04 May 2020, 09:51
އެމެރިކާގެ މަޝްހޫރު ޕްރޮފެޝަނަލް ރެސްލާ ޖޯން ސީނާ އޭނާގެ އިންސްޓަގްރާމް އެކައުންޓުގައި ރިޝީ ކަޕޫރާއި އިރުފާން ޚާންގެ ފޮޓޯއެއް ހިއްސާކޮށްފި އެވެ.
ދެތަރިންގެ މަރާއެކު ދެތަރިންނަށް ޓްރިބިއުޓެއް ދިނުމަށްޓަކައި ޖޯން ވަނީ ރިޝީ އާއި އިރުފާންގެ ފޮޓޯއެއް އިންސްޓަގްރާމަށް ލާފަ އެވެ. އެ ފޮޓޯތައް ހިއްސާކުރުމުން ފޭނަކު ވަނީ ޖޯން ބޮލީވުޑްގެ ފިލްމުތައް ބަލާތޯ އަހައި ސުވާލުކޮށްފަ އެވެ.
ރިޝީ ކަޕޫރުގެ ފޮޓޯއަށް ކުރި ކޮމެންޓެއްގައި ބުނީ އެއް ލެޖެންޑް އަނެއް ލެޖެންޑުގެ ފޮޓޯއެއް ހިއްސާކުރުމަކީ އުފާވެރިކަމެއް ކަމަށެވެ.
ކުޅަދާނަ ބަތަލު އިރުފާން ޚާނަށް ކޯލޯން އިންފެކްޝަނެއް ޖެހިގެން ފަރުވާކުރަމުން ދަނިކޮށް މަރުވީ މިދިޔަ މަހު 29 ގައެވެ. އޭގެ އަނެއް ދުވަހު ރިޝީ ކަޕޫރަށް ފަރުވާދެމުން ދަނިކޮށް މަރުވެފައެވެ. ދެ ތަރިން ވެސް އައީ 2018 ވަނަ އަހަރުން ފެށިގެން ކެންސަރަށް ފަރުވާ ހޯދަމުންނެވެ.
އިރުފާން ޚާން އަކީ ވާސަޓައިލް އެކްޓަރެއް ކަމަށް ގިނަ ބަޔަކު އިއްތިފާގުވެ އެވެ. އިރުފާން ވަނީ ހޮލީވުޑްގެ ފިލްމުތަކުގައި ވެސް މަސައްކަތްކޮށްފަ އެވެ.
ކާމިޔާބު އެކްޓަރު ރިޝީ ކަޕޫރު ވަނީ އޭނާގެ ދިގު ފިލްމީ ކެރިއަރުގައި 120 އަށްވުރެ ގިނަ ފިލްމު ކުޅެފަ އެވެ. އޭނާ އަކީ މިހާރުގެ ޒުވާން އެކްޓަރު ރަންބީރު ކަޕޫރުގެ ބައްޕަ އެވެ. ހިންދީ ސިނަމާތަކުގެ ފުރަތަމަ އާއިލާ ކަޕޫރް އާއިލާއަށް ނިސްބަތްވާ ރިޝީ ބައްޕައަކީ ކުޅަދާނަ އެކްޓަރު ރާޖް ކަޕޫރުގެ ދަރިފުޅެވެ.