04 May 2020, 12:20
ކޮވިޑް19 އާ ގުޅިގެން ފްލައިޓުތައް ހުއްޓާލައި މާލެ ސަރަހައްދު ލޮކްޑައުން ކުރުމާ ގުޅިގެން، ރާއްޖޭގައި ތާށިވެފައި ތިބި އިންޑިއާގެ ރައްޔިތުން އަނބުރާ ގައުމަށް ގެންދަން، އެ ގައުމުން ފެރީއެއް ފޮނުވަން ނިންމާފައިވާ ކަމަށް އިންޑިއާ ނޫސްތަކުން ބުނެފިއެވެ.
ރާއްޖޭގައި ހުންނަ އިންޑިއާ ހައިކޮމިޝަނާ ހަވާލާދީ އިންޑިއާގެ ނޫހެއް ކަމަށްވާ ޑެކަން ހެރަލްޑްގައި ބުނެފައި ވަނީ ހަފްތާއެއްހާ ދުވަހުގެ ތެރޭގައި ރާއްޖޭގައި ތިބި އިންޑިއާގެ 200 ރައްޔިތުން އެގައުމަށް ގެންދަން ނިންމާފައިިވާ ކަމަށެވެ.
މިކަމާ ގުޅިގެން ރާއްޖޭގައި ހުންނަ އިންޑިއާ ހައިކޮމިޝަންގެ ޑެޕިއުޓީ ހެޑް ރޯހިތު "ސަން" އަށް ވިދާޅުވީ އެ މަސައްކަތް މިހާރު ކުރިއަށްދާ ކަމަށާއި، އަދި ނިންމުމެއް މުޅިން ފައިނަލްވެފައި ނުވާ ކަމަށެވެ.
އެހެން ނަމަވެސް އިންޑިއާ ރައްޔިތުން ބަލާ ފެރީއެއް އައުން ކައިރި ކަމަށް ރޯހިތު ވިދާޅުވިއެވެ.
ރޯހިތު ވިދާޅުވީ އިންޑިއާއަށް މީހުން ގެންދިއުމުގައި އިސްކަން ދޭނީ މިހާރު ހައިކޮމިޝަނުގައި ރަޖިސްޓްރީވެފައި ތިބި މާބަނޑު އަންހެނުންނަށާއި، އުމުރުން ދުވަސްވީ މީހުންނަށާއި، ސިއްހީ މައްސަލަތަކެއް ހުރި މީހުންގެ އިތުރުން ވަޒީފާ ގެއްލުނު މީހުންނަށާއި އާއިލާގެ މީހަކު މަރުވެގެން ގައުމަށް ދާން ބޭނުންްވެފައި ތިބި މީހުންނަށާއި ރާއްޖޭގައި ތާށިވެފައި ތިބި އިންޑިއާ ފަތުރުވެރިންނަށް ކަމަށެވެ.
ރާއްޖޭގައި މިވަގުތު އިންޑިއާގެ 27،000 އެއްހާ މީހުން އެބަތިބި ކަމަށް ރޯހިތު ވިދާޅުވިއެވެ.
ޑެކަން ހެރަލްޑްގައި ރާއްޖެއިން އިންޑިއާއަށް ގެންދާ 200 މީހުން އެންމެ ފުރަތަމަ ގެންދާނީ ކޮޗިންއަށް ކަމަށެވެ. އަދި ކޮޗިންގަައި 14 ދުވަހަށް އެމީހުން ކަރަންޓީން ކުރާނެއެވެ. އަދި އެ ފެސިލިޓީތަކަށް ފައިސާ ދައްކަން ޖެހޭނީ އެމީހުން އަމިއްލައަށް ކަމަށް ވެސް އެ ނޫހުގައި ބުނެފައިވެއެވެ.
އިންޑިއާއިން ވަނީ މީގެކުރިން ވެސް ޗައިނާ، އިޓަލީ، އިރާން، އަފްޣާނިސްތާން، މެލޭޝިޔާ އަދި ޖަޕާނުގައި ތިބި އެ ގައުމުގެ ރައްޔިތުން އެ ގައުމުތަކުން ނެރެފައެވެ.