14 Apr 2020, 22:54
ކޮރޯނާވައިރަސްއިން ޖެހޭ މީހުންނަށް ފަރުވާދިނުމަށް ބޭރުގެ ޖަމިއްޔާތަކުގެ އެހީގައި އިތުރު 27 ވެންޓިލޭޓަރު ލިބޭނެ ކަމުގެ ޔަގީންކަން ލިބިފައިވާ ކަމަށް ސަރުކާރުން ބުނެފިއެވެ.
ސަރުކާރުން އަމާޒުކޮށްފައިވަނީ 200 ވެންޓިލޭޓަރުގެ ސެޓަޕެއް ރާއްޖޭގައި ހެދުމަށެވެ. މުޅި ރާއްޖޭގެ އެކި ސަރައްހަދުތަކުގައި މިވަގުތު 97 ވެންޓިލޭޓަރު ހުރި އިރު، މިހާރުވެސް 151 ވެންޓިލޭޓަރު 57 މިލިއަން ރުފިޔާއަށް ގެނައުމަށް ވަނީ ކުންފުނިތަކާ ވަނީ ހަވާލުކޮށްފައެވެ.
މިރޭ ނޭޝަނަލް އިމަޖެންސީ އޮޕަރޭޝަން ސެންޓަރު (އެންއައިސޯސީ)ގައި ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު މަބްރޫކު އަޒީޒު ވިދާޅުވީ، މިހާރު އެކު ޖަމިއްޔާތަކުން އިތުރު 27 ވެންޓިލޭޓަރު ރާއްޖެއަށް ހަދިޔާ ކުރުމަށް ނިންމާފައިވާ ކަމަށެވެ. އެ ތަކެތި ލިބޭނެ ކަމުގެ ޔަގީން ލިބިފައިހުރި ނަމަވެސް އެ ވެންޓިލޭޓަރު ގެނައުމަށް ދަތިތަކެއް އެބަހުރި ކަމަށް މަބްރޫކު ވިދާޅުވިއެވެ.
ވެންޓިލޭޓަރު ހަދިޔާ ކުރި ޖަމިއްޔާތައް:
ޔުނިސެފް - 2 ޕޯޓަބަލް ވެންޓިލޭޓަރު
- ވޯލްޑްބޭންކް - 18 އައިސީޔޫ ވެންޓިލޭޓަރު
- އޭޑީބީ - 4 އައިސީޔޫ ވެންޓިލޭޓަރު
- އައިޑީބީ - 3 އައިސީޔޫ ވެންޓިލޭޓަރު
މަބްރޫކު މިރޭ ވަނީ 151 ވެންޓިލޭޓަެރު ގެނައުމަށް ހަވާލު ކުރި ކުންފުނިތަކުގެ ނަންތައްވެސް ހާމަ ކުރައްވާފައެވެ. އެގޮތުން 26 ވެންޓިލޭޓަރު ގެނައުމަށް 8.3 މިލިއަން ރުފިޔާއަށް ހަވާލުކޮށްފައި ވަނީ، ނާޑު ޕްރައިވެޓް ލިމިޓެޑްއާއެވެ. ފަންސާސް އައިސީޔޫ ވެންޓިލޭޓަރު ގެނައުމަށް 14.4 މިލިއަން ރުފިޔާއަށް މެޑް ޓެކް ކުންފުންޏާއެވެ. އަދި ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ މެދުވެރިވެގެން 75 ވެންޓިލޭޓަރު 34 މިލިއަން ރުފިޔާއަށް ގެންނަނީ، ދުބާއީ ކުންފުންޏެއް ކަމަށްވާ އެގްޒެކިއުޓާސް ޖެނެރަލް ޓްރޭޑިންއަށް ކަމަށް މަބްރޫކު ވިދާޅުވިއެވެ.
"ތަކެތި ލިބޭނެ ކަމަށް އެގްރިމަންޓު ކުރެވުނު ދުވަސް ފަހަނައަޅާ ގޮސްފި. އެކަމަކު މިކަމަކު މިކަމުގައި ދިމާވެގެން އުޅޭނީ [ތަކެތި ލިބުމުގައި ލަސްވަނީ] މުޅި ދުނިޔޭގައިވެސް ދަތުރުފަތުރުކުރުމުގައި އައިސްފައިވާ ލަސްތަކާ ގުޅިގެން. އެތަކެތި ގެނެވޭނެ އެންމެ އަވަހަކަށް ގެނައުމަށް އެ ކުންފުނިތަކާ ވަނީ މަޝްވަރާ ކުރެވިފައި،" މަބްރޫކު ވިދާޅުވިއެވެ.
މިރޭ ބޭއްވި ނޫސްވެރިންގެ ބައްދަލުވުމުގައި މަބްރޫކު ވާހަކަ ދައްކަވަނީ: 151 ވެންޓިލޭޓަރު ގެންނަ ކުންފުނިތަކުގެ ނަންތައް މަބްރޫކު މިރޭ ހާމަ ކުރެއްވި --- ސަން ފޮޓޯ/ ފަޔާޒު މޫސާ
ޖުމްލަ 151 ވެންޓިލޭޓަރު ތެރޭގައި އައިސީޔޫގައި ބޭނުން ކުރާ 135 ވެންޓިލޭޓަރާއި ދަތުރުމަތީގައި ބޭނުން ކުރެވޭފަދަ ޕޯޓަބަލް 16 ވެންޓިލޭޓަރެވެ.
އެ ކުންފުނިތަކުގެ ތެރެއިން މިހާތަނަށް ފައިސާ ދައްކާފައިވަނީ ހަމައެކަނި ޑަބްލިއެޗްއޯ މެދުވެރިގެން ގެންނަ 75 ވެންޓިލޭޓަރަށް ކަމަށް ރޭ މަބްރޫކު ވަނީ ވިދާޅުވެފައެވެ. އެ ތަކެއްޗަށް ދައްކާފައިވަނީ ފައިސާގެ ޖުމްލަ އަދަދުގެ 75 ޕަސަންޓެވެ.
މުޅި ދުނިޔެއަށްވެސް ސިއްހީ ގޮތުންނާއި އިގްތިސާދީގޮތުންވެސް ކުރިމަތިވެފައިވާ ގޮންޖެހުންތަކާއެކު ބޮޑެތި ގައުމަކުންވެސް މިބަލިން އަރައިގަތުމަށް ދަތިތަކެއް ވަނީ ކުރިމަތިވެފައެވެ. އެގޮތުން ސިއްހީ ވަސީލަތްތަކުގައި ބޭނުންކުރާ ވެންޓިލޭޓަރު ފަދަ ތަކެތި ލިބުމުގައި ވަނީ ދަތިތަކެއް ކުރިމަތިވެފައެވެ.