23 Apr 2020, 20:47
ރާއްޖެއިން ކޮވިޑް ޖެހުނު މީހުންގެ އަދަދު 100 އިން މައްޗަށް އަރައިފިއެވެ.
މިއަދު މާލެއިން 23 މީހަކު ވައިރަހަށް ޕޮޒިޓިވްވެފައި ވާއިރު، މާލެއިން 89 މީހަކަށް ވަނީ ބަލި ޖެހިފައެވެ. އަދި ރާއްޖެއިން ބަލި ޖެހުނު މީހުންގެ އަދަދު ވަނީ 108 އަށް އަރައިފައެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި ވާހަކަދައްކަވަމުން ނޭޝަނަލް އެމަޖެންސީ އޮޕަރޭޝަން ސެންޓަރުގެ ތަރުޖަމާނު މަބްރޫކް އަޒީޒް ވިދާޅުވީ، ރޭގެ ޕްރެސް އަށްފަހު 23 މީހަކު ޕޮޒިޓިވްވެފައިވާ ކަމަށެވެ.
މާލެއިން މިއަދު ނުވަ މީހަކު ޕޮޒިޓިވްވެފައިވާކަން އެޗްޕީއޭއިން ހާމަކުރީ މިއަދު މެންދުރުއެވެ. އޭގެ ތެރޭގައި ހިމެނެނީ ހަތަރު ދިވެހީންނާއި ފަސް ބަންގްލަދޭޝް މީހުންނެވެ.
މިއަދު ފަހުން ބައްޔަށް ޕޮޒިޓިވްވި 14 މީހުންނަކީ އެއްތަނެންގައި ދިރިއުޅޭ މީހުންނެވެ. އެމީހުން ބައްޔަށް ޕޮޒިޓިވްކަން އެނގުނީ އެމީހުން ދިރިއުޅޭ ތަން ސްކްރީން ކުރުމުންނެވެ.
މާލެއިން އެންމެ ފުރަތަމަ ބައްޔަށް މީހަކު ޕޮޒިޓިވްވީ މި މަހުގެ 15 ވަނަ ދުވަހުއެވެ. އެއާއެކު މާލެ ސަރަހައްދު ވަނީ ލޮކްޑައުން ކޮށްފައެވެ. މިހާތަނަށް ޕޮޒިޓިވްވި މީހުންނާ ކޮންޓެކްޓްވެފައި ތިބި 1675 މީހަކު ވަނީ ހޯދައިފައެވެ.
އެމީހުންނާ ގުޅުންހުރި 217 ތަނެއް މޮނިޓަރިންގ އަށް ލާފައިވާއިރު އައިސޮލޭޝަންގައި 189 މީހުން އަދި ކަރަންޓީންގައި 1546 މީހުން އެބަތިއްބެވެ.