14 Mar 2020, 12:37
މިހާރު ރާއްޖެއާއި ދުނިޔޭގެ އެހެނިހެން ކަންކޮޅުތަކުގައި ފެތުރެމުންދާ ކޮރޯނާވައިރަސް (ކޮވިޑް-19)އާ ގުޅިގެން އޮންލައިންކޮށް ހިދުމަތްދޭ ފްލޫ ކްލިނިކެއް އޭޑީކޭ ހޮސްޕިޓަލުން ހުޅުވައިފިއެވެ.
އޭޑީކޭއިން ބުނީ އެ ހިދުމަތާއެކު އާންމުންނަށް ގޭގައި ތިބެގެން އެޕޮއިންޓްމަންޓް ހެދޭނެ ކަމަށެވެ.
"އަޅުގަނޑުމެންގެ ޓީމުން ތިބޭފުޅުންނާ އޭރުން ގުޅާނެ" އޭޑީކޭއިން ރޭ ކުރި ޓުވީޓުގައި ވެއެވެ.
ކޮވިޑްއާ ގުޅިގެން، ހުމާއި ރޯގާ ޖެހި ކެއްސާ ހަދާނަމަ އާންމުން ގިނައިން އެއްވާ ތަންތަނަށް ނުނިކުތުމަށް ސަރުކާރުގެ އިދާރާތަކުން ވަނީ ގޮވާލައިފައެވެ.
މިހާތަނަށް ބައްޔަށް ޕޮޒިޓިވް ވެފައިވާ ނުވަ މީހަކު ރާއްޖެއިން ފެނިފައިވާއިރު ރައްކާތެރިކަމުގެ ފިޔަވަޅެއްގެ ގޮތުން އިޓަލީ، އީރާން، ޗައިނާ، ކޮރެއާގެ އިތުރުން ބަންގްލަދޭޝްއިން ރާއްޖެ އަންނަ މީހުންނަށް ވަގުތީގޮތުން ރާއްޖެ އެތެރެ ނުވެވޭނެ ގޮތް ވަނީ ހަދައިފައެވެ.
ކޮރޯނާވައިރަހުގެ ކޭސްތައް ފެނި، އަދި ޝައްކުކުރެވޭ ކޭސްތަކެއް ފެނިފައިވާ ބައެއް ރިސޯޓުތައް ވަނީ މީހުން އަރައި ފޭބުން ވަގުތީގޮތުން މެދުކަނޑާލައި، މޮނިޓަރިން ހާލަތަށް ގެނެސްފައެވެ.
ރިސޯޓުތަކަށާއި ސަފާރީތަކަށް އަންނަ ފަތުރުވެރިންވެސް ރަށްރަށަށް އެކްސްކާޝަންއަށް ގެންދިޔުން މަނާކޮށްފައިވާއިރު ރާއްޖޭގައި 30 ދުވަހުގެ މުއްދަތަށް އާންމު ސިއްހަތުގެ ކުއްލި ނުރައްކާ ވަނީ އިއުލާނު ކޮށްފައެވެ.