01 May 2020, 22:51
ދިއްލީ (މެއި 1): އިންޑިއާގައި ކޮރޯނާވައިރަސް ފެތުރުން ހުއްޓުވުމަށް އިއުލާން ކުރި ލޮކްޑައުން އަނެއްކާވެސް ދެ ހަފްތާއަށް އިތުރުކޮށްފި އެވެ.
އިންޑިއާގައި މާޗް މަހުގެ 25ގައި އިއުލާން ކުރި ލޮކްޑައުން ފުރަތަމަ ނިމެން ހަމަޖެހިފައި އޮތީ މިދިޔަ މަހުގެ 14އިގަ އެވެ. ނަމަވެސް އެ ދުވަހު ބޮޑުވަޒީރު ނަރެންދުރަ މޯދީ ވަނީ ގައުމުގެ ރައްޔިތުން ގޭގައި ތިބެން ޖެހޭ މުއްދަތު މިމަހުގެ ތިނެކާ ހަމަޔަށް އިތުރު ކުރައްވާފަ އެވެ. އަދި މިއަދު އެގައުމުގެ މިނިސްޓްރީ އޮފް ހޯމް އެފެއާސް (އެމްއެޗްއޭ)އިން ވަނީ އަނެއްކާވެސް 14 ދުވަހަށް ލޮކްޑައުން ދަންމާލާފަ އެވެ.
އެމްއެޗްއޭއިން ވަނީ މި ފަހަރުގެ ލޮކްޑައުން ތެރޭ، ވައިރަސް ފެތުރުމުގެ ނުރައްކާ ކުޑަ ސަރަހައްދުތަކުގައި ފިޔަވަޅުތައް ލުއި ކުރާނެ ކަމަށް ބުނެފަ އެވެ. އަދި ނުރައްކާ މިންވަރު ފާހަގަ ކުރުމަށް ގައުމުގައި ރަތް، އޮރެންޖު އަދި ފެހި ޒޯންތައް ކަނޑައަޅާފަ އެވެ.
އެގޮތުން ރަތް އަދި އޮރެންޖު ޒޯންތަކުގައި ވައިރަސް ފެތުރިފައިވޭތޯ ބެލުމަށް ގެއިން ގެޔަށް ޒިޔާރާތް ކުރުމާއި ކޮންޓެކްޓް ޓްރޭސިން ކުރިއަށްގެންދިޔުން އޮންނާނެ ކަމަށާއި އެ ސަރަހައްދުތަކަށް ސިއްހީ އެމާޖެންސީތަކާއި ޒަރޫރީ މުދާ ސަޕްލައި ކުރަން ފިޔަވާ އަރާ ފޭބުން މަނާ ވާނެ ކަމަށް އެމްއެޗްއޭއިން ބުންޏެވެ.
އިންޑިއާގެ އިގުތިސާދީ ގޮތުން އެންމެ މުހިއްމު ސިޓީތައް ކަމަށްވާ ނިއު ދިއްލީ އާއި މުމްބާއީ އާއި ބެންގަލޫރާއި ޗެންނާއީ އާއި އަހުމަދުއާބާދު އޮންނާނީ ރެޑް ޒޯންތަކުގެ ގޮތުގައި ލޮކްޑައުންކޮށްފަ އެވެ.
އެ ލޮކްޑައުން ތެރޭ ހުރިހާ ސަރަހައްދެއްގައިވެސް ރޭގަނޑު 7:00އިން ހެނދުނު 7:00އާ ދޭތެރޭ ޒަރޫރީ ބޭނުންތަކަށް ފިޔަވާ ބޭރަށް ދިޔުން މަނާ ވާނެ އެވެ. އަދި 65 އަހަރުން މަތީގެ މީހުންނާއި ކުޑަކުދިންނާއި މާބަނޑު މީހުންނާއި އެހެން ސިއްހީ މައްސަލަތައް ހުންނަ މީހުންނަށް ލޮކްޑައުން ތެރޭ ބޭރަށް ނުދެވޭނެ އެވެ.
މީގެ އިތުރުން ހުރިހާ ޒޯނެއްގައިވެސް ވައިގެ މަގުންނާއި ރޭލުންނާއި މެޓްރޯއިން ދަތުރު ކުރުމާއި އެއް ސްޓޭޓުން އަނެއް ސްޓޭޓަށް ދަތުރު ކުރުން މަނާ ވާނެ އެވެ. އަދި ތައުލީމީ އިދާރާތަކާއި މޯލްތަކާއި ހޮޓެލްތަކާއި ރެސްޓޯރެންޓުތަކާއި ދީނީ އަޅުކަން ކުރާ ތަންތަން ހުންނާނީ ބަންދުކޮށްފަ އެވެ.
އިންޑިއާގެ ހުރިހާ ޒޯނެއްގައި މަނާކޮށްފައިވާ ކަންތައްތައް ފިޔަވާ އެހެން އިގުތިސާދީ ހަރަކާތްތަކާއި ހިދުމަތްތައް ގްރީން ޒޯންތަކުގައި ހުއްދަވާނެ އެވެ. ގްރީން ޒޯންތަކަކީ މިހާތަނަށް ވައިރަހުގެ އެއްވެސް ކޭސްއެއް ފެނިފައި ނުވާ ނުވަތަ ފާއިތުވި 21 ދުވަސް ތެރޭ އެއްވެސް ކޭސްއެއް ފެނިފައި ނުވާ ސަރަަހައްދުތަކެވެ.
އިންޑިއާއިން ޖެނުއަރީ 30ގައި ކޮރޯނާވައިރަސް ފެނުނު ފަހުން އެގައުމުގެ 35،000އަށް ވުރެ ގިނަ މީހުން ވައިރަހަށް ޕޮޒިޓިވްވެ، ބަލީގައި 1،154 މީހަކު ވަނީ މަރުވެފަ އެވެ. ނަމަވެސް ކަމާ ބެހޭ މާހިރުން ވަނީ 1.3 ބިލިއަން މީހުންގެ އާބާދީއެއް އޮންނަ އިންޑިއާގައި އެކަށީގެންވާ ވަރަށް ވައިރަހަށް ޓެސްޓު ކުރަމުން ނުދާ ކަމަށް ބުނެ ކަންބޮޑުވުން ފާޅުކޮށްފަ އެވެ.