10 Mar 2020, 12:53
އިސްލާމިކް ޔުނިވާސިޓީގެ ދަރިވަރުންގެ ގުޅުމުގެ ފަރާތުން ކުރިއަށް ގެންދިޔުމަށް ނިންމާފައިވާ ހަރަކާތްތައް ވަގުތީ ގޮތުން މެދުކަނޑާލައިފި އެވެ.
އައިޔޫއެމްގެ ދަރިވަރުންގެ ގުޅުމުން ނެރުނު ބަޔާނެއްގައި ބުނީ ދުނިޔޭގެ އެކި ކަންކޮޅުތަކުގައި ހަލުވިކަމާ އެކު ފެތުރެމުންދާ ކޮރޯނާ ނުވަތަ ކޮވިޑް 19 އިތުރަށް ފެތުރުން ހުއްޓުވުމަށް އަޅާ ސަލާމަތީ ފިޔަވަޅެއްގެ ގޮތުން އިއްޔެ އިން ފެށިގެން އެ ޖަމްއިއްތާ އިން ކުރިއަށްގެންދަން ނިންމާފައިވާ ހަރަކާތްތައް މުއްދަތެއް ނެތްގޮތަށް ފަސްކޮށްފައިވާ ކަމަށެވެ.
އެ ގޮތަށް ނިންމާފައި ވަނީ އައިޔޫއެމް އިން އަންގައިގެން ކަމަށް އެ ޖަމްއިއްޔާ އިން ބުންޏެވެ.
އައިޔޫއެމްގެ ދަރިވަރުންގެ ގުޅުމުން ނެރުނު ބަޔާނުގައި ބުނީ ބައިނަލްއަގުވާމީ ގޮތުން ދިމާވެފައިވާ މި ބޮޑު ސިއްހީ މައްސަލައާ ގުޅިގެން ފަސްކުރި ހަރަކާތްތައް ފަހުން ކުރިއަށް ގެންދިޔުމަށް މަސައްކަތް ކުރާނެ ކަމަށެވެ.
ރާއްޖެއިން ބަލިޖެހިފައިވާ ހަ މީހަކު މިހާތަނަށް ވަނީ ފެނިފަ އެވެ. އޭގެ ތެރެއިން ހަތަރު މީހަކީ ޅ. ކުރެއްދޫގައި މަސައްކަތްކުރާ މީހުންނެވެ. އަނެއް ދެ މީހުންނަކީ އއ. ބަތަލާ ރިސޯޓުން ޕޮޒިޓިވްވި ދެ މީހުންނެވެ.
މިހާރު ރާއްޖެ އޮތީ ބަލީގެ ލެވެލް ރީނދޫގަ އެވެ. ކުރެއްދޫ ރިސޯޓުގެ ލެވެލް ވަނީ އޮރެންޖަށް މަތިކޮށްފަ އެވެ.
ކޮރޯނާ ފެތުުރުން ހުއްޓުވުމަށް ކަމާ ބެހޭ ފަރާތްތަކުން ވަނީ މީހުން އެއްވެ އުޅޭ ހަރަކާތްތައް މަޑުޖައްސާލާ ކޮންމެހެން ކުރަންޖެހޭ ދަތުރުތައް ނޫނީ ނުކުރުމަށް އިލްތިމާސް ކޮށްފަ އެވެ.