20 Mar 2020, 11:13
ބޮލީވުޑްގެ ހިތްގައިމު ޖޯޑު ރިޗާ ޗައްޑާއާއި އަލީ ފަޒަލް އަންނަ އޭޕްރިލް މަހުގެ 15 ވަނަ ދުވަހު ކައިވެނިކުރުމަށް ކުރިން ނިންމި ނަމަވެސް އެ ކައިވެނި ފަސްކޮށްލައިފިއެވެ.
ދުނިޔޭގެ އެކި ހިސާބުތަކުގައި ފެތުރެމުންދާ ކޮރޯނާވައިރަހުގެ ސަބަބުން ދެމީހުންގެ ކައިވެނި ފަސްކޮށްފައިވާކަން ދެ ތަރިންގެ ތަރުޖަމާނު ވަނީ ކަށަވަރުކޮށްދީފައެވެ. އޭނާ ބުނީ މި ދަނޑިވަޅަކީ ކައިވެނި ކުރުމަށް އެންމެ އެކަށީގެންވާ ދަނޑިވަޅު ނޫންކަމަށާއި ކޮރޯނާވައިރަހުގެ ކަންތައް ހަމައަކަށް އެޅުމުން މި އަހަރުތެރޭ އެދެތަރިން ކައިވެނި ކުރުމަށް ހަމަޖެހިފައިވާ ކަމަށެވެ. މި ވަގުތަކީ އެންމެން ވެސް އެހެން މީހުންގެ ރައްކާތެރިކަމަށާއި އެންމެންގެ ސިއްހަތަށް ސަމާލުކަންދޭންވީ ވަގުތު ކަމަށްވެސް އޭނާ ވަނީ ބުނެފައެވެ.
ދެ ތަރިންގެ ކައިވެނި ހަފްލާ ކުރިން ބާއްވަން ނިންމީ ލަކްނޯ އަދި މުމްބާއިގައެވެ.
ރިޗާއާއި ފަޒަލްވެސް މީގެ ކުރިން ކައިވެންޏެއް ކޮށްފައެއްނުވެއެވެ. ފަޒަލްއަކީ ބޮލީވުޑްގެ އިތުރުން ހޮލީވުޑްގެ އެކްޓަރެއް ވެސްމެއެވެ. ފަޒަލް ވަނީ "ފާސްޓް އެންޑް ފިއުރިއަސް 7" ވެސް ކުޅެފައެވެ. އޭނާގެ ކުރިއަށް ހުރި ހޮލީވުޑް ފިލްމުތަކުގެ ތެރޭގައި "ޑެތު އޮން ދަ ނައިލް" ހިމެނެއެވެ.