09 Mar 2020, 17:54
ރާއްޖެއިން ކޮވިޑް19 ފެނިފައި ވީނަމަވެސް ދިވެހިންނަށް ނުދެވޭ ގޮތަށް އެއްވެސް ގައުމަކުން އަދި ފިޔަވަޅު އަޅާފައި ނުވާކަމަށް ސަރުކާރުން ބުނެފިއެވެ.
ކޮވިޑް19 އިން ރައްކާތެރިވުމުގެ ގޮތުން ރާއްޖެއިން ވަނީ ބައެއް ގައުމުތަކުން ރާއްޖެއަށް މީހުން އައުން ވަގުތީގޮތުން މެދުކަނޑާލައިފައެވެ.
އެގޮތުން ޗައިނާ، އިރާން، އިޓަލީ، ބަންގްލަދޭޝް އަދި ދެކުނު ކޮރެއާގެ ދެ ޕްރޮވިންސަކުން ރާއްޖެއަށް މީހުން އައުން ވަނީ ވަގުތީގޮތުން މެދުކަނޑާލައިފައެވެ.
ކޮރޯނާ ވައިރަސްއާ ގުޅޭ ގޮތުން މައުލޫމާތު ދެއްވާ ސަރުކާރުގެ ތަރުޖަމާނު، ރައީސް އޮފީހުގެ އަންޑަސެކްރެޓަރީ މުހައްމަދު މަބުރޫކް އަޒީޒް މިއަދު ވިދާޅުވީ، ބައެއް ގައުމުތަކުން ރާއްޖެއަށް މީހުން އެތެރެވުން މަނާކޮށްފައި އޮތް ނަމަވެސް، އެފަދަ ފިޔަވަޅެއް އެހެން ގައުމަކުން ރާއްޖެއާ މެދު އަޅާފައި ނުވާ ކަމަށެވެ.
"ރާއްޖޭގެ ސްޓޭޓަސް އަށް ބަލާއިރު، އެއްވެސް ގައުމަކުން ދިވެހިންނަށް ނުދެވޭ ގޮތަށް ފިޔަވަޅެއް އަޅާފައެއް ނުވެ،" މަބްރޫކް ވިދާޅުވިއެވެ.
މިހާތަނަށް ރާއްޖެއިން ކޮވިޑް19 އަށް ހަތަރު މީހަކު ވަނީ ޕޮޒިޓިވް ވެފައެވެ. އެއީ ކުރެއްދޫ އައިލެންޑް ރިސޯޓުން ފެންމަތިވި ދެ ކޭހަކާއި، ސޭންޑީސް ބަތަލާ (އއ. ބަތަލާ)އިން ފެނުނު ދެ ކޭސްއެވެ.
އެއާއެކު އެ ދެ ރިސޯޓަށް މީހުން އަރާ ފޭބުން މަނާކޮށް، މީހުން ސްކްރީންކޮށް ކޮންޓެކްޓު ޓްރޭސިންގގެ މަސައްކަތް އަންނަނީ ކުރަމުންނެވެ.