޔާޒު ކުރެއްވި ޓްވީޓެއްގައި ވިދާޅުވީ، އެ ކާޕެޓު މިނިސްޓްރީގައި އޮތްތޯ ބެލިއިރު، މިނިސްޓްރީގެ ގުދަނުގައި އެ ކާޕެޓް އެބަ އޮތް ކަމަށެވެ. ފިޔާޒް ވަނީ ކާޕެޓުގެ ފޮޓޯ ވެސް ޓުވީޓުކުރައްވައިފަ އެވެ.
ދައުލަތުގެ މާލިއްޔަތު ގަވައިދުގައި ބުނެފައިވާ ގޮތުން ހަދިޔާގެ ގޮތުގައި މިނިސްޓްރީތަކަށް ލިބޭ މުދަލަކީ ދައުލަތުގެ މުދަލެވެ. އަދި އެ މުދާ ބަލަހައްޓަން ޖެހޭނީ މާލިއްޔަތު ގަވައިދުގައި ބުނެފައިވާ ގޮތަށެވެ. އަމިއްލަ ބޭނުމަށް އެފަދަ މުދަލެއް ބޭނުމެއް ނުކުރެވޭނެ އެވެ.