19 Mar 2020, 17:32
ކޮރޯނާވައިރަސް ނުވަތަ ކޮވިޑް19 ރޯގާއާ ގުޅިގެން ހިދުމަތް ދިނުމަށް ޝައުގުވެރިކަން ހުރި ސިއްހީ ޕްރޮފެޝަނަލުންނަށް މަސައްކަތަށް ނުކުތުމުގެ ފުރުސަތު އައިޖީއެމްއެޗްއިން ހުޅުވާލައިފިއެވެ.
އައިޖީއެމްޗްއިން ނެރުނު ބަޔާނެއްގައި ބުނެފައިވަނީ މިފަދަ ހިދުމަތްތެރިންނަކީ ގައުމަށް ދިމާވާ ބޮޑެތި ސިއްހީ ކާރިސާތަކުގައި އެހީތެރިކަން ފޯރުކޮށްދޭން ތައްޔާރަށް ތިބޭ ބަޔަކަށް ވާތީ، ރައްޔިތުންނަށް ހިދުމަތް ދިނުމުގެ މަތިވެރި މަގުސަދުގައި މަސައްކަތަށް ނުކުތުމަށް އެންމެހާ ސިއްހީ ހިދުމަތްތެރިންގެ ފަރާތުން އެދޭ ކަމަށެވެ.
ހިދުމަތަށް ނުކުންނަށް ބޭނުންވާ ސިއްހީ ހިދުމަތްތެރިން 7980282 އަށް ގުޅައި މައުލޫމާތު ސާފުކުރުމުގެ ފުރުސަތު މިހާރު ވަނީ ހުޅުވާލައިފައެވެ.
ސިއްހީ ހިދުމަތްތެރިން ހިދުމަތަށް ނުކުތުމަށް ހުޅުވާލާފައި ވާއިރު، މީގެކުރިން ސިއްހީ ދާއިރާގައި ހިދުމަތް ކޮށްދެއްވާފައިވާ ފަރާތްތަކުން މިހާރުވެސް އަންނަނީ، ކޮރޯނާވައިރަސް ފެތުރުމާ ދެކޮޅަށް ސަރުކާރުން ކުރަމުން އަންނަ މަސައްކަތުގައި އެހީތެރިވެދިނުމުގެ ޝައުގުވެރިކަން ފާޅުކުރަމުންނެވެ.
ރާއްޖެއިން ކޮރޯނާވައިރަހަށް ޕޮޒިޓިވް 13 މީހަކު ފެނިފައިވާއިރު، ބަލި ފެތުރުން ކޮންޓްރޯލްކުރުމަށް ސަރުކާރުން އަންނަނީ ގިނަ ފިޔަވަޅުތަކެއް އަޅަމުންނެވެ.