26 Dec 2019, 19:40
ފަތުރުވެރިކަމުގެ ދާއިރާގައި މަސައްކަތް ކުރާ މީހުންނަށް ދެވޭ ސާވިސްޗާޖްއާ މެދު ޖުމްލަކޮށް ހިތްހަމަޖެހިވަޑައިގަންނަވާ ކަމަށް ޓޫރިޒަމް މިނިސްޓަރު އަލީ ވަހީދު ވިދާޅުނުވާ ކަމަށް އޭނާގެ ދިފާއުގައި ޓޫރިޒަމް މިނިސްޓްރީ އިން ބުނެފި އެވެ.
އިއްޔެ ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު އަލީ ވަހީދު ވިދާޅުވެފައި ވަނީ ރާއްޖޭގައި ޓޫރިޒަމްގެ ހިދުމަތްދޭ ފާހަގަކޮށްލެވޭ ކުންފުނިތަކުން ސާވިސް ޗާޖު ދޭ ގޮތް ރަނގަޅު ކަމަށެވެ. އެކަމާ ގުޅިގެން ޓޫރިޒަމްގެ ސިނާއަތުގައި މަސައްކަތް ކުރާ ބައެއް ފަރާތްތަކުގެ ފާޑުކިޔުން މިނިސްޓަރަށް އަމާޒުވި އެވެ.
މިނިސްޓަރު އަލީ ވަހީދު ދެއްކި ވާހަކަތައް ސާފުކޮށްދީ ޓޫރިޒަމް މިނިސްޓްރީ އިން މިއަދު ނެރުނު ބަޔާނެއްގައި ބުނި ގޮތުގައި، މިނިސްޓަރު ޖުމްލަ ގޮތެއްގައި ސާވިސްޗާޖު ދޭ ގޮތް ރަނގަޅު ކަމަށް ނުވަތަ ގޯސް ކަމަށް ވިދާޅެއް ނުވެ އެވެ. އެ ބަޔާނުގައިވާ ގޮތުން މިނިސްޓަރު ވިދާޅުވީ ރާއްޖޭގެ ފާހަގަކޮށްލެވޭ ބޮޑެތި "ކީ" އިންވެސްޓަރުން ސާވިސް ޗާޖު ދޭ ގޮތް ރަނގަޅު ކަމަށް ކަމަށެވެ.
އޭގެ އިތުރުން ސާވިސް ޗާޖު ދޭ އަދަދުތައް ވެސް މިނިސްޓްރީގައި އެބަ ހުރި ކަމަށް އަލީ ވަހީދު ވިދާޅުވުމަކީ ސާވިސް ޗާޖު ދިނުމުގައި އަމަލު ކުރަނީ ރަނގަޅަށޭ ނުވަތަ ގޯސްކޮށޭ ބުނުން ނޫން ކަމަށް މިނިސްޓްރީއިން ބުންޏެވެ.
ގިނަ ރިސޯޓުތަކުގެ "ޕެރިޓީ" ރަނގަޅު ކަމަށް މިނިސްޓަރު ދެއްކެވި ވާހަކަ ވެސް މިނިސްޓްރީ އިން ވަނީ ތަރުޖަމާކޮށްފަ އެެވެ. މިނިސްޓްރީ އިން ބުނި ގޮތުގައި "ޕެރިޓީ"ގެ މާނަ އަކީ މުވައްޒަފުންގެ ނިސްބަތެވެ.
ނޫސްވެރިންގެ ބައްދަލުވުމަށް ފަހު ފާޑުކިޔުން އަމާޒުވާން ފެށުމުން އަލީ ވަހީދު ވަނީ ރައްޔިތުންނަށް އޮޅޭ ގޮތަށް ވާހަކަތައް ފަތުރާ ކަމަށް ވިދާޅުވެ ޓްވީޓު ކުރައްވައިފަ އެވެ. އޭނާ ވިދާޅުވީ ޓޫރިޒަމް އިންޑަސްޓްރީގެ ހުރިޙާ އެންމެންގެ ހައްގުތައް ހިމާޔަތް ކުރައްވާނެ ކަމަށެވެ.